နေဗျဳတဝ်၊ အဝ်ဂတ် ၂၄
စိုပ်ကၞောတ်ဂိတုဒဳဇြေမ်ပါဏံ ဒေသသ္ကုတ်ညးကဵုညး ပ္ဍဲကဵုကၠောန်အာပေါဲရုဲမာဲဂှ် နူကဵုကောန်ဍုၚ်ဗမာ ရဲစိုပ်မံၚ်ဍုၚ်မ္ၚးတံ သွက်ဂွံကလိကေတ်တၚ်နၚ်ပူဂဵုပေၚ်ၚ်ကဵု မာဲဒစးဒုၚ်တံမာန် နူကဵုကဝ်မယှေန်ပၞာန် ဂစာန်ကၠုၚ်မံၚ်ယျ။
နကဵု ညးတၠဆန္ဒမာဲ စိုပ်မံၚ်ဍုၚ်မ္ၚးတံ နကဵု တၞးလိက်ဗီုပြၚ် (၁၅) သွက်ဂွံကဵုမာဲ ဒစးဒုၚ်မာန်ဂှ် ပ္ဍဲရုၚ်ကလုတ်ဗမာ ဍုၚ်မဆေၚ်စပ်တံ နူအခိင်လၟုဟ် အာစပတိတ်ကေတ်မာန်မံၚ်ရဂှ် နူကဵုကဝ်မယှေန်ပေါဲရုဲမာဲကၟိန်ဍုၚ် UEC ပ္ဍဲအဝ်ဂတ် ၂၁ လလောၚ်တြး ကဵုလဝ်သမ္တီနွံရ။
တၞးလိက်ဖံၚ်ဗီုပြၚ် (၁၅) ဝွံ အာရံၚ်ဗဵုကေတ် လ္တူဝက်ဘ်သိုက် Website ကဝ်မယှေန်ပေါဲရုဲမာဲကၟိန်ဍုၚ် UEC၊ ဌာနဝန်ဇၞော်ပရေၚ်ဍုၚ်သ္အာၚ် ကဵု ရုၚ်ကလုတ်ဍုၚ်ဆေၚ်စပ်တံမာန်တုဲ Download ဂၠောၚ်ကေတ်မာန်ရဂှ် ချူလဝ်ပ္ဍဲတၚ်လလောၚ် ကဝ်မယှေန်ပၞာန်တံရ။
ပေါဲရုဲမာဲသ္ကုတ် (၁) သွက်ဂွံ စကၠောန်အာ ပ္ဍဲဒဳဇြေမ်ပါ ၂၈ ဂှ်တှ်ေ လ္တူတၞးမာဲဒစးဒုၚ်ကေုာံ သွက်ဂွံစုတ်မာဲ ထပေၚ်စုတ်တၚ်နၚ် အပ္ဍဲကဵုတၞးလိက်ဖံင် ဗီုပြၚ် (၁၅) ဂှ်တုဲ စနူတ္ၚဲအကြာ အဝ်ဂတ် ၂၁ ဒဵုကဵု သိပ်တေမ်ပါ ၈ တေံ မ္ဒးပလံၚ်ဗစိုပ်လဝ် ရုၚ်ကလုတ်တံရောၚ် သ္ဂးရ။
ကောန်ဍုၚ်ဗၟာ စိုပ်မံၚ်ဍုၚ်သေံမွဲတၠဂှ်တှ်ေ ဒစဵုဒစးအာ ပေါဲရုဲမာဲဏံတုဲ ဟိုတ်နူ ပရေၚ်ဍဵုဍိုက်ကဝ်မယှေန်ပၞာန် နာနာသာ်တုဲ စိုပ်မံၚ်ဍုၚ်မ္ၚးတံကီုလေဝ် ဒစဵုဒစးအာပေၚ်ၚ်ရောၚ် ဟီုလဝ်ကဵု ဌာန်ပရိုၚ် သြၚ်လောန်တိုၚ်မ်ရ။
“ပေါဲရုဲမာဲ ကဝ်မယှေန်ပၞာန် စဳဇန်မံၚ်ဏံဂှ်တှ်ေ ကောန်ဍုၚ်ဗမာ စိုပ်မံၚ်ဍုၚ်မ္ၚးတံ နကဵုအဲဂှ် ပါလုပ်မံၚ် ညးဒစဵုဒစး ပေါဲရုဲမာဲ မွဲတၠရ၊ မုဟိုတ်ရောတှ်ေ မၞိဟ်စိုပ်မံၚ်လပါ်ဏံ ဗွဲမဂၠိုၚ်ဂှ်တှ်ေ ဟိုတ်နူကဵုပရေၚ်နာနာသာ်တုဲ ကံၚ်သဳပၞာန်တံ ဍဵုဍိုက်၊ ရပ်စပ်လဝ် နကဵုဥပဒေယိုက်ဂၠေၚ်ပၞာန်တံကီု စိုပ်ကၠုၚ်လပါ်ဍုၚ်တံဏံ နွံမံၚ် ဗွဲမဂၠိုၚ်ဂၠၚ်ရောၚ်။ နကဵု တၞးလိက်ဖံၚ် (၁၅) ဏံ ဗီဵုလဵုဍေံတံ ကၠောန်န်မံၚ် ပရေၚ်တံဏံ ဒှ်ကၠုၚ်မာန် ဟွံထေၚ်ပုဟ်၊ ထံက်ပၚ်ကဵုဏာ ဍေံတံ Support ဟွံထေၚ်ပုဟ်။ ရဲစိုပ်မံၚ်လပါ်ဍုၚ်တံဏံ ဗွဲမဂၠိုၚ်ဂှ်တှ်ေ လ္တူကမၠောန် စကစ သ္ကိုပ်သ္ကလဝ်ဖအိုတ်တံဂှ် ရဲဒစဵုဒစးမံၚ် နွံဗွဲမဂၠိုၚ်” သာ်ဝွံ သ္ဂးရ။
သၟာကမၠောန်ဆုဲပြံၚ် နွံမံၚ်ဂၠိုၚ်အိုတ် စနူကဵုရုၚ်ကလုတ်ဗမာ ပ္ဍဲဍုၚ်သေံကီု သီုကဵု မလေယှာ ကဵု ကိုရဳယာသမၠုၚ်ကျာကီု နူကဵုမုက်လိက် Facebook ရုၚ်ကလုတ်တံဏံဂှ် ကောန်ဍုၚ်ဗၟာတံ ညံၚ်ဂွံကဵုအာ မာဲဒစးဒုၚ်မာန် တြးကဵုမံၚ် တၞးလိက်ဖံင် ဗီုပြၚ် (၁၅) ဂှ်ကီုရ။
နကဵု ညးအခေါၚ်ကဵုမာဲနွံ စိုပ်မံၚ်ဍုၚ်မ္ၚးတံဝွံ မ္ဒးအာတ်မိက်ကဵု တၞးလိက်ဗီုပြၚ် (၁၅) ဂှ်တုဲ ယၟ၊ ဒၞာဲဌာန်ဒၟံၚ်အပ္ဍဲဍုၚ်ကီု သီုကဵုဒၞာဲဌာန်မံၚ်ဒၟံၚ် ဒၞာဲစိုပ်မံၚ်လၟုဟ်ဏံကီု ဒးဗပေၚ်စုတ်ကဵုလဝ်ရောၚ် ဂွံတီရ။
တုဲပၠန် နကဵုညးအာတ်မိက်လဝ် တၞးလိက်ဖံၚ်ဗီုပြၚ် (၁၅) တံဝွံ ဇကုဒှ်ဒှ် နူကဵုဌာန်ပလံၚ်လိက်ဒှ်ဒှ် နူကဵုအီမေလ်ရုၚ်ကလုတ်ဒှ်ဒှ် ကာလကလေၚ်ပလံၚ်နၚ်မ္ဂး တၞးဆာဲပါတ်သပိုဒ်ဗၟာ အာယုက်ဟွံအိုတ်ဏီကဵု ဒၞာဲကေတ်အဆက်ဂွံမာန် ဌာန်ဒၟံၚ်၊ မဂၞန်ဖုၚ်၊ အဳမေလ်တံဂှ်လေဝ် သွက်ဂွံပံၚ်တောဲ စုတ်ဏာဂှ်ကီု လလောၚ်တြးလဝ်ရ။
ပြဟ်ဟ်ဏံ လ္တူရဲစိုပ်မံၚ်ဍုၚ်သေံတံဂှ်တှ်ေ ဗီုပြၚ်လဵု ကဵုမံၚ်ဇြဟတ်ဟရိုဟ်ကီုလေဝ် ညးတံကဵုမာဲဟွံသေၚ်ပုဟ် ဟီုဂးမံၚ်တံဂှ် ညးမကဵုမံၚ်အရီုဗၚ် ပရေၚ်သၟာကမၠောန်ဗၟာ စိုပ်မံၚ်ဍုၚ်သေံ ဥူအံၚ်ကျဝ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ဒှ်မံၚ် အလဵုအသဳ ညးဍုၚ်ကွာန်နွံပၟိက်ဟွံသေၚ်တုဲ ပြဟ်ဟ်ဏံ ကချေၚ်၊ ကယာ၊ ကရေၚ်၊ ချေၚ်၊ မန်၊ ဗမာ၊ ရခေၚ်၊ ယှာန် ကောန်ဍုၚ်အရၚ် စိုပ်မံၚ်ဍုၚ်သေံတံဂှ် သွက်ဂွံကဵုမာဲ အစဳဇန်ဟၟဲပုဟ်ဂှ် အဲဂွံတီလဝ်။ ဗီုလဵုရော ဟီုတှ်ေ အပ္ဍဲကဵု ပြဿနာဍုၚ် က္တဵုဒှ်ဇၞော်မံၚ်ဇြဟတ်တံဂှ် ပ္ဍဲပွိုၚ် ၅ သၞာံဏံ ဂွံဆဵုလဝ်ပ္ဍဲကဵုမဳဒဳယာ ဍုၚ်ဂၠးကဝ်ဂမၠိုၚ်ကီုတုဲ နကဵုညးတံ (ညးဍုၚ်ကွာန်စိုပ်မံၚ်သေံ) ဂှ် အလဵုအသဳညးတံ နွံပၟိက်ဟေၚ် မိက်ဂွံ ရုဲစှ်ပတိုန်မံၚ်။ ဟိုတ်ဒှ်သာ်ဂှ်ရ ပ္ဍဲအကာဲအရာဏံ ဗီုလဵု ကဵုမံၚ်ဇြဟတ်ဟရိုဟ်ကီုလေဝ် ခယျကေတ် ညးတံစုတ်ကဵုမာဲဟွံသေၚ်ပုဟ် အဲသ္ၚဳဂၠိပ်၊ ဆဂး အဲဗက်သၟာန် သၟတ်နွံမံၚ် ပ္ဍဲပွဳပွူတံဂှ်တှ်ေ ညိလေဝ်ဟွံဆေၚ်ကဵု ဍေံတံပုဟ်၊ ဍေံတံစိုတ်ဟွံလုပ်စပုဟ် ဟီုဂးမံၚ်တံဂှ် ဂွံမိၚ်လဝ်” သာ်ဝွံ ညးသ္ဂးရ။
နကဵုသၟဝ်သ္ဇိုၚ်သၞောဝ်ပရေၚ်အုပ်ဓုပ် ၂၀၀၈ ပ္ဍဲကဵုကၠောန်ကၠုၚ်လဝ် ပေါဲရုဲမာဲ ၂၀၁၀ ကဵု ၂၀၁၅ တေံဂှ်လေဝ် ကောန်ဍုၚ်ဗၟာစိုပ်မံၚ်ဍုၚ်မ္ၚးဗွဲမဂၠိုၚ်တံ သွက်ဂွံကဵုမာဲဒစးဒုၚ်မာန် အာတ်မိက်ကၠုၚ်လဝ်ကီုလေဝ် မုအရာမွဲသာ်မှ တၟေၚ်ကၠုၚ်ဟွံသေၚ်ရ။
ဗွဲကြဴ အခိၚ်အလဵုအသဳ ဗော် NLD တံ ကၠောန်ကဵုလဝ် ပေါဲရုဲမာဲ ၂၀၂၀ ဂှ် သွက်ကောန်ဍုၚ်ဗၟာ စိုပ်မံၚ် ဍုၚ်သအာၚ် တံ နကဵု တၞးလိက်ဖၚ်ဗီုပြၚ် (၁၅) စုတ်ထပေၚ်တၚ်နၚ်တုဲ ဂွံအခေါၚ် ကဵုမာဲဒစးဒုၚ်တံရ။
ဆဂး ပ္ဍဲကဵုပေါဲရုဲမာဲဂှ် ထ္ၜးဟိုတ် စရၚ်မာဲ မှာရာအာဂးတုဲ ပ္ဍဲသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန် နူကဵုသီဏာအဝဵုဂှ် အလုံဍုၚ်မွဲ ပၠန်ဂတးကညၚ်မံက်ကၠုၚ်တုဲ ပရေၚ်ဗတိုက်သရိုဟ် တၠအဝဵုပၞာန် ဒဵုကဵုရိုက်ကၞက်ပိုတ်အး က္တဵုဒှ်တိုန်လဝ်ရ။
မွဲလပါ်ပၠန်ဂှ် အတိုၚ်ပၟိက်စိုတ် က္ဍိုပ်သ္ကိုပ်ပၞာန်တံ ဗီုမိက်ဂွံကဵုဒှ် ဗဂေတ်ဖန်ဖက်မံၚ် သ္ဇိုၚ်သၞောဝ်ဥပဒေဂှ် ကံၚ်သဳပၞာန်၊ ကဝ်မယှေန်ပၞာန် နကဵုဗီုပြၚ်နာနာ ပံက်အလဵုအသဳတုဲ ပြဿနာပရေၚ်ဍုၚ်ကွာန်၊ ပရေၚ်ပၞာန်တံဂှ် နဒဒှ် ပၞော်တိတ် ညံၚ်ဂွံဒှ်ကၠောန်ပေါဲရုဲမာဲ ဖန်ဇန်မံၚ်ရ။
ပ္ဍဲအကာဲအရာဏံ ဟိုတ်နူကဝ်မယှေန်ပၞာန်တံ ဍဵုဍိုက်ရပ်ကၠေၚ် ကေုာံ ကော်ကေတ်မံၚ် အရာယိုက်ဝန်ပၞာန်တံတုဲ ဟိုတ်နူကဵုပရေၚ်ဂီုကၠီုဂှ် နဒဒှ် သၟာကမၠောန်ဆုဲပြံၚ် ဂြိပ်ပါဲအာကၠောန်မံၚ်ကမၠောန် ပ္ဍဲဍုၚ်မ္ၚး နူကဵုကောန်ဍုၚ်ဗၟာတံ သွက်သ္ဂောံဂွံ မာဲဒစးဒုၚ်မာန်ဂှ် ကဝ်မယှေန်ပၞာန်တံ ဂစာန်ကၠုၚ်မံၚ်ရ။
နကဵု ကောန်ဍုၚ်ဗၟာစိုပ်မံၚ် ဍုၚ်သအာၚ်တံဂှ်တှ်ေ သၟဝ်တဲကဝ်မယှေန်ပၞာန်တံ ဒးဆက်မံၚ်အယုက် မွဲသၞာံမွဲဝါ နွံမံၚ်တုဲ ညံၚ်သ္ဂောံဂွံ မာဲဒစးဒုၚ် ကဵုကၠုၚ်ဇြဟတ်ဟရိုဟ်မာန်ရောၚ် က္ဍိုပ်သ္ကိုပ်ကွးဘာတြေံ ကိုမေန်တိုဲတေတ် (ကိုမၚ်းသွေးသစ်) သ္ၚဳဂၠိပ်လဝ်ရ။
“ကောန်ဍုၚ်ဗမာစိုပ်မံၚ် ဍုၚ်သအာၚ်တံ ဒးကလေၚ်စဴဍုၚ် သၟဝ်ဍေံတံ (ကဝ်မယှေန်ပၞာန်) ဒးကလေၚ် လုပ်ဏောၚ်၊ ဆဂး ဟွံကလေၚ်စဴကီုလေဝ် မွဲသၞာံမွဲဝါ ပရေၚ်ဒးထပ် ဆက်အယုက်နွံမံၚ်။ ဟိုတ်ဂှ်ရ အကာဲအရာတံဏံ ဍေံတံတီမံၚ်တုဲ ဟွံကၠုၚ်ကဵုမာဲဒစးဒုၚ်ဂှ် ဟွံဂံၚ်မံၚ်ပုဟ် ဍေံတံကၠိုဟ်မံၚ်။ မွဲလပါ်ပၠန်ဂှ် ယဝ်ရ ဟွံကၠုၚ်ကဵု(ဆန္ဒမာဲ) တှ်ေ နကဵုပရေၚ်ဍုၚ်ကွာန် နွံမံၚ်အပ္ဍဲဗွိုၚ် စက်အာဏာဍေံတံ ဗီုကဵုဇြဟတ်ဟရိုဟ်ဂွံဂှ် ဍေံတံကဵုအာဇြဟတ်ဟရိုဟ် ဗီုပြၚ်နာနာသာ်မာန်ရောၚ်” သာ်ဝွံ သ္ဂးရ။
ဟိုတ်ဂှ်ရ သွက်ဂွံဒစဵုဒစးအာ ပေါဲရုဲမာဲအလီဏံဂှ် ညးသ္ကိုပ်သ္က အာမံၚ်က္ဍိုပ် ဇြဟတ်ပၠန်ဂတးတံဖအိုတ် သဳကၠဳအာညးသ္ကံတုဲ အစဳဇန်သွက်ဂွံဖတိုက်သရိုဟ်အာဂှ် နကဵုသၞောတ်စှ်ေစှ်ေ မွဲအဆံၚ်တုဲ မွဲအဆံၚ် ဒးထမံက်အာရုပ်ရဴရောၚ် ညးထံက်ထ္ၜးရ။
နကဵုသ္ကုတ် (၁) ပ္ဍဲရးဒေသဇၞော်ကဵု တွဵုရးသီုဖအိုတ် ၁၀၂ ပွိုၚ်ဍုၚ်တံဂှ် ကဝ်မယှေန်ပၞာန် ကၠောန်အာပေါဲအာရုဲမာဲရောၚ် လလောၚ်တြးလဝ်တုဲ အလုံဍုၚ်မွဲ ပ္ဍဲပွိုၚ်ဍုၚ် ၃၃၀ တံဂှ် ခုတ်စၟတ်လဝ် ဒေသဒၞာဲဆန္ဒမာဲတံရ။
ပ္ဍဲကဵုခုတ်စၟတ်လဝ် ဒၞာဲတိဍာ်ဒၞာဲဒေသဆန္ဒမာဲတံဂှ်ပၠန် ဒှ်မံၚ်ဒၞာဲဒေသ ဒပ်ကောန်ဍုၚ်အရၚ်ပၠန်ဂတးရပ်လွဟ်တံကဵု ဂကောံဇြဟတ်ပၠန်ဂတး ထပိုတ်ရိုဟ်ကၞက်သၞောတ်တၠအဝဵုပၞာန်တံလေဝ် ပါလုပ်မံၚ်ရောၚ် ဂွံတီရ။
ဟိုတ်ဂှ်ရ နကဵုဂကောံရပ်လွဟ် ဒေသမဆေၚ်စပ်တံ အပ္ဍဲကဵုထိၚ်ဒဝ်ကောပ်ကာဲလဝ် ဒေသတံဏံဝွံ သွက်ဂွံဒစဵုဒစးအာ ပေါဲရုဲမာဲကဝ်မယှေန်ဂှ်ကီု ပ္ဍဲကဵုဒၞာဲတိဍာ်ညးတံဂှ်လေဝ် ဟွံကဵုအခေါၚ်ကၠောန်ပုဟ် သာ်ဝွံ ဟီုပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media