တမုက်ချုင်၊ အဝ်ဂတ် ၁၃
ပ္ဍဲရးတနင်သဳ ပွိုင်ဍုင်တနင်သဳ ဒပ်ကဝ်မယှေန်ပၞာန် ဖျေံလဝ်ဒပ် ပ္ဍဲကဵုကွာန်တမုက်ချုင်ဂှ် ဟိုတ်နူဒးဒုင်ဗတိုက်တုဲ ရဲဒပ်ကဝ်မယှေန်ပၞာန် ဟွံအောန်နူ ပန်တၠ ချိုတ်အာလဝ်နွံ ဂွံတီနူ တမ်ဒပ်လၟိဟ် ၂ ခရိုင်ဗိက်ရ။
နကဵုဇြဟတ်ကောန်ပၞာန် ဗဒါဲ ၇၀ တၠတံ ဒပ်ကဝ်မယှေန်ပၞာန် ကေတ်လဝ်ဒၞာဲ ဖျေံလဝ်ဒပ် ပ္ဍဲကဵု ကွာန်တမုက်ချုင်တုဲ ပ္ဍဲအဝ်ဂတ် ၁၀ နူဂယးၜိုတ်အခိင် ၉ နာဍဳဂှ် ဒပ်ပံင်ကောံ ဒပ်ပၞာန်ညးဍုင်ကွာန်တံ အာဗတိုက်လဝ်ရ။
ပေါဲဗတိုက်ဝွံ အကြာဒပ်ကဝ်မယှေန်ပၞာန်ကဵု ဒပ်ပံင်ကောံ ဒပ်ပၞာန်ညးဍုင်ကွာန်တံ စနူအခိင်နူဂယး ၉ နာဍဳ ဒဵုကဵုသဝ်တ္ရဲ ၄ နာဍဳ သီၜါလပါ် ဒှ်ပန်လဝ်ညးသ္ကံ ဇၞော်ကဵုဇြဟတ် သ္ဂးရ။
အပ္ဍဲပေါဲဗတိုက်ဏံဂှ် လပါ်ရဲဒပ်ကဝ်မယှေန်ပၞာန် ဟွံအောန်နူ ၄ တၠချိုတ်အာ၊ ဒးဝပ် ၁၀ တၠနွံတုဲ လပါ် ဒပ်ပံင်ကောံ ဒပ်ပၞာန်ညးဍုင်ကွာန်တံပၠန်လေဝ် သ္ဂံင်လ္ရဵု ဒးအာလဝ်ဝပ်နွံကီု ညးတာလျိုင်လလောင်ပရိုင် တမ်ဒပ်လၟိဟ် ၂ ခရိုင်ဗိက် ဟီုရ။
ရဲဒပ်ကဝ်မယှေန်ပၞာန်တံဝွံ စနူဂျူလိုင်အိုတ်ဂှ်တုဲ ပ္ဍဲကရပ်ကွာန် လယ်တောင်ယာကဵု ကွာန်တမုက်ချုင်တံဂှ် ဟိုတ်နူလုပ်ကၠုင်ကေတ်လဝ်ဒၞာဲဂှ်ရ ပေါဲဗတိုက်ၜါ်လပါ် ဒှ်မံင်ကြပ်အရိုဟ်ဟ်တ္ရဲ သ္ဂးရ။
တုဲကၠုင်အကြာမွဲၜါတ္ရဲတေံပၠန် ဟိုတ်နူကဵု ဒပ်ကဝ်မယှေန်ပၞာန် ပန်ကၠဟ်ဏာလွဟ်ဇၞော်တုဲ ကောန်င္ရာ်အဝဲ ၆ ဂိတုမွဲတၠ ဒးအာလဝ်ဘဲဝပ်နွံ သာ်ဝွံ ရဲဂကောံ ဇြဟတ်ပၠန်ဂတးတံ ဟီုရ။
ဟိုတ်ဂှ်ရ နကဵုမိမညးဍုင်ကွာန်တံကဵု ညးအာတရဴတံဝွံ စွံအာသတိကဵု ပရေင်ပၞာန်တုဲ ညံင်ဂွံအာကၠုင်မံင်စံင်အာကီု သီုဒဂေတ်ဗက်အာကဵု တင်နင်လလောင်တြး ဒပ်ပၠန်ဂတးတံညိဂှ် ကဵုလဝ်သမ္တီနွံရ။
လောန်ကၠုင် အဝ်ဂတ် ၄ တေံဂှ်လေဝ် အပ္ဍဲကဵုဗတိုက် ပွိုင်ဍုင်တနင်သဳ ကွာန်သိင်ခေါန်ဂှ် ဒပ်ကဝ်မယှေန်ပၞာန် ကၠုင်ပလံင်ပၞာန်ရီုဗင်ကဵု ဇွောံမနာနာတံ ဒးဒုင်တတ်ဗတိုက်ဏာတုဲ ဒးအာလဝ်ဘဲဝပ် ချိုတ်လဝ်လေဝ် နွံမံင် ဂွံတီရ။
ပရိုင်- သြင်လောန်တိုင်မ်
Photo – မြိတ်ခရိုင်အမှတ် ၂ တပ်ရင်း