မတ်မလီု၊ အဝ်ဂတ် ၁၀
ပ္ဍဲအရာ သွက်ဂွံပတန်အာ အနာဂတ် ကၟိန်ဍုင်ဖိတ်ဒရေဝ် ဒဳမဝ်ကရေသဳမာန်ဂှ် ဂကောံဒှ်မံင်အဓိကတံ မပ္တံကု ကောန်ဍုင်အရင်ရပ်လွတ် EAO တံသီုဖအိုတ် ညံင်ဂွံသၠုင်ပတိုန်အာ ပရေင်ညဳသၟတ်တံမာန် ဖျေံလဝ်ဂၠံင်စၞောန် နွံမံင်ရောင် မဟာမိတ်ဒေါအ်ပန်ပှော် ၇ ဂကောံ ဟီုရ။
ဂကောံကောန်ဍုင်အရင်ရပ်လွတ် မဟာမိတ် ဒေါအ်ပန်ပှော် ၇ ဂကောံ- 7 EAO Alliance သ္ပသ္ကိုပ်သ္က မကၠောန် သ္ပလဝ်ကောံဓရီု ပ္ဍဲအဝ်ဂတ် ၆ ဂှ် ဒုင်သ္ဇိုင်ကဵု ပရေင်ဍုင်ကွာန် အကာဲအရာပရေင်ပၞာန် ပကတိဒှ်မံင်လၟုဟ်ဏံကီု အကာဲအရာဍုင်ဂၠးကဝ်တံကီု တၠုင်လအာ ဗီုလဵုဒှ်ကၠုင်မာန် ဒုင်သ္ဇိုင်တုဲ ညံင်ဂွံဖျေံဏာ လၟေင်ပရေင်ကမၠောန်နာနာ သ္ရဳဂၠိပ်သဳကၠဳလဝ် လိက်ဒုင်စဳရေင် ဇၟာပ်ဂကောံ မပါလုပ်လဝ်တံဂှ်ရ။
တုဲပၠန် သဘဴလစွံစိုတ် ဂၠံင်စၞောန် ၅ တင်ဂှ်လဝ် နူကောံဓရီုဏံ လးဖျေံကဵုလဝ်မာန်ရဂှ် မဟာမိတ်ဒေါအ်ပန်ပှော် ၇ ဂကောံ လလောင်ပတိတ်လဝ်ပရိုင်ရ။
အပ္ဍဲဏံဝွံ သၟဝ်ဗီုပြင်က္တဵုဒှ်မံင် အတိုင်လၟေင်ဟွံသေင်တံဏံ သွက်ဖိတ်ဒရေဝ်ဂှ် EAO တံ သီုဖအိုတ် ညံင်ဂွံသၠုင်ပတိုန် ပရေင်ညဳသၟတ်တံလေဝ် ပါလုပ်မံင်ရောင် သာ်ဝွံ ညးနွံအခေါင်ဟီုဂး မဟာမိတ်ဒေါအ်ပန်ပှော် ၇ ဂကောံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု သြင်လောန်တိုင်မ်ရ။
“ဒက်ပတန်အာ ကၟိန်ဍုင်ဖိတ်ဒရေဝ်ဏောင် ပိုဲဟီုဂးတှ်ေ ဟီုအာဖိတ်ဒရေဝ်ဗက်ဂှ် ဆၜိုတ်ကောန်ဍုင်အရင်ပိုဲ ၇ ဂကောံဏံဓဝ် ဗီုလဵုမှစိုပ်တရဴဟွံမာန်ပုဟ်ဂှ် တီမံင်ရလေဝ်၊ ဟိုတ်ဂှ်ရ အပ္ဍဲအခိင်ဏံ နကဵု ဂကောံကောန်ဍုင် အရင် ရပ်လွဟ်ဂမၠိုင်တံ ၜိုန်ရတင်ရန်တၟံ တုပ်မံင်ညးသ္ကံကီုလေဝ် နဲကဲရပ်စပ်ကၠောန်ၜိုတ်ရေင်တၠုင် ဒှ်မံင်ဗီုပြင်တၞဟ်ခြာပြးဇးမံင်တံဂှ်ကီု သၟဝ်အကာဲအရာ အကာဲအရာပရေင်ဍုင်ကွာန် ဗီုပြင်ဍာံဟွံသေင် ဗီုလၟုဟ်ဏံ ဗီုလဵုဒှ်ဒှ် သွက်ဂွံဒက်ပတန်အာ ဖိတ်ဒရေဝ်ဟီုဂှ် ပိုဲတံရ ဒှ်မံင်ဇြဟတ်အဓိကတုဲ EAO သီုဖအိုတ်တံ ညံင်ဂွံစန်ပကောံအာမာန်ဂှ် ပိုဲဒးဂၠာဲအာနဲကဲရောင် အပ္ဍဲတင်စၞောန်ပါကၠုင်မွဲတင်” သာ်ဝွံ သ္ဂးရ။ အပ္ဍဲတင်စၞောန်တၞဟ်တံဝွံ ပြဿနာပရေင်ဍုင်ကွာန်ဂှ် ညံင်ဂွံဂၠာဲအာသွဟ် နကဵုနဲကဲ ပရေင်ဆဵုဂဗတက်ကျာ၊ သွက်ဂွံဂၠာဲအာနဲကဲ ပြဿနာပရေင်ဍုင်ကွာန် အလုံဍုင်မွဲမာန် ပ္ဍဲအကာဲအရာပကတိဏံ ကုဇြဟတ်ညးဆေင်စပ် ပါလုပ်မံင်သီုဖအိုတ်တံ ဗလးဒၞာဲဆဵုဂဗတက်ကျာမွဲ ဂွံမံက်တိုန်မာန်တံ ပါလုပ်ရ။
တုဲပၠန် သွက်ဒဳမဝ်ကရေသဳပၠန် သွက်ဂွံပံင်တောဲ ပညဳပညပ်အာကဵု ဇြဟတ်ပရေင်ကွာန်အပ္ဍဲဍုင်တံ ကေုာံ အခန်ကၞာ စၟတ်သမ္တီ ထပက်စၟတ်တဲ NCA ပေင်စိုပ် ၁၀ သၞာံဂှ် နဒဒှ် Join Ownerships သွက်ဂွံကၠောန်သ္ပအာမာန်တံ သ္ဂးရ။
တင်စၞောန်တံဏံဝွံ အကာဲအရာ ပကတိ မ္ဒးဆဵုဂဗမံင်လၟုဟ်ဏံဂှ် ညံင်ဂွံကယျောဝ်ဗက်အာဗွဲမကိတ်ညဳမာန် လၟေင်ပရေင်ကမၠောန်နာနာတံလေဝ် မဟာမိတ်ဒေါအ်ပန်ပှော် ၇ ဂကောံဏံ မဒက်ပတန်လဝ် ဂကောံညးအုပ်ကာဂှ် ညးတံ သွက်ဂွံထမံက်အာရုပ်ရဴ အတိုင်လၟေင်အဆံင်င်ဂှ် ဖျေံလဝ်သ္ဂုတ်သွာတ်ရ။
လက်ကြဴသၞာံ ၂၀၂၁ တုဲ ဟိုတ်နူအကာဲအရာ ပရေင်ဍုင်ကွာန် မက္တဵုဒှ်မံင် ပြဿနာနာနာတံဂှ်ရ ဗွိုင်ပၞာန်သၠဲတိုန်တုဲ ပရေင်သဳကၠဳနာနာ ဍိုန်လျစှ်ေကၠုင်တံဂှ် ဒှ်မံင်ဗီုပြင်အကာဲအရာ ဍာံဍာံဟွံသေင်ရောင် သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
“ပြဟ်ဟ်ဏံ မ္ဒးဆဵုဂဗမံင်ကဵု အကာဲအရာတံဏံဟီုဂှ် ပိုဲမိက်ဂွံသ္ဂး အကာဲအရာပရေင်ဍုင်ကွာန် ပကတိက္တဵုဒှ်မံင် လၟုဟ်ဏံရ မိက်ဂွံဟီု၊ အကာဲအရာ ပရေင်ဍုင်ကွာန်ဟီုဂှ် ဗီုညးဖအိုတ်တီလဝ်ဂှ်ရလေဝ် နကဵုအခိင်ကာလဟီုတှ်ေ ပန်သၞာံပြင်အာတုဲယျ၊ ဗွိုင်ပရေင်ပၞာန် သၠဲလးဇၞော်အာမံင်အိုတ်စောန်တုဲ ဗီုပိုဲကၠောန်လဝ်ကၠာတေံ ပရေင်ဆဵုဂဗတက်ကျာကီု ပရေင်ဍုင်ကွာန်တံကီု ဍိုန်လျစှ်ေကၠုင်မံင် သက်ဟီုလဝ်ဟၟဲ” သာ်ဝွံ သ္ဂးရ။
ပ္ဍဲကောံဒရီုဝွံ ညးက္ဍိုက်က္ဍိုပ် က္ဍိုပ်ဂကောံ သ္ကိုပ်ပၞာန်ဇၞော် ယတ်သေတ်၊ ဒုညးက္ဍိုပ်ဂကောံ နာဲအံင်မေန် ကေုာံမွဲကရောံ ညးပါလုပ်ဂကောံဂမၠိုင်၊ ညးပါလုပ်ဂကောံ ညးအုပ်ကာတံ၊ သ္ကိုပ်ပညဳပညပ် ကမ်မတဳကမၠောန်ဂမၠိုင်ကေုာံ ပူဂဵုဘိက်လဝ်တၟေင်တံ တိုန်စိုပ်လဝ်ရ။
ပ္ဍဲကဵုမဟာမိတ်ဒေါအ်ပန်ပှော် ၇ ဂကောံဝွံ ကံင်သဳကလေင်ဒက်ပတန်ဍုင်သေံ RCSS၊ ဗော်ဍုင်မန်တၟိ NMSP၊ ဗော်သၠးပွးဍုင်ရခေင် ALP၊ DKBA, ဂကောံၜိုဟ်လလမ်ကရေင် KNU/KNLA-PC၊ လားဟူဒီမိုကရက်တစ်အစည်းအရုံး LDU ကေုာံ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO- NCA/S ခွန်ဥက္ကာ အာက္ဍိုပ်တံ ပါလုပ်ရ။
ပရိုင်- သြင်လောန်တိုင်မ်
Photo – EAOs