ပလဝ်- အဝ်ဂတ် ၁၂
ရးတနင်သဳ ပွိုင်ဍုင်ပဠဝ် ကရပ်ဗဒါဲဍုင်ပလ ဟိုတ်နူပေါဲဗတိုက်ဒှ်တုဲ ဂၠံင်ဗိက်ကဵုပလဝ် ကၟာတ်ကၠုင်လဝ်ပွိုင် ၁၆ တ္ရဲဂှ် ကလေင်ပံက်ကဵုယျဏောင် တမ်ဒပ်ခရိုင်ဗိက် လၟိဟ်(၁) ဒပ်ပၞာန်စဵုဒၞာညးဍုင်ကွာန် PDF တံ ပ္ဍဲအဝ်ဂတ် ၁၀ ဏံ လလောင်ပတိတ်လဝ်ရ။
နူဂျူလိုင် ၂၄ လောန်ကၠုင်တေံ ဒဵုစိုပ်အဝ်ဂတ် ၉ ဏံ အပ္ဍဲဍုင်ပလဂှ် အကြာ မဟာမိတ်ဒပ်ပံင်ကောံ ဂကောံပၠန်ဂတးတံကဵု ဒပ်ပၞာန်ဗမာတံ ၜါလပါ် ဒှ်ကၠုင်လဝ်ပေါဲဗတိုက် ဇၞော်ကဵုဇြဟတ်ရ။
ဟိုတ်ပေါဲဗတိုက်ဒှ်တုဲ ဂၠံင်ဇၞော်ကၟိန်ဍုင် စၟတ် (၈) သကုတ် ဗိက်ကဵု ပလဝ်ဂှ် ဟိုတ်နူအကာဲအရာပရေင်ဂီုကၠီု ညးဍုင်ကွာန်တံ ကၟာတ်လဝ်ဗွဲယာယဳ မွဲချိုန်ခဏရ။
ပြဟ်ဟ်ဏံ ပေါဲဗတိုက်ၜါလပါ် ကလေင်ညိင်သ္ရိတ်အာတုဲ ဟိုတ်နူကလေင်ပံက်ကဵု သကုတ်ဂၠံင် ဗိက်-ပလဝ်ဂှ် စနူအဝ်ဂတ် ၁၁ အခိင်နူဂယးပြဟ်ဂှ် ကွဳစက်ဂမၠိုင်ကဵု ညးဍုင်ကွာန်တံ ကလေင်အာမံင်တရဴယျ သာ်ဝွံ သ္ဂးရ။
ဆဂး သကုတ်ဂၠံင် ဗိက်-ပလဝ် ၜိုန်ရပံက်အာကီုလေဝ် ဒပ်ၜါလပါ်တံဂှ် ဆေင်လဝ်မုက်ပၞာန်ဖိုဟ်ဒှ်မံင်တုဲ နကဵုရဲဍုင်ပလတံ ပ္ဍဲဒၞာဲအကြာဍုင် ညိလေဝ်လ္ပအာကၠုင်မံင်ဏီညိဂှ် တမ်ဒပ်လၟိဟ် (၁) ခရိုင်ဗိက်ကဵု ဒပ်စဵုဒၞာကောန်ဂကူကရေင် KNDO တမ်ဒပ် (၇) ဂကောံမိတ်တံ တာဒၞာလဝ်ရောင်။
ဟိုတ်နူပေါဲဗတိုက်ဍုင်ပလဂှ်တုဲ ကောန်ညးဍုင်ကွာန် ရဲအာတရဴတံကီု သီုညးဍုင်ကွာန်ဒေသ ဟွံအောန်နူကဵု ၂၀ တၠ ချိုတ်အာလဝ်နွံတုဲ ကောန်ဍုင်ပလဂမၠိုင်လေဝ် ထောံလဝ်သ္ရိဌာန် ပါဲတိတ်ဒဴတိတ်အာလဝ် ဒၞာဲဌာန်တၞဟ်ဟ်တံဝွံ ဒဵုကဵုလၟုဟ် ဟွံကလေင်စိုပ် ဒၞာဲသ္ရိဌာန်ညးတံဏီဖိုဟ် ဂးရ။
ပရိုင်-သြင်လောန်တိုင်မ်
Photo- Social Media