ပလဝ်၊ အဝ်ဂတ် ၁၂
ပ္ဍဲရးတနင်သဳ ပွိုင်ဍုင်ပလဝ် ဒၞာဲကွာန်နေန်တံင်(နန်းတောင်) ဒပ်ပၞာန်ဗၟာ မဖျေံလဝ်သၞေဟ်ကင်ဂှ် ဟိုတ်နူဒးဒုင်ဗတိုက်တုဲ ကောန်ဒပ်မွဲတၠချိုတ်၊ ပန်တၠ ဒးအာလဝ်ဝပ်နွံရ သာ်ဝွံ ဂွံတီလဝ် နူ KNLA ဒပ်တၟေင် မဟာဒပ် ၄ ရ။
သၞေဟ်ကင်ဒပ်ပၞာန် ဖျေံလဝ်ဒၞာဲ ပ္ဍဲကွာန်နေန်တံင်ဂှ် ဒပ်ပၞာန်ဗၠးၜးကောန်ဂကူကရေင် KNLA ဒပ်တၟေင် မဟာဒပ် ၄ လုပ်ဗတိုက်လဝ် ပ္ဍဲအဝ်ဂတ် ၁၀ အခိင်နူဂယး ၆ နာဍဳဂှ်ရ။
ဒပ်ပၞာန်ဗၟာကဵု အကြာဒပ်ပၞာန်ဗၠးၜးကောန်ဂကူကရေင်တံ အခိင်မိနေတ်ညိဓဝ်ရ ဒှ်ပေါဲဗတိုက်တုဲ လပါ်ဒပ်ပၞာန်ဗၟာ ချိုတ်မွဲ၊ ဒးအာဝပ် ပန်တၠ သ္ဂးရ။ အကြာပေါဲဗတိုက်ၜါလပါ်ဏံ နကဵုဒပ်ပၞာန်ဗၟာ ဒုင်ခဳစဵုဒၞာ နကဵုလွဟ်ဇၞော်ကဵု ဒရုင်တံကီုလေဝ် ရဲလပါ် ဒပ်တၟေင် မဟာဒပ် ၄ တံဂှ် ညိလေဝ် ပရေင်ဒးလဝ်ဘဲဝပ်ဟၟဲလးလးတုဲ ကလေင်ဆုတ်စဴမာန်ကၠုင်မာန်ခိုဟ်ဟ်ရ သာ်ဝွံ ပတိတ်လဝ်ပရိုင်ရ။
မွဲလပါ်ပၠန် နကဵု ဒပ်တၟေင် မဟာဒပ် ၄ KNLA ဝွံ ဇြဟတ်ဒပ်ပၞာန်ဗၟာတံ ညးဂွံပြးဇးအာကီု ပရေင်ဂီုကၠီုဟၟဲမံင်ဂှ် ရဲဒပ်ဍေံတံ ဂွံဒုင်စသိုင်ကီု တုဲပၠန် ရန်တၟံကဵု သွက်ဂွံပလီုပထုဲ လၟေင်ကမၠောန် ဒပ်ပၞာန်ဗၟာတံရောင် သ္ဂးရ။
တုဲကၠုင် ဂျောန် ၁၄ တေံဂှ်လေဝ် ပ္ဍဲပွိုင်ဍုင်ပလဝ် ကရပ်ဒၞာဲကွာန် ခန္တီးဂှ် ကောန်ပၞာန်တၟိ ပကောံလဝ် သွက်ဂွံပလံင်ဘာပၞာန် ဇရေင် တိုင်ဗဟို ၁၂ တေံ ဖ္ဍိုက်နင်လဝ်ကဵုၜင်ဂှ် ဒးဒုင်ဗတိုက်တုဲ ကောန်ပၞာန်ၜါတၠ ချိုတ်အာလဝ်ကီု ဂွံတီရ။
ပရိုင်-သြင်လောန်တိုင်မ်
ဗီုရုပ် – KNLA