မတ်မလီု၊ အဝ်ဂတ် ၂၄
အနှေန်သၠာဲသြန်ဒဝ်ဠာ ၚုဟ်မးစှ်ေကၠုၚ်မံၚ်တုဲ အနှေန်ထဝ်အပ္ဍဲဍုၚ်ဂှ်လေဝ် အကြာတ္ၚဲတံဏံ ဆက်စှ်ေကၠုၚ်မံၚ် ဆက်က်ရဂှ် တၠကမၠောန်ဆေၚ်ထဝ်ဂမၠိုၚ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အနှေန်သၠာဲသြန်ဒဝ်ဠာ အပ္ဍဲဍုၚ်ဝွံ ပ္ဍဲအဝ်ဂတ်သတ္တဟဒုတိယဂှ် မွဲဒဝ်ဠာ ၄၄၀၀ ဒကေဝ်ပြၚ်နွံတုဲ လၟုဟ်ဂှ်တှ်ေ မွဲဒဝ်ဠာ ပွဳပွူ ၄၀၀၀ ဒကဝ် ကလေၚ်စှ်ေအာရ။
ဟိုတ်နူ အနှေန်သၠာဲသြန်ဒဝ်ဠာ စှ်ေအာတုဲ ၚုဟ်ထဝ်မဳလေန်မွဲဒကေဝ် နူကဵုကရပ် ၇၈ ကိုတ်ဂှ် ဒဵုကဵုပွဳပွူ ၇၄ ကိုတ်ဒကေဝ် အနှေန်ၚုဟ်ထဝ် ကလေၚ်စှ်ေအာရ။
အနှေန်ထဝ်အပ္ဍဲဍုၚ် စှ်ေအာဗီုဏံဂှ်တှ်ေ ပေါဲရုဲမာဲအပြံၚ်အလှာဲဒှ်ကၠုၚ်မ္ဂး ဂွိၚ်ဖေက် ပရေၚ်ဆောံလေၚ်တံ နွံကၠုၚ်မာန်ဂှ်ရ ရဲဝေင်သြန်တံ ဟိုတ်နူသွံပတိတ်ကၠုၚ် တၞးသြန်ဒဝ်ဠာညးတံရောၚ် သ္ဂးရ။
“လၟုဟ် ကၠောန်ပေါဲရုဲမာဲဏောၚ်၊ အပ္ဍဲကဵု ပွိုၚ်ၜိုတ်လဵုတံ ဗီုလဵုကၠောန်အာဏောၚ် ဍေံတံ အခိၚ်လလောၚ်တြးဏာဂှ် ပေါဲရုဲမာဲဏံ ညံၚ်ဂွံဒှ်ကၠောန် ဒှ်ကၠုၚ်ဟဏံတှ်ေ ရဲဝေၚ်သြန်တံ ရဲဒေပ်စွံလဝ် ဒဝ်ဠာတံဂှ်တှ်ေ ကလေၚ်သွံပတိတ်ကၠုၚ်ရ၊ ၚုဟ်ဒဝ်ဠာစှ်ေတှ်ေ အနှေန်ထဝ်လေဝ် ဗက်စှ်ေအာကီု၊ အဓိကဂှ် ဒှ်မံၚ်ဗီုတံဏံရဏောင်” သာ်ဝွံ သ္ဂးရ။
တုဲပၠန် ဒဵုစိုပ်အခိၚ်ပေါဲရုဲမာတုဲတေံ အနှေန်သြန်ဒဝ်ဠာအပ္ဍဲဍုၚ်ဂှ် ကသောဝ်စှ်ေအာမံၚ် သိုက်က်ဏီတုဲ ဗီု အနှေန်သြန်ဒဝ်ဠာစှ်ေမံၚ်တံကီု အနှေန်ထဝ်လေဝ် ဍံၚ်ဗက်စှ်ေအာဆက်က်ရတုဲ ပ္ဍဲအခိၚ်ကာလဗီုတံဏံ ညးဍုၚ်ကွာန်တံ ညံၚ်ရဴသွံရာန် ဟွံဂွံမှာရာအာ ထေက်ကဵုဒးစွံအာသတိရောၚ် ညးဆက်ဟီုရ။
ပ္ဍဲဂအာၚ်ဖျာသွံရာန်ထဝ်တံမ္ဂး အနှေန်ထဝ်လဝ်ဟွံညိၚ်၊ ၚုဟ်မးလပါ်စှ်ေဂှ် ပတဝ်အာမံၚ်တုဲ မၞိဟ်ရာန်ထဝ်ဟၟဲ၊ ဂွိၚ်ဖေက်အနှေန်ထဝ် ထပ်စှ်ေအာတုဲ ရဲသွံထဝ်သၟးဂၠိုၚ်တိုန်မံၚ်၊ လျိုၚ်ထဝ်ဟကောၚ်မွဲဒကေဝ်မ္ဂး ရဲသွံဆေၚ်ထဝ်တံ ခြာလဝ် သြန်ၜိုတ်မွဲကိုတ်ပြၚ်တုဲ သွံရာန်မံၚ်နွံ ဂွံတီရ။
လောန်ကၠုၚ်အဝ်ဂတ် ၂၃ ဂှ် အတိုၚ်ကမ္မတဳခုတ်ၚုဟ်မး ဍာ်ဒကေဝ်ထဝ် ကဝ်မယှေန်ပၞာန် စၟတ်ကဵုလဝ် အနှေန်ထဝ် မွဲဒကေဝ်မ္ဂး သြန် ၅,၈၉၀,၀၀၀ ဒကေဝ်နွံကီုလေဝ် ပၞောဝ်အာကဵု ၚုဟ်မးဂအာၚ်ဖျာမ္ၚးတှ်ေ ကရပ် ၁၅ ကိုတ် ခြာမံၚ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media