ရေဝ်၊ အဝ်ဂတ် ၂၄
ပ္ဍဲတွဵုးရးမန် ပွိုၚ်ဍုၚ်ရဝ် တမ်ဒပ်ဖျေံသ္ဇိုၚ် ပ္ဍဲကွာန်ဘာ ခမရ ၅၉၁ ဟိုတ်နူဒးဒုၚ်ဗတိုက်ဂှ်ရ ကောန်ပၞာန်ချိုတ်အာမွဲတၠတုဲ ရဲဒးဘဲဝပ်တံလေဝ် နွံမံၚ်ရောၚ် ညးကြပ်ကဵု ဒပ်ပၞာန်တံ ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
ပ္ဍဲအဝ်ဂတ် ၂၃ ၜိုတ်အခိၚ်နူဂယးပြဟ်ဂှ် ဒပ်ဂကောံဇြဟတ်ပၠန်ဂတးတံ နကဵုလွဟ်ဇၞော် ၄၀ မမ ဟွံအောန်နူကဵု ပိမ ပန်ဟပၠုပ်ဖျေံဏာ တမ်ဒပ်ခမရ ၅၉၁ ရ။
ပ္ဍဲကဵုပရေၚ်ပန်ဟပၠုပ်ဖျေံဏာဏံ မကမ်လွဟ်ဇၞော်မွဲမ ဖတုံဟတိုဟ်ဟကးဂှ်တှ်ေ ဒးအာဒၞာဲကၟဳ ခဒမ်ဗၠာဲတိက် မွဲဒၞာဲတုဲ ကောန်ပၞာန် ချိုတ်အာမွဲတၠ သ္ဂးရ။
ၜိုန်ရတမ်ဒပ် ခမရ ၅၉၁ ဒးဒုၚ်ပန်ဖျေံကဵု လွဟ်ဇၞော်ကီုလေဝ် ရဲလပါ်ဒပ်ပၞာန်တံ ညိလေဝ်ဟွံဂံၚ် ကလေၚ်ပန်မွဲသာ် စိုပ်အခိၚ်တ္ၚဲတၟးဂှ်မှ ဗက်ရံၚ်စၟဳစၟတ်ဂၠိုက်ဂၠာဲ အကာဲအရာ ပွဳပွူတမ်ဒပ်ရဂှ် ဂွံတီရ။
ပ္ဍဲတ္ၚဲဂှ်ပၠန် ၜိုတ်အခိၚ်နူဂယး ၁၀ နာဍဳဂှ် ပ္ဍဲပွိုၚ်ဍုၚ်ရေဝ် ဒပ်ကံၚ်သဳပၞာန် ဖျေံလဝ်သ္ဇိုၚ် ကွာန်တၟံကၞေၚ် ခလရ ၁၀၆ ဟိုတ်နူ ပန်ဟဍိုၚ်ဏာလွဟ်ဇၞော်ဂှ် ဖတုံဟတိုဟ်အာ ပ္ဍဲကွာန်ကၞေၚ်တၟံကီုရ။
ဟိုတ်နူလွဟ်ဇၞော် ဖတုံဟတိုဟ်အာလဝ်တုဲ မတာဝေ အယုက် ၄၀ သၞာံ အဃောစမံၚ်ပုၚ် ပ္ဍဲသ္ၚိညး ဒးအာဘဲဝပ်ပ္ဍဲက္ဍိုပ်ကီု တုဲပၠန် ဒၞာဲစမြိုၚ်သ္ၚိဌာန်ညးလေဝ် ဒးလဝ်မကမ် လီုလာ်အာနွံရဂှ် ဂွံတီနူ ညးဒေသတံရ။
ပရိုၚ်-သြၚ်လောန်တိုၚ်မ်
Photo – CJ