ဍာ်ဗု၊ အဝ်ဂတ် ၂၇
ပ္ဍဲရးတနၚ်သဳ ပွိုၚ်ဍုၚ်ဍာ်ဗု ဒၞာဲသ္ကုတ်ဂၠံၚ် ဍာ်ဗု-ကလိၚ်အံၚ်ဂှ် အကြာၜါ်လပါ် ပေါဲဗတိုက်ဆက်က်ဒှ်မံၚ်တုဲ သွက်ရဲပါဲဒဴဘဲပၞာန် ၄၀၀၀ ပြၚ်တံ ပြဟ်ဟ်ဏံ နွံမံၚ်ပၟိက်ကဵု အထံက်အပၚ်ဇွောံမ ကာတၟေၚ်ရောၚ် တမ်ရိုဟ်ကၞက်ပရိုၚ်ဗလးတိတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုအဝ်ဂတ် ၁၇ တေံ ဒပ်ကဝ်မယှေန်ပၞာန်တံ နကဵုဇြဟတ်ပေၚ်ၚ် ဟိုတ်နူထပက်ကၠုၚ်ကရောၚ်ပၞာန် ဒၞာဲသ္ကုတ်ဂၠံၚ် ဍာ်ဗု-ကလိၚ်အံၚ်ဂှ်ရ ကုဒပ်ပံၚ်တောဲ မဟာမိတ်ပၠန်ဂတးတံ ပေါဲဗတိုက်ၜါလပါ် ဒှ်ကၠုၚ်မံၚ် အရိုဟ်ဟ်တ္ၚဲရ။
ဟိုတ်နူကဵု ပေါဲဗတိုက်တံဏံတုဲ ကအ်လှိုၚ်၊ မယာန်ချဝ်၊ ၆၀ တိုၚ်၊ သာယာမန်၊ ကွာန်ကျာ်ပိတံကီု သီုဖအိုတ် ညးဒေသ ၜိုတ် ၈ ကွာန် မၞိဟ် ၄၀၀၀ ပြၚ်တံ ထောံသ္ၚိဌာန်တုဲ ဒၞာဲညးတံဗၠးဘဲမာန် ဂြိပ်ဒဴပါဲအာလဝ်နွံ ဂွံပရိုၚ်ရ။
ညးဍုၚ်ကွာန် ပါဲမံၚ်ဘဲပၞာန်တံ ဟိုတ်နူတ္ၚဲဂၠိၚ်တိုန်ကၠုၚ်တုဲ နွံမံၚ်ပၟိက်ကဵု အရီုဗၚ် စၞစဇွောံမနာနာသာ်ကီုလေဝ် ဟိုတ်နူပေါဲဗတိုက် ၜါလပါ် ဒှ်မံၚ်တုဲ ညးကၠုၚ်ကဵုအရီုဗၚ်တံ ဟၟဲလးလးပုဟ် သာ်ဝွံ သ္ဂးရ။
ဒဵုကဵု အဝ်ဂတ် ၂၅ ဏံ အကြာဒပ်ၜါလပါ ပေါဲဗတိုက်ဆက်ဒှ်ကၠုၚ်မံၚ်တုဲ ပ္ဍဲပွိုၚ်မွဲတ္ၚဲမ္ဂး အောန်အိုတ်မွဲအလန် ဒဵုကဵုပိအလန် ပေါဲဗတိုက်ဒှ်ကၠုၚ်လဝ် သ္ဂးရ။
ဟိုတ်နူပေါဲဗတိုက်ၜါလပါ်ဏံတုဲ ညးအာမံၚ်တရဴ နကဵုကွဳစက် ပ္ဍဲကဵုသ္ကုတ်ဂၠံၚ် ဍာ်ဗု-ကလိၚ်အံၚ်တံဂှ် မွဲဏှမွဲဏှ ဂၠံၚ်မာတ်အာလဝ်နွံကီုလေဝ် ပေါဲဗတိုက်တုဲမ္ဂး အတိုၚ်ဗီုတြေံ ကလေၚ်ဆက်အာကၠုၚ်တရဴမာန်ပၠန်ဂှ် ညးဒေသတံ ဟီုလဴတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – CJ