ဗြဝတဳ၊ အဝ်ဂတ် ၁၆
ပ္ဍဲတွဵုရးကရေင် ကၠေင်စက်ပလံင်ဗစိုပ်မံင်ဍုင်ဗြဝတဳကီု သီုကဵုကွဳစက်ဖ္ဍိုက်ပလံင်မံင်ကၠေင်တံ ဟိုတ်နူဒပ်ပၞာန် ဗက်ရပ်မံင်တုဲ အပ္ဍဲကဵုဍုင်ဗြဝတဳ င္ရုဟ်မးကၠေင်စက် သၠုင်တိုန်အာရဂှ် ညးဍုင်ကွာန်တံ ဟီုကဵု ဌာန်ပရိုင်သြင်လောန်တိုင်မ်ရ။
နကဵုအမိင် ဒုဂအုပ်သ္ကိုပ်ပၞာန်ဇၞော် သဵုဝန်ဂှ် ပ္ဍဲဍုင်ဘာအင် ဗက်ရပ်သီကေတ်မံင် ကပေါတ်ဗၞိက် ဟွံလုပ်ဗဗွဲသၞောဝ်ဂမၠိုင်ကီု နူဍုင်ဘာအင် ကွဳစက်ဖ္ဍိုက်ပလံင်ဗစိုပ်ကဵုမံင် ကၠေင်စက် သွက်ဍုင်ဗြဝတဳတံဂှ် ဗက်သီရပ်ကေတ်မံင် ဖအိုတ်ရ။
ဒပ်ပၞာန် ဟိုတ်နူရပ်မံင် ကွဳစက်ဖ္ဍိုက်ကၠေင် ပလံင်မံင်ဍုင်ဗြဝတဳသာ်ဏံတုဲ ဆေင်ကၠေင်ဇၞော်ဇၞော် လ္တူဍုင်ဗြဝတဳတံ စနူအဝ်ဂတ် ၁၄ ဂှ် ကုတ်ပိုင်ခြာအခိင် ဒးသွံမံင်တုဲ ဖေက်ကၠေင်ပိုတ်အာ ဒှ်ဒွိင်ဂှ်ရ ညးဒေသတံဗွဲမဂၠိုင်တံ ပၠံင်ၜေတ် ရာန်ကေတ်မံင် ကၠေင်အိုတ်ရ။
တုဲပၠန် ညးဒေသတံဝွံ နကဵုကွဳစက် ကၠောံအာဍုင်မေဝ်ဆံက် လပါ်တိသေံတေံတုဲ ဟိုတ်နူ ဒးဗက်ရာန်မံင်ကၠေင်စက်တံဂှ်ရ အပ္ဍဲကဵုက္ဍိုပ်ဒဒန်ပရေင်ဆာန်ကၟိန် စၟတ်(၁) ဂှ် စနူအခိင်နူဂယးပြဟ်မ္ဂး ကွဳစက်ဗွဲမဂၠိုင် ဒးအာၜေတ်ပြေင်ရေင်လဝ် ဒဵုကဵုအလန်ဇကုဂွံစိုပ် ဖအိုတ်အခိင်တုဲ ဒးမင်မံင်ရောင် ညးဒေသမွဲတၠ သ္ဂးရ။
အခိင်ကၠာတေံ ပ္ဍဲဍုင်ဗြဝတဳ ကၠေင်မွဲလေတ် ၃၅၀၀ ဒကေဝ် နွံမံင်ကီုလေဝ် နူကဵုဒပ်ပၞာန် ဗက်ရပ်မံင်ကၠေင်ကွဳစက် ပရိုင်ပြာကတ်တိတ်ကၠုင်ဗီုဏံတုဲ စနူအဝ်ဂတ် ၁၅ အနှေန်ၚုဟ်မးကၠေင် မွဲလေတ် စိုပ်အာ ကရပ်ဗဒါဲ မွဲဠက်ဒကေဝ်ရဂှ် ရဲဍုင်မြဝတဳမွဲတၠ ဟီုရ။
ဂကောံပၞာန်ဗၟာတံ သွက်ဂွံပြေင်ရေင်ထပက်ပၞာန် အပ္ဍဲကဵုတွဵုရးကရေင်တုဲ ဗက်ရပ်ကၟာတ်မံင် ကၠေင်စက်တံကီု ကပေါတ်ဗၞိက်ဟွံလုပ်သၞောဝ်ဂးတုဲ ဗက်သီရပ်ကေတ်မံင်တံကီု ဟိုတ်နူဗက်တာဒၞာကၟာအ်ဆိုအ်လဝ် ကၠေင်စက်နာနာ သာ်ဏံမ္ဂး အပ္ဍဲဒေသ အနှေန်ၚုဟ်ကပေါတ်နာနာတံ ပဵုတုဲသၠုင်တိုန်ဏောင် ပါ်ပါဲဟီုဂးမံင် နွံရ။
ပရိုင်-သြင်လောန်တိုင်မ်
Photo – CJ