မတ်မလီု- အဝ်ဂတ် ၁၀
ပ္ဍဲဍုင်ဗမာဂှ် အခိင်သီလဝ်အဝဵုဏံ ဟိုတ်နူပဋိပက္ခရပ်လွဟ် က္တဵုဒှ်မံင်တုဲ ပ္ဍဲကဵုသၞာံဏံ အခေါင်ဗတောန်သဇိုင်ပညာ ကောန်င္ရာ်ဗဒါဲ ၇ ပြကောဋိကိုတ် ဆောံလေင်အာမာန်မံင်ရောင် ဂကောံသုတေသန ISP-Myanmar ပ္ဍဲအဝ်ဂတ် ၆ ဂှ် လလောင်တြးလဝ်ရ။
အတိုင်လိက်ဒုင်စဳရေင် ISP-Myanmar မ္ဂး ကၠာဟွံဂွံသီအဝဵုဍင် ပ္ဍဲသၞာံဗတောန်ပညာ ၂၀၁၉-၂၀၂၀ ရပ်မအပ်လဝ်ဘာ အပံင်ဖအိုတ် နွံ ၉ ဒဿမ ၇ ပြကောဋိကိုတ်ပြင် နွံမံင်ကီုလေဝ် ပ္ဍဲသၞာံ ဗတောန်ပညာ ၂၀၂၅-၂၀၂၆ ဏံ ဆၜိုတ် ၆ ဒဿမ ၁ ပြကောဋိကိုတ်ဟေင် နွံမံင်ဂှ်ရ ပရေင်ပအပ်ဘာ လၟေင်သၞာံ ဍိုန်လျစှ်ေကၠုင်မံင် ဂွံဆဵုလဝ်ရ။
အတိုင်လလောင်တြး လိက်စရင်အင်လၟိဟ်မၞိဟ် ၂၀၁၉ ကေုာံ ဂကောံသြန်ဂအုံ တင်နင်လၟိဟ်မၞိဟ်ကုလသမဂ္ဂ NUFPA မ္ဂး လၟိဟ်ကောန်င္ရာ်အဝဲမံင်ဘာ ၁၃ ပြကောဋိကိုတ် နွံမာန်တုဲ ဒုင်သ္ဇိုင်တော်ဆကဵု လၟိဟ်တံဏံမ္ဂး ပ္ဍဲသၞာံဏံ ကောန်င္ရာ်အဝဲမံင်ဘာ ကရပ်ဗဒါဲ ၇ ပြကောဋိကိုတ် အခေါင်ဗတောန်ပညာ ဆောံလေင်မာန်ရောင် ထံက်ထၜးလဝ်ရ။
ဟိုတ်နူကဵု အခေါင်ဗတောန်ပညာသ္ဇိုင် ဆေင်လေင်အာဂှ်ရ ကောန်င္ရာ်လ္ရဵုလ္ရဵု စိုပ်အာဂၠံင်ဍာန်ဗၠေတ်လေဝ် နွံတုဲ အနာဂတ်ဍေံတေံ ပရေအ်အာကွေံကွေံရဂှ် အစာဘာ CDM မွဲတၠ ဟီုကဵုဌာန်ပရိုင်သြင်လောန်တိုင်မ်ရ။
“အဓိက ဒှ်ကၠုင်မာန်ရ လၟုဟ်တှ်ေ ကောန်င္ရာ်ၜိုတ်အဝဲ ၁၂/၁၃ သၞာံတှ်ေ မုဍေံတံဒှ်အာရော ဗွဲမဂၠိုင် စိုပ်အာစိုတ်မ္ရးအိုတ်ရ၊ သုင်ၜံက် စဇဗၠု၊ လ္ရဵု အခိုက်အလိုက် သုင်တိုန်ဂဥုဲၜူမာဲညိည ဗွဲမဂၠိုင်စိုပ်အာအဆံင်ဏံယျ၊ အနာဂတ်ကောန်င္ရာ်တံ ပရေအ်အာကွေံကွေံရလေဝ်” သာ်ဝွံ သ္ဂးရ။
တုဲပၠန် ကောန်င္ရာ်လ္ရဵု အခေါင်ဗတောန်ပရေင်ပညာ မ္ဒးဆောံလေင်လဝ်တုဲ ကမၠောန်စုက်ဂှ် ဒးကၠောန်အာ၊ ကၠာအဝဲဟွံစိုပ်ဂှ် စိုပ်အာဍုင်မွဲလပါ်တေံသၟးဟွံက အခိင်အဝဲဟွံစိုပ်ဏီ စှ်ေအာအိန်ထံင်တံဂှ် ဂၠိုင်အာနူကၠာတေံဏီ ညးတေံဆက်ဟီုရ။
ပ္ဍဲသၞာံဏံ လၟိဟ်လုပ်ဘာတံဂှ်တော်ဆအာမ္ဂး ပၞောဝ်အာကဵု အဝဲကောန်င္ရာ်ဖအိုတ် ၅၃% တံဂှ် ပအပ်ဘာဟွံမာန်တုဲ အခေါင်ဗတောန်ပညာဍေံတံ မ္ဒးဆောမ်လေင်လဝ်ကီု မွဲလပါ်တေံ သွက်ဂွံဆက်တိုန်ကတ်လ္ရတ်အာ ပညာအဆံင်သၠုင်နာနာ ပရေင်သှ်လိက် လုပ်ဘာတက္ကသိုလ်တံပၠန်လေဝ် လၟိဟ်ဍိုန်စှ်အာမံင် ဗွဲလၟေင်င်ရဂှ် ISP- Myanmar ထံက်ထၜးလဝ်ရ။
အခေါင်ဗတောန်ပညာကောန်င္ရာ် ဗဒါဲ ၇ ပြကောဋိကိုတ် ဆောမ်လေင်မံင်ဟီုဂှ် ရိုဟ်ကၞက် သွက်အနာဂတ်ဍုင်မွဲ ဒှ်မံင်တုဲ ဗီုပြင် ဒးဒုင်တက်ပကဝ်လဝ် အနာဂတ်ဍုင်မွဲ ဒှ်မံင်ရဏောင် သာ်ဝွံ အစာၝောံ CDM မွဲတၠ ဟီုလဴလဝ် လညာတ်ညးတေံရ။
“ကောန်င္ရာ် ၇ ပြကောဋိကိုတ်ဟီုဂှ် ရိုဟ်ကၞက်မၞိဟ်သွက်အနာဂတ်ဍုင်မွဲရလေဝ်၊ ဒးဂိုဟ်ကွေံရနဝ် အခေါင်ဗတောန်ပညာ မ္ဒးဆောမ်လေင်အာ၊ ဍေံတံ ကြဳဖျေံဗုမ်၊ ဗီုလဵုမှ တိုန်ဘာဟွံပြေပြံင်ပုဟ်၊ အေဒှ်ကၠုင် ဗီုဏံဂှ်တှ်ေ ဗီုပြင်တက်ဝးပကဝ်ထောံ အနာဂတ်ဍုင်ရဏောင်၊ ရိုဟ်ကၞက်မၞိဟ်တံ မ္ဒးဆောမ်လေင်မံင်” သာ်ဝွံ သ္ဂးရ။
ပ္ဍဲဍုင်ဗမာဝွံ သွက်ကောန်င္ရာ်တံ သ္ဂောံဂွံအခေါင် ပရေင်ပညာသ္ဇိုင်ဂှ် ဒှ်မံင်တင်ဝါတ်ခက်ခုဲ ဇၞော်ကဵုဇြဟတ်တုဲ ပရေင်ပိုန်ဒြပ်တံ ဟွံပြေပြံင်ကီု၊ သြန်လုပ်သြန်တိတ် ဟွံညဳတိုန်ကီု ပ္ဍဲအကြာပဋိပက္ခရပ်လွဟ် က္တဵုဒှ်မံင်ဏံဂှ် ပရေင်ဂီုကၠီုနာနာ ဟွံဂွံဖျေံစိုတ်ကီုတုဲ လၟိဟ်ကောန်င္ရာ်တိုန်ဘာတံ မ္ဒးအောန်စှ်ေအာရဂှ် ISP-Myanmar သ္ဂးလဝ်ရ။
တုဲပၠန် အပ္ဍဲဒၞာဲ ပဋိပက္ခပၞာန် ဇြဟတ်ဇၞော်သ္ကာတ်မြဟ်မံင်တံဂှ် အခေါင်ဗတောန်ပညာ ပဵုတုဲဒးဆောမ်လေင်မံင်တုဲ ဘာဗတောန်လိက် ဗွဲမဂၠိုင်တံ ဒးကၟာတ်ထောံလဝ်သၟးဟွံက သွက်ဂွံဗၠးဘဲအန္တရာဲ ကဝ်မယှေန်ပၞာန် ဗတိုက်မံင်နကဵုပၞာန်ကျာတံ ဂွံပါဲဗၠးအာမာန်ဂှ် ဘာဗတောန်လိက်လ္ရဵု ဒးတောဲစွံလဝ်ကဵု သီုဒၞာဲဥမင်တံလေဝ် နွံမံင်ကီုရောင် ISP-Myanmar လလောင်ပတိတ်လဝ်ရ။
ပရိုင်- သြင်လောန်တိုင်မ်
Photo – Social Media