ဟိုတ်နူဒပ်ပၞာန်ဗၟာ ထပက်ပၞာန် ပ္ဍဲကအ်ကြိက်ဂှ်ရ ပေါဲဗတိုက် သ္ကာတ်မြဟ်တိုန်

ကအ်ကြိက်၊ အဝ်ဂတ် ၁၆

တွဵုရးကရေင် ဒၞာဲဒေသလလောင်တြးလဝ် အမိင်ပရေင်အုပ်ဓုပ်ပၞာန် ပ္ဍဲပွိုင်ဍုင်ကအ်ကြိက်ဂှ် ဟိုတ်နူအသိင် ပရေင်ထပက်ပၞာန် ဒပ်ပၞာန်ဗၟာ အသိင်အလိုန်ဇၞော်တိုန်ကၠုင်ဂှ်ရ ပရေင်ဇီုကပါ်ကဵု ဒပ်ပၞာန်ဂကောံဇြဟတ်ပၠန်ဂတးတံတုဲ ပေါဲဗတိုက်သ္ကာတ်မြဟ် ဒှ်မံင်ဆက်က် လၟေင်င်တ္ရဲရဂှ် ပရိုင်ရိုဟ်ကၞက်ဒေသတံ ဟီုကဵု ဌာန်ပရိုင်သြင်လောန်တိုင်မ်ရ။

နူကဵုကံင်သဳပၞာန် ပြံင်သၠာဲဏာယၟု ကဝ်မယှေန်ပၞာန် ပ္ဍဲဂျူလိုင် ၃၁ တေံတုဲ အပ္ဍဲကဵု ၆၃ ပွိုင်ဍုင် လလောင်တြးလဝ် အမိင်ပရေင်အုပ်ဓုပ်ပၞာန်တံဂှ်တှ်ေ တွဵုရးကရေင် ပွိုင်ဍုင်ကအ်ကြိက်ကဵု လှာဒကှ်တံ ပါလုပ်ရ။

လလောင်တြးဏာ ပရေင်အုပ်ဓုပ်ပၞာန်သာ်ဏံတုဲ အပ္ဍဲကဵုပွိုင်ကအ်ကြိက် လပါ်ဍုင်ကြုင်ဒဵုကဵု ကအ်ကြိက်တံဂှ် ဒပ်ပၞာန်ဗၟာ သွက်ဂွံဝေင်ပၞာန် ပလေဝ်ထပေင်ဇြဟတ်တုဲ ဗက်ပန်ထောံမံင် လွဟ်ဇၞော်အကြာဍုင်ကွာန်တံဂှ်ကီု သီုကဵု စကာဒရုင် ၜင်ကျာပၞာန်တံလေဝ် နွံမံင်ကီုရဂှ် ပရိုင်ရိုဟ်ကၞက်ဒေသတံ သ္ဂးရ။

ဗွဲတၟေင် သွက်ဂွံထိင်ချုက်အာ ဂၠံင်ဇၞော်အာယှအိုဿီု စနူဂၠံင် ကြုင်ဒုင်-နဗူ ကဵု ကအ်ကြိက်-ဗြဝတဳတံမာန်ဂှ် စနူဂိတု အဝ်ဂတ်ဏံမံက်ဂှ် ဒပ်ပၞာန်ဗၟာတံ ထပက်ကၠုင်ကရောင်ပၞာန်တုဲ ဒှ်ကၠုင်ပေါဲဗတိုက် ကုဒပ် KNLA သ္ကိုပ်သ္ကလဝ် ဂကောံဇြဟတ်ပၠန်ဂတးတံ ဗွဲမသ္ကာတ်မြဟ်ရ။

အကြာတ္ရဲတံဏံ လပါ်ဂၠံင် ကြုင်ဒဵု-နဗူတေံပၠန် ကရောင်ပၞာန် ဒပ်ပၞာန်ဗၟာ လုပ်စိုပ်ကၠုင်လဝ်ဂှ် ဒှ်ပေါဲဗတိုက်ကဵု ဒပ်ဂကောံဇြဟတ်ပၠန်ဂတးတံတုဲ ညးဍုင်ကွာန် နွံဇိုင်ဍုင်ကြုင်ဒဵု မပ္တံကဵု ရဲကွာန် ချောင်းဖျား၊ ကျုံဘိုင်း၊ နိုင်းခလောင်၊ ကော့ဒေးဆိုင်တံ ကောန်ကွာန်ဗွဲမဂၠိုင် ဒးဂြိပ်ပါဲဒဴအာ ဘဲပၞာန်ရဂှ် ပရိုင်ရိုဟ်ကၞက်ဒေသတံ ဟီုရ။

ဒပ်ကဝ်မယှေန်ပၞာန်တံဂှ် နူကဵုဂၠံင် ကြုင်ဒဵု-နဗူ နကဵုကရောင်ပၞာန် လုပ်ကၠုင်လဝ်ဂှ်တှ်ေ သွက်ဂွံထိင်အာ ကွာန်သ္ကုတ်ဒေသ သၟဝ်ကျာကအ်ကြိက်တံ ဒှ်မာန်ရောင် သ္ရဳဂၠိပ်ဟီုဂးမံင်လေဝ် နွံရ။

သွက်ဂွံ ကလေင်သီကေတ် ထိင်ချုက်အာ ဂၠံင်ဇၞော်အာယှ အလုံအိုဿီုမာန်ဂှ် ကၠောန်သ္ပချဳဒရာင်အာ ပရေင်ပၞာန်ရောင် ဒပ်ကဝ်မယှေန်ပၞာန် စနူဂျူလိုင် ၂၄ တေံ လလောင်ပရိုင် ဟီုဂးလဝ်နွံတုဲ မွဲဒမြိပ် ဂၠံင်အာယှ ကရပ်ဗဒါဲဍုင်ကအ်ကြိက်တံ ပေါဲဗတိုက်သ္ကာတ်မြဟ် ဒှ်ကၠုင်လဝ်ရ။

အခိင်ဒပ်ကဝ်မယှေန်ပၞာန် ထပက်ဝေင်မံင်ပၞာန် ပ္ဍဲကဵုပွိုင်ဍုင်ကအ်ကြိက်ဂှ် မွဲလပါ်တေံပၠန် ပ္ဍဲကဵုဒၞာဲဌာန်ဂအုပ်ဗဟဵု KNU ဗော်သွးကောန်ဂကူကရေင် ပ္ဍဲအဝ်ဂတ် ၁၁ ပယျာံအခိင် ဗတမ်ဂှ် နကဵုၜင်ကျာပၞာန် ကြဳဖျေံဗုင် ဗွဲမသ္ကာတ်မြဟ်တုဲ ညးဍုင်ကွာန် ဗဒါဲ ၂၀၀ တၠတံ ဂြိပ်ဒဴလုပ်အာ လပါ်ဍုင်သေံတေံရ။

ပရိုင်-သြင်လောန်တိုင်မ်

Photo – Social Media