မတ်မလီု၊ အဝ်ဂတ် ၁၄
ကဝ်မယှေန်ပၞာန်သီလဝ်အဝဵုဝွံ ကၠာဟွံစိုပ်ပေါဲရုဲမာဲဂှ် ပ္ဍဲတွဵုရးမန် မွဲဒမြိပ်ဍုင်မတ်မလီုဂှ် သၠုင်ပတိုန်လဝ်ပရေင်ဂီုကၠီုတံတုဲ အခိင်ကၟာတ်ဒဒန် လုပ်ဍုင်ပၠန်လေဝ် ပြံင်သၠာဲလဝ်အခိင်ရောင် ရဲလ္တူဍုင်တံ ဟီုကဵုသြင်လောန်တိုင်မ်ရ။
စနူဂျူလိုင် ၁၆ တေံဂှ်ရ ဒပ်ကဝ်မယှေန်ပၞာန်သီအဝဵုတံဂှ် ဒဒန်လုပ်ဍုင်မတ်မလီု မပ္တံကဵု ဒဒန်သြင်လောန်(မတ်မလီု) ကဵု ဒဒန်အတ္ထရံ (မတ်မလီု) တံဂှ် စနူအခိင်နူဂယး ၆ နာဍဳ ဒဵုစိုပ်အခိင်ဗတမ် ၈ နာဍဳဟေင် ကဵုအခေါင်တတ်ကၠောံမံင် ဒဒန်ရ။
တုဲပၠန် စနူအဝ်ဂတ် ၁၃ ဏံတုဲ ဒဒန်လုပ်ဍုင်မတ်မလီု ဒဒန်သြင်လောန်(ၜါသွာင်) ဂှ်ကီု စနူအခိင်နူဂယး ၆ နာဍဳ ဒဵုစိုပ်အခိင်ဗတမ် ၈ နာဍဳဟေင် ကဵုအခေါင်တတ်ကၠောံအာကၠုင် စၟတ်ပိုင်ခြာလဝ် အခိင်ပၠန်ရ။
ထၜးဟိုတ်ပရေင်ဂီုကၠီုတုဲ အခိင်ကၟာတ်ဒဒန်တံဏံ ဟိုတ်နူ ဟပဵုထောံဂှ်ရ ကမၠောန်ပရေင်ပလံင်ဗစိုပ်နာနာ၊ ကွဳစက်လိုင်တံကီု သီုကဵုညးအာတရဴဂမၠိုင် ဒှ်မံင်အခက်အခုဲရဂှ် ရဲဍုင်မတ်မလီုမွဲတၠ ဟီုရ။
“ဟပဵုထောံအခိင်ကၟာတ်ဒဒန် ဗီုဏံဂှ်တှ်ေ ဒှ်အာတင်ဝါတ်တၟာဂမၠိုင်၊ ရဲကၠောန်မံင် ကမၠောန်ပလံင်ကပေါတ်တံကီု ရဲကမၠောန်အာတရဴတံကီု ကွဳစက်လိုင်အာတရဴတံပၠန်လေဝ် ဒှ်အာတင်ဝါတ်ခက်ခုဲအာ ဗွဲမဂၠိုင်၊ ရဲအာမံင်တရဴတံလေဝ် ဒှ်အာအခက်အခုဲပဵုဂၠိုင်တိုန်” သာ်ဝွံ သ္ဂးရ။
ဟိုတ်ဂွံယှအ်ဖျေံထောံ အခိင်တတ်ဒဒန် လုပ်အပ္ဍဲဍုင်ဗီုဏံဂှ်တှ်ေ ပေါဲရုဲမာဲကဝ်မယှေန်ပၞာန်ကၠောန်ဗဒှ်ဏံ နဲလဵုဂွံဂွံ ပလီုအာဏောင် ဟိုတ်နူကဵု ရဲဂကောံပၠန်ဂတးတံ ဟီုဂးမံင်သာ်ဏံတုဲ ရဲဂကောံဇြဟတ်ပၠန်ဂတးတံ ညံင်ဟွံဂွံလုပ်စိုပ်ကၠုင်ဟွံမာန်ဂှ် ဖန်ဇန်လဝ်ရောင် ဂွံတီနူ ရဲကြပ်ကဵု ကဝ်မယှေန်ပၞာန်တံရ။
တုဲပၠန် အပ္ဍဲကဵုဒဒန်လုပ်ဍုင်မတ်မလီုဂှ် ထပ်ဟပဵုဟလိုင်ပတိုန်လဝ် ဇြဟတ်ပရေင်ဂီုကၠီုတံတုဲ စပ်ကဵုအကာဲအရာ ပရေင်ဂီုကၠီုနာနာအိုဿီုတံဂှ် နကဵုသ္ကိုပ်ဌာန်ပၞာန်ရးအဂၞဲ သ္ကိုပ်ပၞာန် ကျော်လင်းမောင် တိုက်ရိုက် က္ဍိုက်ပ် ကောပ်ကာဲမံင်ရောင် သ္ဂးရ။
ဒပ်ကဝ်မယှေန်ပၞာန်တံဝွံ လ္တူညးမလုပ်ကၠုင်ဍုင်မတ်မလီု စနူညးဍုင်ကွာန် ရဲအာတရဴတံကီု ရဲညးဒေသတံကီု စၟဳတ်တေင်င်ဂြပ်ပ်နွံမံင်တုဲ ထပ်ဟပဵုသၠုင်လဝ် ပရေင်စၟဳစၟတ်နာနာသာ်ရောင် ဂွံလဝ်ပရိုင်ရ။
ပရိုင်-သြင်လောန်တိုင်မ်
Photo – Social Media