မတ်မလီု၊ အဝ်ဂတ် ၁၂
ကဝ်မယှေန်ပၞာန် သွက်ဂွံကၠောန်အာပေါဲရုဲမာဲဝွံ ပ္ဍဲကဵုတွဵုရးမန် ဗော်ပရေင်ဍုင်ကွာန် ဘိုအ်ဂွံလုပ်ပြိုင်တံ ပြိုင်ပကာန်တုဲ ပံက်တိုန်ရုင်နွံမံင်ဏောင် ညးဒေသတံ ဟီုလဴကဵု ဌာန်ပရိုင် သြင်လောန်တိုင်မ်ရ။
ပ္ဍဲကဵုကၞောတ်သၞာံအိုတ်ဏံကဵု သၞာံစမံက်တေံ ကၠောန်ကဵုပေါဲရုဲမာဲဏောင် ဗော်ပရေင်ဍုင်ကွာန်တံဂးတုဲ ဒၞာဲဒေသပွိုင်ဍုင် ကဝ်မယှေန်ပၞာန်တံ ထိင်လဝ်မာန်ပေင်င်ဂှ် အကြာဏံ ကၠုင်ပံက်မံင် ရုင်ဗော်ညးတံ မွဲတုဲမွဲ ဆက်ဆက် ဒှ်မံင်ရ။
အပ္ဍဲကဵု ကၠုင်ပံက်မံင်ရုင်ဗော်ညးတံဂှ်တှ်ေ ဗော်မဂွံလဝ်အခေါင် စန်ဒက်အလုံဍုင် မပ္တံကဵု ဗော်ပြည်သူ့ပါတီ၊ ဗော်ကောန်ဂကူသေံ ကေုံာ ဗော်ဒီမိုကရေစီ (ကျားဖြူပါတီ)၊ ဗော်ပြည်သူ့ရှေ့ဆောင်၊ ဗော်တဲတက်ကောန်ဂကူကဵု ဗော်တၞဟ်ဟ်တံ ပါလုပ်ရ။
သွက်ပေါဲရုဲမာဲ ကဝ်မယှေန်ပၞာန်ဂှ် ဗော်ပရေင်ဍုင်ကွာန်လ္ရဵုလ္ရဵုတံ ဗက်လိင်မံင်သ္ရိ အကြာအရာပ်တုဲ ညးတံကၠုင်ပံက်မံင်ရုင် မွဲတုဲမွဲကီု နကဵုညးဒေသဂမၠိုင် သွက်ဂွံလုပ်ဗော်ညးတံဂှ် ဗက်စန်ဒက်မံင်စေအ်စေအ်ရဂှ် ညးဒေသတွဵုရးမန်မွဲတၠ ဟီုရ။
“ဗော် ပြည်သူ့ပါတီကီု ဗော် ပြည်ခိုင်ဖြိုးတံ နွံမံင်တုဲတုဲရ၊ ထပ်သၠဲပံက်တိုန်လဝ်လေဝ် နွံရ။ ဗော်ပြည်ခိုင်ဖြိုး ဂၠိုင်၊ တုဲပၠန် P ပိမ ပဵုဂၠိုင်၊ သွက်ရုင်ဗော်ညးတံ အကြာအရာပ်ဗက်လိင်သ္ရိတုဲ ပံက်တိုန်ရုင်၊ စိုတ်လုပ်စမ္ဂး လုပ်ဗော်ဂွံ၊ မုအခေါင်အရာဂွံမာန် မုဒှ်မာန် ဂးမံင်အိုတ်ရ၊ ညးမွဲကဵုမွဲ ပြိုင်မံင်သ္ကံအိုတ်စောန်” သာ်ဝွံ ဟီုရ။ တုဲပၠန် အကြာရဲဇြဟတ်ပၠန်ဂတးတံ ဗဒေါအ်တာဒၞာလဝ် ပရေင်လုပ်ပြိုင်ပေါဲရုဲမာဲ ကဝ်မယှေန်ပၞာန်ဏံကီုတုဲ မၞိဟ်လ္ရဵု ဗက်ပံက်မံင်ရုင်ဗော် အကြာအရာပ်ညးတံဂှ် နကဵုရဲဒးမံင်တန်တဴမံင်စံင်မံင် ဗဒါဲဗဒါဲတံဏံ ဒှ်ဒွိင်ဂၠိုင်တိုန်မံင်နွံ သာ်ဝွံ ညးတေံ ဆက်ဟီုရ။
ပေါဲရုဲမာဲ ကဝ်မယှေန်ပၞာန်ကၠောန်ကဵုဏံ လ္တူဗက်ပံက်မံင်ရုင်ဗော် တံဂှ် ညိလေဝ်ဟွံသ္ပစၟတ်သမ္တီကီု ဗော်ဗက်ပံက်မံင်ရုင် လုပ်ပြိုင်ပေါဲရုဲမာတံဂှ် ဒှ်ရဲဒစဵုဒစးညးဍုင်ကွာန်ရ သာ်ဝွံ ကောန်တွဵုရးမန် မွဲတၠတၞဟ်မွဲပၠန် ပါ်ပါဲလဝ်ရ။
”ဗော်လုပ်ပြိုင်ပေါဲရုဲမာဲ ကဝ်မယှေန်ပၞာန် ကၠောန်ကဵုဏံဂှ် ဗော်လဵုမှ ပိုဲဟွံသ္ပလဝ် စၟတ်သမ္တီပုဟ်၊ ညိလေဝ် ဟွံဒးစိုတ်ပုဟ်၊ မုဒှ်ရောဟီုတှ်ေ ညးဍုင်ကွာန်တံ ရုဲစှ်ကဵုလဝ်မာဲဗဗွဲသၞောဝ်ဂှ် သီကေတ်အဝဵုတုဲ လၟုဟ်မှကတဵုကၠောန်ကဵု ပေါဲရုဲမာဲဂှ် ဗော်ပရေင်ဍုင်ကွာန်လ္ရဵု မၞိဟ်လ္ရဵု လုပ်ပြိုင်ဏောင်ဟီုတှ်ေ ဒစဵုဒစးကဵု ညးဍုင်ကွာန်တံရဏောင် ခယျရ” သာ်ဝွံ သ္ဂးရ။
က္ဍိုပ်သ္ကိုပ်ကဝ်မယှေန်ပၞာန်သီလဝ်အဝဵု ဂအုပ်သ္ကိုပ်ပၞာန်ဇၞော် မေန်အံင်လှိုင် ကၠောန်ကဵုပေါဲရုဲမာဲဏောင် ဂးလဝ်တုဲ ဗော်ပရေင်ဍုင်ကွာန်လ္ရဵု သွက်ဂွံလုပ်ပေါဲရုဲမာဲ ပံက်တိုန်ရုင်၊ ဗက်စန်ဒက်ကောန်ဗော်တၟိတံဟွံက ပလေဝ်ပလေတ်စလဝ် သွက်ပေါဲရုဲမာဲ ဂွံဆဵုရ။
မွဲလပါ်ပၠန် သွက်ရဲဂကောံပၞာန် အဝဵုဂွံတန်ကြန်၊ ညင်သ္ဂောံလုပ်အဝေါင်ဗဗွဲသၞောဝ်ကဵု ပၞော်တိတ်ပရေင်ဍုင်ကွာန် ညံင်သ္ဂာံဒှ်ကၠုင်မာန် ကၠောန်အာပေါဲရုဲမာဏံဒှ်တုဲ ညံင်ဟွံဂွံပံင်တောဲပါလုပ်အာ ရဲဇြဟတ်ဂကောံပၠန်ဂတး ပ္ဍဲဒေသတံ ဖတိုက်ဖအောဝ်လဝ် ဗော်ပရေင်ဍုင်ကွာန်ဂမၠိုင်တံရ။
ပ္ဍဲပေါဲရုဲမာဲ ကဝ်မယှေန်ပၞာန် ကၠောန်ကဵုဏံ အပ္ဍဲတွဵုရးမန်ဝွံ ဗော်ပြည်ထောင်စု ကြံ့ခိုင်ရေးကဵုဖွံ့ဖြိုးရေး၊ ဗော် ပြည်သူ့ပါတီ၊ ဗော် ပြည်သူ့ရှေ့ဆောင် ပါတီ၊ ဗော် သေံကဵု တိုင်းရင်းသားများ ဒီမိုကရေစီပါတီ (ကျားဖြူပါတီ)၊ ဗော် အမျိုးသား တိုးတက်ရေး ပါတီ၊ ဗော်ညးဗြဴ(မန်) ကဵု ဗော်လ္ရဵုကြပ်ကဵုကံင်သဳပၞာန်တံ ဘိုအ်ဂွံလုပ်ပြိုင်အာ ဂွံတီရ။
ပရိုင်- သြင်လောန်တိုင်မ်
Photo – Social Media