နေဗျဳတဝ်၊ အဝ်ဂတ် ၂၆
ပံၚ်တောဲအာ ကုမဟာမိတ် ကောန်ဍုၚ်အရၚ်တံကီု သီုကဵု ဇြဟတ်ပၠန်ဂတးတံတုဲ အတိုၚ်မူပၞောန် ဂၠံၚ်တရဴပရေၚ်ဍုၚ်ကွာန်တမ်မူလတေံ ဆက်ဒတူဟလိုၚ် ဆက်ကၠောန်အာ ပၠန်ဂတးပြံၚ်သၠာဲသၞောတ်ရောၚ် အလဵုအသဳညဳသၟဟ်ပရေၚ်ကောန်ဂကူ NUG လလောၚ်ပတိတ်လဝ် သဘဴလစိုတ်စွံ ညးတံရ။
ပ္ဍဲကဵု ကၞောတ်သၞာံအိုတ်ဏံ နကဵုဂကောံပၞာန် စပ်ကဵု သွက်ဂွံကၠောန်အာ ပေါဲရုဲမာဲအလီ ဟွံလုပ်သၞောဝ်ဂှ်တုဲ သဘဴလစိုတ်စွံ အလဵုအသဳညဳသၟဟ်ကောန်ဂကူ NUG လလောၚ်ပတိတ် ကဵုလဝ်သမ္တီ ပ္ဍဲကဵုအဝ်ဂတ် ၂၄ တေံရ။
NUG ဝွံ နကဵု ပရေၚ်ဍုၚ်ကွာန်ခၠန်မတ် ညံၚ်ရဲဒပ်ပၞာန်ကဝ်မယှေန် ရပ်ဇုက်ပလှ်ေထ္ၜးစလဝ် ဗွဲလ္တူကျာဟွံသေၚ် နကဵုဇြဟတ်ဟရိုဟ် ညးဍုၚ်ကွာန်ဂမၠိုၚ်တံ ပါလုပ်အာလၟေၚ်ပရေၚ်ကမၠောန် နဲကဲဒဳမဝ်ကရေသဳဟေၚ် ကဵုအာသ္ဂုတ်သွာတ် သွက်အနာဂတ် ဍုၚ်ဗမာဍာံဍာံရောၚ် ပတှ်ေကေတ်လဝ် သ္ဂးရ။
ဟိုတ်ဂှ်ရ နကဵုသဘၚ်သဳကၠဳ ဒက်ပတန်ဍုၚ် သ္ပဒတန် သ္ဇိုၚ်ဇၞောဝ်ဥပဒေ ဖိတ်ဒရေဝ်ဒဳမဝ်ကရေသဳဂှ် ကၠောန်အာပေါဲထံက်ဂလာန် ဆန္ဒညးဍုၚ်ကွာန်တံတုဲ သီုကဵု ပွမသ္ပဒတန်ခၞံဗ္ဒျ်အာ ကေုာံ ကၠောန်အာပေါဲရုဲမာဲကီု အတိုၚ်မူပၞောန်ဏံ ညးတံဒတူလိုၚ်အာရောၚ် သ္ဂးရ။
မူပၞောန်ဏံဝွံ ပ္ဍဲကဵု ပဋိဉာဥ် ဖိတ်ဒရေဝ်ဒဳမဝ်ကရေသဳ အခန် (၃) ဗီုတိထ္ၜးဂၠံၚ်ပရေၚ်ဍုၚ်ကွာန် လၟေၚ်အဆံၚ် (၁၁) ခၞံဗ္ဒျ်လဝ်ဂှ် ပံၚ်တောဲအာကု မဟာမိတ်တံတုဲ ဆက်ကၠောန်အာ ပၠန်ဂတးပြံၚ်သၠာဲသၞောတ်ရောၚ် NUG ကဵုလဝ် သမ္တီရ။
တုဲပၠန် နူကဵု ဂကောံဗဟဵု ပရေၚ်ဗတိုက်သရိုဟ်ပကီုပရာတ် NUG ဝွံ ကုဂကောံပၞာန်ကီု သၟဝ်တဲဍေံတံ ဂကောံဒုၚ်လဝ်ယၟု ကဝ်မယှေန်ပေါဲရုဲမာဲကၟိန်ဍုၚ်ဂှ်ကီု နဒဒှ် ဂကောံပကီုပရာတ်ဟေၚ် လလောၚ်တြးလဝ်တုဲတုဲရောၚ် ပ္ဍဲ လိက်လလောၚ်တြး NUG ထမံက်ပတိတ်လဝ်ရ။
ဟိုတ်ဂှ်ရ ပ္ဍဲဒေသ အလဵုအသဳပရေၚ်ညဳသၟဟ်ကောန်ဂကူ ထိင်ကြာပ်လဝ်တံ ပေါဲရုဲမာဲအလီ ဟွံလုပ်သၞောဝ်ဂှ် ဂစာန်ဍိုက်လုပ်ၜေတ်ကၠောန် လ္တူညးဍုၚ်ကွာန်တံ နကဵုဇြဟတ်ဟရိုဟ် ဖန်ဇန်အာနွံမ္ဂး နကဵုဥပဒေ ကေတ်အရေဝ် ဗွဲမစိုပ်တရဴဏောၚ် သ္ဂးရ။
ဂကောံပၞာန်တံဝွံ လ္တူညးဍုၚ်ကွာန်ကောန်ဍုၚ်ဗၟာတံဂှ် နူကဵုခေတ်အဆက်ဆက်တေံရ စကာကၠုၚ် နဲကဲဂၠံၚ်ဍာန်စုၚ်ၚ် ဍဵုဍိုက်ကြီုဓဇန်နာနာသာ်ကီု ပရေၚ်ဂစိုတ်ကဠက်ဂကူတံကီု မပ္တံကဵု အမှုရာဇဝတ်ပၞာန်နာနာ လုလောန်ၜက်ၜေတ်ကၠုၚ်လဝ်နွံတုဲ နူကဵုဂကောံဂၠးကဝ်တံ နွံမံၚ်ပၟိက်ကဵု ကောန်အမှုရာဇဝတ်ပၞာန်တံဏံရောၚ် ဂွံတီရ။
တုပ်ကဵုသာ်ဏံဂှ်ကီု ပ္ဍဲကာလ ပၠံၚ်ကေတ်လဝ်အဝဵု ညးဍုၚ်ကွာန် နကဵုဗဗွဲဓဝ်ဟွံသေၚ် ပ္ဍဲသၞာံ ၂၀၂၁ ဂိတုဖေဖဝ်ဝါရဳ အခိၚ်ပၠန်ဂတးကညၚ် စကၠုၚ်လဝ်ဂှ်လေဝ် လ္တူညးဍုၚ်ကွာန်ဂမၠိုၚ် ဂကောံပၞာန်ဏံ ဆက်လုလောန်ၜက်ၜေတ်လဝ် အမှုရာဇဝတ်ပၞာန် နွံမံၚ်ဗွဲမဂၠိုၚ်ပၠန် NUG သ္ဂးရ။
ပြဟ်ဟ်ဏံ စနူအဝ်ဂတ်တုဲ ဂကောံပၞာန် ပြံၚ်သၠာဲဏာယၟုတၟိကဵု ဗီုပြၚ်ဒက်ပတန်တၟိတုဲ သွက်ဂွံဆက်ကၠောန်အာ ပေါဲရုဲမာဲအလီမာန် အတိုၚ်ရန်တၟံနွံနွံ နကဵုၜၚ်ကျာဖျေံမံၚ်ဗုမ်၊ ပန်ကၠဟ်ကဵုလွဟ်ဇၞော်၊ ထပက်ကရောၚ်ပၞာန် ပတဝ်လဝ်ကဵု ညးဍုၚ်ကွာန်တံတုဲ ဗတိုက်မံၚ်တံကီု ဆက်ကၠောန်သ္ပမံၚ် အမှုရာဇဝတ်ပၞာန် ဟပဵုတိုန်အဆ နွံရ။
ပေါဲရုဲမာဲအလီ ဟွံလုပ်သၞောဝ်မွဲ ထံက်လဝ်ကဵု သေနာတ်၊ ယာဖျာံလဝ်ကဵုမြတုဲ ဂစာန်ကၠောန်မံၚ်ဏံ ညးဍုၚ်ကွာန် အပ္ဍဲဍုၚ် မ္ၚးဍုၚ်တံ သီုဖအိုတ်တံ ၜိုတ်သ္ပမာန် ဆက်ဒစဵုဒစး တဝ်စၞေဟ်အာပၠန်ဏောၚ်ဂှ် ပတေဟ်ကေတ်လဝ်ရ သာ်ဝွံ NUG သ္ဂးရ။
နကဵု အလဵုအသဳ ဍုၚ်ဂၠးကဝ်တံကီု သီုကဵုမဟာမိတ်ဒဳမဝ်ကရေသဳတံကီု ဒတူလိုၚ်မွဲစွံကု ညးဍုၚ်ကွာန်ကောန်ဍုၚ်ဗၟာတံတုဲ ညံၚ်ဂွံဒစဵုဒစးအာ ပေါဲရုဲမာဲအလီ ဂကောံပၞာန်တုဲ သွက်ဂွံကလေၚ်ဂွံ ပရေၚ်ဒဳမဝ်ကရေသဳ ဍိုက်ပေၚ်ကဵု အခေါၚ်အရာမၞိဟ်တံကဵု ပရေၚ်ၜိုဟ်လလမ် တန်ကြန်ဗိုန်ဇၟအ်ဍာ်ဇမၠိၚ်မာန် ဂိုတ်ဂစာန်တုဲ ထပ်ဗပေၚ်အာကဵု ဇြဟတ်ညိဂှ် NUG ဖတိုက်ဖအောဝ်ဏာလဝ်ရ။
ပရိုၚ်-သြၚ်လောန်တိုၚ်မ်
Photo – NUG