ကံကြိက်- အဝ်ဂတ် ၁၂
ရဲဂကောံပၠန်ဂတးတံ သီထိင်ဂွံလဝ် ဒၞာဲဂၠံင်အာယှ သ္ကုတ်ကအ်ကြိက်-ဗြဝတဳ ညံင်ဂွံသီကေတ်မာန် ဒပ်ပၞာန်ဗၟာ သွက်ဂွံကလေင်ထပက်ပၞာန်မွဲဝါပၠန်ဂှ် ပလေဝ်ပလေတ်မံင် ပရေင်ပၞာန်တံရောင် ညးဒေသတံ ဟီုလဴရ။
နူကဵုတဲ ဂကောံဇြဟတ်ပၠန်ဂတးတံ ဒပ်ပၞာန်ဗၟာ ကလေင်သီဂွံဏာ သ္ကုတ်ဂၠံင် ကြုင်ဒဵု-ကအ်ကြိက်ဂှ်တုဲ ညံင်ဂွံကလေင် သီကေတ်ပေင်င်မာန်ပၠန် ဖန်ဇန်ရေင်တၠုင်အာဏောင် ပ္ဍဲဂိတုဂျူလိုင်ဂှ် ဒပ်ပၞာန်ဗၟာ ဟီုလဝ်နွံရ။
နကဵုဒပ်ပၞာန်ဗၟာဝွံ ပလံင်ဗစိုပ်ကဵုမံင် လွဟ်မကမ်ဇွောံမနာနာ ကုတမ်ဒပ်မဖျေံလဝ်သ္ဇိုင် ဒၞာဲကဵုဍုင်ကအ်ကြိက်တုဲ နူကဵုဗလးကျာလေဝ် နကဵုကင်ပၞာန် ပဝ်ယျာံဂေတ်ဂေင်မင်ရံင်မံင်ကီု အကြာဏံ ဒၞာဲဒပ်ပၠန်ဂတးတံနွံမာန် ချိင်ဆကေတ်တုဲ နူကဵုဍုင်ကအ်ကြိက်ဂှ် ပန်ကၠဟ်မံင်ကဵု လွဟ်ဇၞော်တံနွံရ သာ်ဝွံ နူကဵုရိုဟ်ကၞက် ညးဒေသတံ သ္ဂးရ။
သွက်ဂွံကလေင်သီကေတ် ဂၠံင်အာယှဏံမာန် ဒပ်ပါ်တိတ်နူ DKBA ညးက္ဍိုပ် ဗိုလ်ဘိတံမွဲဍိုပ်ဂှ်လေဝ် ပံင်ကောံလဝ်ဒပ်ပၞာန်ဗၟာတံဂှ် ဘိုင်ဗတိုက်ကဵုမံင်ကီုတုဲ နူကဵုဒပ်ပၞာန်ဗၟာတံ ထံက်ပင်ကဵုမံင် လွဟ်မကမ်နာနာတံ နွံရ။
အပ္ဍဲကဵု ပေါဲဗတိုက် ကြုင်ဒဵု-ကအ်ကြိုက် တုဲကၠုင်ဏံဂှ် ဂကောံမပါ်တိတ်လဝ် DKBA က္ဍိုပ်ဗိုလ်ဘိတံ ဘိုင်ဗတိုက်ကဵုလဝ် ကရောံဒပ်ပၞာန်ဗၟာတံရ။
ညံင်ဂွံကလေင်သီကေတ် ဂၠံင်အာယှမာန် ဒပ်ပၞာန်ဗၟာ ပလေဝ်စမံင် သွက်ဂွံဝေင်ပၞာန်နွံမံင်၊ မွဲလပါ်တေံ နကဵုဇြဟတ်ပၞာန် ဖျင်ဍိုက်လဝ် KNU တုဲ ပ္ဍဲအဝ်ဂတ် ၁၀ အခိင်ဗတမ်ကၠုင်ဖျေံကြဳဗုမ် ဒၞာဲဌာန်ဂအုပ်ဗဟဵု KNU ဂှ်တှ်ေ သွက်ဂွံကလေင်ပံက် ဂၠံင်အာယှမာန်ဂှ် လ္တူ KNU ဍိုက်လဝ်ကဵုဇြဟတ်ပၞာန်လေဝ် ဒှ်မာန်ရောင် သာ်ဝွံ ပါ်ပါဲဟီုဂးမံင်နွံရ။
ပ္ဍဲအဝ်ဂတ် ၁၀ အခိင်ဗတမ် ၜိုတ် ၈ နာဍဳဂှ် ဒပ်ပၞာန်ဗၟာ ကၠုင်ထောံဗုမ် နကဵုၜင်ကျာ ဇၞော်ကဵုဇြဟတ် ပ္ဍဲကဵုဒၞာဲပွဳပွူ ဗဒိုပ်ဌာန်ဂအုပ်ဗဟဵု KNU တုဲ စမြိင်ဒၞာဲမံင်၊ ဒၞာဲဆေင်ဖျာလ္ရဵုတံ ဒးဗုမ် ဆောံလေင်အာကီု မၞိဟ်မွဲတၠလေဝ် ဒးအာလဝ်ဝပ်နွံ ဂွံတီရ။
စနူကဵုတမ်သၞာံဏံဂှ်ရ ပ္ဍဲကဵုဒၞာဲဗ္ဒိုပ် ဌာန်ဂအုပ်ဗဟဵု KNU ဂှ် ဒပ်ပၞာန်ဗၟာ စကာသုင်စောဲဒရုင်တုဲ ဗတိုက်ကၠုင်လဝ် ၂ ဝါ နွံကီုလေဝ် မၞိဟ်ကေင်ဒးလဝ်ဘဲဝပ်တံ ဟၟဲကၠုင်ရဂှ် ဂွံတီရ။
ဒၞာဲဗျူဟာပၞာန်ဗၟာဂဇအ်လဝ် ဗဒိုပ်ဝေါလေဝ် ဗဒါဲပယျဵုသေံဂှ် ပြဟ်ဟ်ဏံ နကဵုပရေင်ပၞာန် ဂကောံဇြဟတ်ပၠန်ဂတးတံ ဆက်ဗတိုက်အာမံင်တုဲ ဒပ်ပၞာန်ဗၟာတံပၠန် ဗျူဟာဍေံတံ ညံင်ဟွံဂွံကျအာဂှ် နူကဵုပၞာန်ကျာမွဲအဆံင် လွဟ်မကမ်နာနာ ထပ်ပလံင်ဗပေင်မံင်ကီု ကြဳဖျေံကဵုဗုမ်ကီု စကာဒရုင်တုဲ ဒုင်ခဳတုဲ ဗတိုက်ကၠုင်မံင်ရ။
ပရိုင်-သြင်လောန်တိုင်မ်
Photo – Social Medai