မတ်မလီု၊ အဝ်ဂတ် ၁၃
ပ္ဍဲတွဵုရးဍုင်မန် ဍုင်မတ်မလီုဂှ် ကဝ်မယှေန်ပၞာန်သီအဝဵုတံ ပံင်တောဲကဵုဌာနသၟဝ်တဲဂမၠိုင်တံတုဲ နကဵုကရောင်ပၞာန်ဇၞော် ၅ ကရောင် ကၠောန်ပေါဲဟီုတွံနာနာ ကလေင်စှ်ေမံင်ပရေင်စန်ဒက်ရ သာ်ဝွံ ရဲလ္တူဍုင်တံ ဟီုလဴကဵု ဌာန်ပရိုင်သြင်လောန်တိုင်မ်ရ။
ကရောင်ပၞာန်ဇၞော် ၅ ကရောင်ဂှ် ကၠောန်ကဵု ပရေင်ဖောအ်ဗြဳရောင် ဌာနဂမၠိုင် ပံင်တောဲလဝ်တံ ဟီုလဝ်ဗီုဏံတုဲ ပ္ဍဲဂိတုဏံ စှ်ေစန်ဒက်မံင် အကြာအရာပ် လ္တူဍုင်မတ်မလီု ကလေင်ကၠောန်မံင်ပေါဲဟီုတွံတံ နွံရ။
ပ္ဍဲအရာ ပရေင်စန်ဒက်ဏံဝွံ တိဍာ်ဒေသ သွက်ဂွံၜိုဟ်သြိုဟ်အာ၊ ပရေင်အုပ်လဒမ်သၞော်ဓဝ် ညံင်ဂွံနွံတိုန်ကၠုင်၊ ပရေင်ဖောအ်ဗြဳဒေသ၊ ပရေင်ပညာကေုာံ ပရေင်ထတ်ယုက် စပ်ကဵုပရေင်ကိစ္စတံဏံ ညးဍုင်ကွာန်တံ ညံင်ဂွံပါလုပ်ကၠုင် စွံအဓိကတုဲ ဟီုတွံစန်ဒက်မံင်ရောင် ဂွံတီရ။
နကဵုက္ဍိုပ်လိက် ပရေင်ဖောအ်ဗြဳဒေသ ကဝ်မယှေန်ပၞာန် ကၠောန်မံင်ပေါဲဟီုတွံတံဝွံ သီုကဵုခါန်ကၞက်အာ ကောန်ဂကောံ ပရေင်ဂီုကၠီုညးဍုင်ကွာန်ကဵု ပရေင်ဗတိုက်သရိုဟ်ပကီုပရာတ်တံကီု သီုကဵုညံင်ဂွံလုပ်ဂကောံ စန်ဒက်မံင်နွံ သာ်ဝွံ ညးမံင်လ္တူဍုင်မတ်မလီုမွဲတၠ ဟီုရ။
“’ဍေံတံ ကၠောန်ပေါဲဟီုတွံတုဲဂှ် ဒက်ဂကောံ ဍုင်ကွာန်ဂွံၜိုဟ်သြိုဟ်သာယာကဵု ပရေင်ဂီုကၠီုဂးတုဲ ခါန်ကၞက်ကောံဂကောံ ရဲလတက်လဝ် ကယျိုင်ယူနဳဖံင် အသာ်ဍိုမ်တံရ၊ နူကဵုကၟိန်ဍုင် ကဵုသြန်ဂိတုဲ ခါန်ကၞက်လဝ် သွက်ဍုင်ကွာန်ၜိုဟ်သြိုဟ်သာယာကဵု ပရေင်ဂီုကၠီု ဂွံနွံဂးရ၊ မၞိဟ်ခါန်ကၞက်ကဵုလဝ်တံ ၜိုတ်လဵုအဝဵုနွံကီု မိက်ဂွံလုပ်ဂကောံဍေံတံတှ်ေ လုပ်မာန်၊ လုပ်တှ်ေဂွံသြန်ဂိတုရောင် ပရူတံဏံပါမံင်” သာ်ဝွံ သ္ဂးရ။
တုဲပၠန် အပ္ဍဲပေါဲဟီုတွံတံဂှ်မ္ဂး စပ်ကဵုကိစ္စဍုင်ကွာန် ဂွံၜိုဟ်သြိုဟ်သာယာ၊ ပရေင်အုပ်လဒမ်သၞောဝ်ဓဝ်ညံင်ဂွံနွံဂှ် ဟီုညိညိတုဲ အရာကိစ္စရဲဂကောံပၠန်ဂတးတံ ညံင်ဟွံဂွံလုပ်စိုပ်ကၠုင်မာန်ကေုာံ ပရေင်ပံင်တောဲကဵုဍေံတံတုဲ ညံင်ဂွံကဵုပရိုင် စွံအဓိကဟီုလဝ် ပ္ဍဲပေါဲဟီုတွံရဂှ် ညးတေံ ဆက်လဴလဝ်ရ။
ကရောင်ပၞာန်ဇၞော် ၅ ကရောင်ကဵု ပေါဲပရေင်စန်ဒက်ဟီုတွံ ကဝ်မယှေန်ပၞာန်တံဝွံ ပ္ဍဲအကြာအရာပ်ဂမၠိုင် ကုတ်လဝ်သ္ကုတ်ညးကဵုညးတုဲ မွဲပေါဲလၟိဟ်မၞိဟ်မွဲစိတၠ ဒးတိုန်စိုပ်ရောင် ကော်ကေတ်လဝ်ဂှ်ရ ပေါဲဟီုတွံတံဏံ ညးဂမၠိုင် စိုတ်ဘိုအ်ဂွံလုပ်စဟၟဲလးလးရောင် သ္ဂးရ။
ပ္ဍဲကဵု ဂကောံ ကရောင်ပၞာန်ဇၞော် ၅ ကရောင်ဟီုဂှ် ပရေင်ဖောအ်ဗြဳကွာန်ဒေသရး၊ ပရေင်ထတ်ယုက်ကေုာံ ပရေင်ပညာဂွံဖောအ်ဗြဳတိုန်ဂးတုဲ သၞာဲဒါဌာနမဆေင်စပ်တံ ပါလုပ်မံင်ကီုလေဝ် နတဲနဇိုင်ကွေံကွေံဂှ် သွက်သ္ဂောံဂွံပရိုင် PDF ရဒှ်မံင်တုဲ သွက်ဂွံပံင်တောဲအာကဵု ဒပ်ပၞာန်စွံအဓိက စန်ဒက်မံင်ရောင် ဂွံတီရ။
ပရိုင်-သြင်လောန်တိုင်မ်
Photo – MOI