ဖာပန်၊ အဝ်ဂတ် ၂၇
ပေါဲရုဲမာဲ ကဝ်မယှေန်ပၞာန်သီအဝဵု ကၠောန်အာဏံ ညးပံၚ်တောဲပါလုပ်မံၚ်တံဂှ် ဒၞာဲဒးရးဂပ်ဝ် သွက်ဂွံကော်ထိင်အာကီု ဖာပ်ပတိတ်ထောံ နူဒေသတံကီု ကေတ်အာအရေဝ်ပိုတ်တ်ရောၚ် ခရိုင်မူတြဝ် KNU မဟာဒပ် ၅ ပတိတ်လဝ် လိက်လလောၚ်တြးရ။
လ္တူကဝ်မယှေန်ပၞာန်သီအဝဵု သွက်ဂွံကၠောန်အာပေါဲရုဲမာဲဏံတုဲ စပ်ကဵုတင်ဒတူလိုၚ် လစွံစိုတ်တံဂှ် ခရိုင်မူတြဝ် KNU မဟာဒပ် ၅ ပတိတ်လဝ် လိက်လလောၚ်တြး ပ္ဍဲအဝ်ဂတ် ၂၆ ဂှ်ရ။
ပေါဲရုဲမာဲကဝ်မယှေန်ပၞာန် ကၠောန်ဏံဂှ် ကေတ်တင်တုပ်စိုတ်ညးဂမၠိုၚ် ဒုင်လဝ်သ္ဇိုၚ်ကဵု ပေါဲသဳကၠဳပရေၚ်ဍုၚ်ကွာန်တုဲ ကၠောန်ဗ္ဒျ်အာ ပေါဲရုဲမာဲဏံဟွံသေၚ်ကီု ပေါဲရုဲမာဲဒုၚ်သ္ဇိုၚ်ကဵု သ္ဇိုၚ်သၞောဝ်ဥပဒေ ဖိတ်ဒရေဝ်ဒဳမဝ်ကရေသဳ ဟွံသေၚ်ကီုတုဲ ပေါဲရုဲမာဲဏံ ဗဒေါအ် ပဋိပက္ခပရေၚ်ဍုၚ်ကွာန် ပကတိဏံ မာန်ဟွံမာန်သေၚ်ပုဟ်ဂှ် ချူလဝ် ပ္ဍဲလိက်လလောၚ်တြးဂှ်ရ။
အတိုၚ်ပၟိက်စိုတ် ကဝ်မယှေန်ပၞာန် မိက်ဂွံကဵုဒှ်ဂှ် ဖန်ကၠောန်အာ ပေါဲရုဲမာဲရဒှ်မံၚ်တုဲ ညးမပါလုပ်ထေက်တံ မပ္တံကဵု ဂကောံပရေၚ်ဍုၚ်ကွာန်ဂမၠိုၚ်၊ ဂကောံကောန်ဍုၚ်အရၚ်ပၠန်ဂတး သီုဖအိုတ်တံကဵု ညးဍုၚ်ကွာန်အလုံသီုဖအိုတ် ပါလုပ်မာန် ပ္ဍဲပေါဲရုဲမာဲဏံ ဟွံသေၚ်ပုဟ်ဂှ် မဟာဒပ် ၅ သ္ဂးလဝ်ရ။
တုဲပၠန် ပေါဲရုဲမာဲဂှ် နကဵုပရေၚ်ဓရ်ဍာံနွံနွံ ကၠောန်ဗ္ဒျ်အာ ဟွံသေၚ်တုဲ သွက်သ္ကိုပ်ပၞာန်ဇၞော် ကဝ်မယှေန်ပၞာန်တံကဵု ရဲဗွိုၚ်ဍေံတံကီု၊ ဗော်ထံက်ဂလာန်ဒပ်ပၞာန်ဍေံတံဟေၚ် ဖဵုဂုဏ်ဂွံဒုၚ်စသိုၚ်မာန်ဒှ်မံၚ်တုဲ သွက်ကောန်ဍုၚ်အရၚ်တံကဵု ညးဍုၚ်ကွာန်တံဂှ် မုဂုဏ်ဖဵုမှ ကလိဂွံမာန်ဟွံသေၚ်ရောၚ် သ္ဂးလဝ်ရ။
နကဵုကဝ်မယှေန်ပၞာန် ကၠောန်ပေါဲရုဲမာဲဟီုဂှ် ပရေၚ်သီအဝဵုဍေံတံ ညံၚ်ဂွံလုပ်အာဗဗွဲသၞောဝ်ကဵု အာယုက်သၞောတ်တၠအဝဵုပၞာန် သွက်ဂွံဂၠိၚ်အာရ ဒှ်မံၚ်တုဲ ညိလေဝ် ဒုင်တဲသ္ပကဵုစၟတ်သမ္တီဟွံမာန်ပုဟ်ဂှ် ခရိုၚ်မူတြဝ် KNU မဟာဒပ် ၅ ဟီုပတိတ်လဝ်ရ။
စပ်ကဵုပရေၚ်တံဏံတုဲ ပ္ဍဲခရိုၚ်မူတြဝ် တိဍာ်မဟာဒပ် ၅ ဏံ ညးဍုၚ်ကွာန်တံကီု ဂကောံပၠန်ဂတးရပ်လွဟ်ဂမၠိုၚ်၊ ဂကောံမှာဇန်နာနာ နကဵုက္ဍိုပ်သ္ကိုပ်ဘာသာတံကီုဂှ် ပ္ဍဲကဵုကဝ်မယှေန်ပၞာန် ကၠောန်အာပေါဲရုဲမာဲ မွဲလပါ်ဓဝ်ဏံ နကဵုတိုက်ရိုက်ဒှ်ဒှ် မွဲနဲမွဲဗီုဒှ်ဒှ် ညိလေဝ် ညံၚ်ဟွံဂွံပံၚ်တောဲ ပါလုပ်အာဂှ် ခရိုၚ်မူတြဝ် KNU မဟာဒပ် ၅ လလောၚ်တြး ကဵုဏာသမ္တီရ။
စပ်ကဵု ကဝ်မယှေန်ပၞာန် ကၠောန်အာပေါဲရုဲမာဲတုဲ အတိုၚ်တင်လလောၚ်တြး ခရိုၚ်မူတြဝ် မဟာဒပ် ၅ ပတိတ်လဝ်ဏံ ယဝ်ရဟွံဒဂေတ်ဗက်အာမ္ဂး ယြဴပူဂဵုလဵုဟွံဟီု ကော်တုဲ ကဵုအာသတိပညာကီု ထိၚ်ဒဝ်စွံအာ ဒၞာဲဂပ်ဝ်ဒးရးဂှ်ကီု ကဵုဒဏ်ထဍေၚ်ပတိတ်ဏာ မ္ၚးဒေသ မဟာဒပ် ၅ ဂှ်ကီု ကေတ်အာအရေဝ်ပေၚ်ၚ်ဏောၚ် ဂွံတီနူ လိက်လလောၚ်တြးဂှ်ရ။
ပရိုၚ်-သြၚ်လောန်တိုၚ်မ်
Photo – MOI