မုဟ်ဍုင်၊ အဝ်ဂတ် ၁၅
တွဵုရးဍုင်မန် ပ္ဍဲကဵုလုပ်ဍုင်မုဟ်ဍုင် ဒၞာဲဂၠံင်စှ်ေဒဵုထပှ်ကဝးဂှ် ဂကောံပံင်တောဲ ဒပ်ကဝ်မယှေန်ပၞာန်တံ နကဵုဇြဟတ်ပေင်င် ကၟာတ်ဒၞာဆိုအ်လဝ်တုဲ သၠုင်ပတိုန် ပရေင်ဂၠိုက်ဂၠာဲစၟဳတ် ကြာန်မံင်အိုတ်အစောန်ရောင် ညးအာတရဴတံ ဟီုကဵုသြင်လောန်တိုင်မ်ရ။
စနူအဝ်ဂတ်သတ္တဟ ပထမဏံ ဂကောံပံင်တောဲ ဒပ်ကဝ်မယှေန်ပၞာန်တံဝွံ မွဲဒမြိုပ် ဒၞာဲဂၠံင်စှ်ေ ဒဵုထပှ်ကဝးဂှ် နကဵုရဲဂီုကၠီုပေင်င် ကၟာတ်ဆိုအ်လဝ်တုဲ ကၠောန်မံင် ပရေင်စၟဳစၟတ်နာနာသာ်ရ။
စနူကဵု ဖုင်တဲ၊ ထိုင်လှုဲ ရဲအာတရဴတံ မွဲတၠတုဲမွဲတၠ ဒးဒုင်စၟဳစၟတ်မံင် အိုတ်စောန်တုဲ ဗီုဟွံသ္ပကာကဵုမၞိဟ် လဆောဝ်လဆောဝ် ကညာင်လက်စုတ်လေဝ် နွံမံင်ကီုရောင် သ္ဂးရ။
ဟိုတ်နူ ဂကောံပံင်တောဲ ဒပ်ကဝ်မယှေန်ပၞာန်တံ ကၟာတ်ဆိုအ် စၟဳစၟတ်မံင်ဗီုဏံတုဲ ပရေင်အာဂၠံင်တရဴ အခိင်အိုတ်ဂၠိုင်အာကီု ရဲအာတရဴတံလေဝ် စိုတ်ညးတံ ပရေင်ဂီုကၠီုဟၟဲလးလး ဒးဒုင်စသိုင်မံင်အိုတ်စောန် ဂွံတီရ။
အပ္ဍဲကဵု ပရေင်စၟဳစၟတ်ဏံမ္ဂး နူကဵုကဝ်မယှေန်ပၞာန်တံ ခါန်ကၞက်စုတ်လဝ် ရဲဗိုက်လတက်လဝ်ယူနဳဖံင် သာ်ဍီု ညးတံကော်ခဴစ ဂကောံပရေင်ဂီုကၠီုညးဍုင်ကွာန်ကဵု ပရေင်ဗတိုက်သရိုဟ်ပကီုပရာတ်တံဂှ် ဆက်ဆောံပရေအ်အိုတ်ရဏောင် ရဲအာတရဴ ဒးဒုင်စၟဳစၟတ်လဝ်မွဲတၠ ဟီုရ။
ပရေင်စၟဳစၟတ်တံဝွံ ကၠာဲဟွံစိုပ်ပေါဲရုဲမာဲဏံ ဂကောံဒပ်ပၠန်ဂတးတံ ညံင်ဟွံဂွံလုပ်စိုပ်ကၠုင် ဍုင်မုဟ်ဍုင်ဂှ် နကဵုပရေင်ဂီုကၠီု ဒစးဒုင် ပလေဝ်ပလေတ်စလဝ် ဒှ်မာန်ရောင် သာ်ဝွံ ဟီုဂးပါ်ပါဲမံင်လေဝ် နွံရ။
ဗီုဂှ်ကီု ကဝ်မယှေန်တံဂှ် အပ္ဍဲကဵု ပၞော်လုပ်တိတ်ဍုင်မတ်မလီုဂှ်လေဝ် ထပ်ဟပဵုစုတ်လဝ် ဇြဟတ်ပရေင်ဂီုကၠီုတံတုဲ ဗက်ကၟာတ်ဆိုအ် စၟဳစၟတ်မံင်ဇၟာပ်ပ်ဒၞာဲ ကၠောန်မံင်ဆက်ဆက်ဂှ် ဂွံလဝ်ပရိုင်ရ။
ပရိုင်-သြင်လောန်တိုင်မ်
Photo – CJ