ဘာအၚ်၊ အဝ်ဂတ် ၂၆
ပ္ဍဲတွဵုရးကရေၚ် ပွိုၚ်ဍုၚ်လ္ၚဵုတံဂှ် နူကဵုကဝ်မယှေန်ပါ်ပေါဲရုဲမာဲ သၟဝ်ကဝ်မယှေန်ပၞာန်ကဵု ဂကောံပရေၚ်အုပ်ဓုပ်တံ သ္ပသ္ကိုပ်သ္က ကော်ဘိက်ညးဍုၚ်ကွာန်ဂမၠိုၚ်တံတုဲ သွက်ပေါဲရုဲမာဲ ကၠောန်စမ်ၜတ်မံၚ် ပရေၚ်စုတ်မာဲနတဲကီု သီုကဵု ပရေၚ်ကဵုပညာမာဲတံ ကၠောန်သ္ပမံၚ်ရောၚ် ရိုဟ်ကၞက်ပရိုၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်ရ။
အကြာတ္ၚဲတံဏံ လ္တူဍုၚ် ဘာအၚ် ဒၞာဲအရာပ် ၁- ၂- ၄ တံဂှ် နူကဵုကဝ်မယှေန်ပါ်ပေါဲရုဲမာဲ ကဵု ဂကောံပရေၚ်အုပ်ဓုပ် ကဝ်မယှေန်ပၞာန်တံ ပံၚ်တောဲတုဲ စပ်ကဵု ပရေၚ်စက်ကဵုမာဲ၊ ဗီုပြင်ဂွံစုတ်မာဲနကဵုစက်တံဂှ် ကော်ဘိက်ညးဍုၚ်ကွာန်တံတုဲ သောၚ်ကလး လဝ်ရ။
တုဲပၠန် အရာပ် လ္တူဍုၚ်လိုၚ်ဗၠဲတံကဵု ကွာန်ဇိုၚ်ဍုၚ်တံ ဍုၚ်ပိုင်ကြုၚ်၊ ယှိုဲဂေါန်၊ ထဳလုၚ်၊ တာပံၚ်၊ ဒဝ်ဠာန် လပါ်ဒေသတံဏံကီုလေဝ် ဂကောံသၟဝ်ကဝ်မယှေန်ပၞာန်တံ ပါ်ဍိုပ်တုဲ စှ်ေမံၚ်အကြာညးဒေသတံ ကၠောန်ပေါဲဟီုတွံပရေၚ်ပေါဲရုဲမာဲကီု နတဲ ကဵုစုတ်စမ်မာဲတံကီု ဖန်ဖက်လဝ်ရောၚ် ဂွံတီရ။
ဗီုပြင် စက်ကဵုမာဲ ကၠောန်မံၚ်ကမၠောန်အဆံၚ်ၚ်တံကဵု တင်နၚ်နာနာ သွက်ညးဍုၚ်ကွာန်ဂမၠိုၚ် ထေက်ကဵုဒးတီလဝ်တံဂှ် ဂကောံသၟဝ်တဲ ကဝ်မယှေန်ပၞာန်တံ ကၠောန်သ္ပမံၚ် ပရေၚ်ဟီုတွံကဵုမံၚ်ပညာနာနာကီု နကဵုစက်ကဵုမာဲတံလေဝ် ညးတၠဆန္ဒမာဲတံ စမ်ၜတ်စုတ်ကဵုလဝ်မာဲ နတဲနဇိုၚ်ကီု လပါ်ကဝ်မယှေန်ပၞာန် ပတိတ်လဝ်ပရိုၚ်ရ။
ကဝ်မယှေန်ပၞာန်ဝွံ ပေါဲရုဲမာဲဂှ် ပါ်အာသ္ကုတ်ညးကဵုညး ကၠောန်ဗ္ဒျ်အာရောၚ် စဳဇန်လဝ်တုဲ ကၞောတ်သၞာံအိုတ် ဒဳဇြေမ်ပါ ၂၈ ဂှ်မ္ဂး ပ္ဍဲကဵုနေဗျဳတဝ်ကီု သီုကဵု ရးဒေသကဵု တွဵုးရသီုဖအိုတ် ဒၞာဲ ၁၀၂ ပွိုၚ်ဍုၚ်တံဂှ် စကၠောန်ဗ္ဒျ်အာ ပေါဲရုဲမာဲ သ္ကုတ်(၁) ရောၚ် ဖျေံလဝ်ဗီုနွံရ။
ပ္ဍဲကဵုကၠောန်ဗ္ဒျ်အာ ပေါဲရုဲမာဲ သ္ကုတ်(၁) ဏံ ပၞောဝ်အာကဵု ၁၀၂ ပွိုၚ်ဍုၚ်ဂှ်မ္ဂး အပ္ဍဲတွဵုရးကရေၚ် ဍုၚ်ဘာအၚ်၊ ဗြဝတဳ၊ တာန်တံၚ်ဂျဳ ပိဍုၚ်ဏံ ပါလုပ်မံၚ်ကီုတုဲ အကာဲအရာပြဟ်ဟ်ဏံမ္ဂး အပ္ဍဲကဵုဍုၚ်တံဏံ ပေါဲဗတိုက်ဟၟဲကီုလေဝ် ပါဲနူဍုၚ်ဘာအၚ်တုဲ လပါ်မ္ၚးဍုၚ် ၜါဍုၚ်တံဂှ် ပေါဲဗတိုက်ဆက်ဒှ်မၚ်ဖိုဟ်ရောၚ် ဂွံတီရ။
ပေါဲရုဲမာဲဗော်ဇဳဂးတုဲ ကဝ်မယှေန်ပၞာန် သွက်ဂွံကၠောန်အာလၟုဟ်ဏံဂှ် ညးဍုၚ်ကွာန် နွံမံၚ်ဒေသတံဏံ အာစုတ်ကဵုမာဲဟွံသေၚ်ပုဟ် သၟတ်နူကဵု လ္တူဍုၚ်ဘာအၚ်မွဲတၠ သ္ဂးရ။
တုဲပၠန် ပ္ဍဲကဵု ကဝ်မယှေန်ပၞာန် ကၠောန်အာပေါဲရုဲမာဲ သ္ကုတ် (၁) ဏံ ပ္ဍဲတွဵုရးကရေၚ်ဂှ် ဍုၚ်တာန်တံၚ်ဂျဳ သၟးဟွံက ဒၞာဲဒပ်ပၞာန်ဗၟာတံ ကောံဒက်ပတန်လဝ်ဍုၚ် ဍုၚ်ဒပ်ဗရေတ်နံၚ် (ဘုရၚ့်နောၚ်တပ်မြို့) လဝ် ပါမံၚ်ကီု ဂွံတီရ။
ပ္ဍဲကဵုတွဵုရးကရေၚ် ပွိုၚ်ဍုၚ်ဘာအၚ်ဂှ်တှ်ေ ပြဟ်ဟ်ဏံ ရဲကောန်ဗော် ဗျဳခိုၚ်ဖျို (ပြည်ခိုင်ဖြိုး) တံ အာစိုပ်ကွာန်လ္ၚိုလ္ၚဵုတုဲ သွက်ပေါဲရုဲမာဲ ဗီုပြင် စှ်ေတံၚ်ဂြဲစန်ဒက်မာဲကီု အာဆဵုဂဗကဵု မိမဍုၚ်ကွာန်တံနွံမံၚ် ညးဒေသတံဟီုလဴကဵုလဝ်ရ။
ပရိုၚ်-သြၚ်လောန်တိုၚ်မ်
Photo – MOI