ကဝ်မယှေန် သီလဝ်အဝဵုပၞာန် သွက်ဂွံကၠောန်ပေါဲရုဲမာဲ ပ္ဍဲကဵုတွဵုရးမန်ဂှ် စပံက်အာ ကဝ်မယှေန်ပါ် အရာပ်ကွာန်တံရ သာ်ဝွံ ညးကြပ်ကဵုယဝ်မယှေန်ပၞာန်တံ ဟီုလဴကဵုဌာန်ပရိုင် သြင်လောန်တိုင်မ်ရ။
စရင် ကဝ်မယှေန်ပါ် အရာပ်ကွာန်တံဂှ် ပ္ဍဲအဝ်ဂတ် ဒုတိယသတ္တဟ ညံင်ဂွံတုဲဒှ် ပံက်အာလဝ်တုဲ စရင်ညးမပါလုပ်တံဂှ် မွဲအလန်ဓဝ် ညံင်ဂွံပလံင်ဗစိုပ်လဝ် နူကဝ်မယှေန်ပၞာန် ကဵုလဝ်စၞောန်ရ။
အတိုင်ညးကြပ်ကဵု ကဝ်မယှေန်ပၞာန်တံ ဟီုလဴလဝ်မ္ဂး အပ္ဍဲပံက်လဝ် ဂကောံကဝ်မယှေန်ပါ် အရာပ်ကွာန်တံဝွံ သၞာဲဒါဂွံလဝ်ဇၞူကမၠောန်တံကဵု ရဲထံက်ဂလာန်ပၞာန်တံကီု ဗွဲမဂၠိုင် ပါလုပ်မံင် ဂွံတီရ။
ကဝ်မယှေန်ပါ် အရာပ်ကွာန်တံဝွံ ဥက္ကဌ၊ ညးအုပ်ကာကဵု ညးပါလုပ်ဂကောံ အပံင်ဖအိုတ် ၇ တၠ ညံင်ဂွံ ဒက်ခၞံလဝ် လပါ်ကဝ်မယှေန်ပၞာန် ကဵုလဝ်စၞောန် သ္ဂးရ။
နကဵု ဂကောံကဝ်မယှေန်ပါ် အရာပ်ကွာန်တံဝွံ ကၠာဟွံစိုပ်ပေါဲရုဲမာဲမ္ဂး စရင်မာဲကဵု စရင်လၟိဟ်မၞိဟ် ညံင်ဂွံဍာံစၟတ်မာန်၊ လၟေင်ကမၠောန်ပေါဲရုဲမာဲဂှ် ညံင်ဂွံဒစးဒုင်ပလေဝ်စလဝ် ကဵု စပ်ကဵုကိစ္စ ပရေင်ဂီုကၠီုတံလေဝ် ဒစးဒုင်ရေင်တၠုင်လဝ်ညိဂှ် ကဵုလဝ်စၞောန်နွံရ။
ကဝ်မယှေန်ပၞာန်သီလဝ်အဝဵုဂှ် အပ္ဍဲကဵု ကၞောတ်သၞာံဏံကဵု သၞာံဂတတေံမံက်မ္ဂး သွက်ဂွံကၠောန်အာ ပေါဲရုဲမာဲ သ္ကုတ်ညးကဵုညးဂှ် ပံက်ဏာလဝ် ကဝ်မယှေန်ပါ် အရာပ်ကွာန်တံ ဗီုဏံရ။
မွဲလပါ်ပၠန် နူကဵုကဝ်မယှေန်ပၞာန် သွက်ဂွံကၠောန်အာပေါဲရုဲမာန်ဂှ် ဥပဒေကၠတ်ထဝ် မဆေင်စပ်ကဵု ပရေင်ပေါဲရုဲမာဲတံဂှ် ကလေင်ပလေဝ်ထပေင်ဏာလဝ်နွံတုဲ ယဝ်ရ ဒစဵုးဒစးပေါဲရုဲမာဲမ္ဂး ဒဵုကဵုဖျေံအမိင်ဂစိုတ်မာန် ထပ်ခၞံလဝ် ဥပဒေတံရ။
ပရိုင်- သြင်လောန်တိုင်မ်
Photo – CJ