မတ်မလီု၊ အဝ်ဂတ် ၂၇
ပ္ဍဲကဵုတွဵုရးမန် ပေါဲရုဲမာဲ ကဝ်မယှေန်သီအဝဵုပၞာန် ကၠောန်အာဏံ ဗော်ပရေၚ်ဍုၚ်ကွာန် သွက်ဂွံလုပ်ပြိုၚ်ဗွဲမဂၠိုၚ်တံ ညံၚ်သ္ဂောံဂွံအလံၚ်ညးစၞး ဟွံလောဲသွာဒှ်မံၚ်တုဲ ဗက်ဂၠာဲမံၚ်အိုတ်အစောန်ရဂှ် ညးတာလျိုၚ်ဗော်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကဝ်မယှေန်ပၞာန်သီအဝဵုဝွံ ပ္ဍဲဒဳဇြေမ်ပါ ၂၈ ဂှ် ကၠောန်အာပေါဲရုဲမာဲ သ္ကုတ် (၁) ရောၚ် လလောၚ်တြးလဝ်တုဲ နကဵုဗော်ပရေၚ်ဍုၚ်ကွာန်တံလေဝ် သွက်ဂွံစပၠုပ်ပတိုန်စရၚ် ယၟုအလံၚ်ညးစၞး ကုဒၞာဲစၠတ်ထဝ်အဆံၚ်ၚ်တံဂှ် ခုတ်စၟတ်လဝ်ကဵု ဂိတုသိပ်တေမ်ပါ ၈ တေံရ။
ကဝ်မယှေန်ပေါဲရုဲမာဲကၟိန်ဍုၚ် UEC ကဝ်မယှေန်ပၞာန် ခုတ်စၟတ်ကဵုလဝ် တ္ၚဲသွက်ဂွံစပၠုပ်စရၚ် အလံၚ်ညးစၞးတံဂှ်တုဲ ဗော်လုပ်ပြိုၚ်မာဲ နွံမံၚ်ဒေသညးကဵုညးတံဂှ် သွက်အလံၚ်အမာတ်ညးစၞးညးတံ ညံၚ်သ္ဂောံဂွံမာန် နဲလဵုဒှ်ဒှ် ဒးဗက်ဂၠာဲမံၚ် အိုတ်အစောန်ရ။
ပ္ဍဲကဵုအရာဂၠာဲအလံၚ်ညးစၞးတံဝွံ အကာဲအရာပရေၚ်ဍုၚ်ကွာန်လၟုဟ်၊ စၟတ်လဝ်တ္ၚဲ ဒးဟပၠုပ်စရၚ် အလံၚ်ညးစၞးတံဂှ်ကီု အခက်အခုဲဗွဲမဂၠိုၚ် နွံမံၚ်စုၚ်ရောၚ် ဗော်ညးဍုၚ်ကွာန် (ပြည်သူ့ပါတီ) ညးတာလျိုၚ် တွဵုရးမန် ဥူအံၚ်ကိုဝေန်တာန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲကဵုဗက်ဂၠာဲ အလံၚ်ညးစၞးဂှ် အခက်အခုဲ နွံမံၚ်ဇဳဒိုဟ်နာနာသာ်၊ အကာဲအရာပရေၚ်ဍုၚ်ကွာန် လၟုဟ်ဏံကီု မွဲပၠန်ဂှ် သွက်ဂွံဂၠာဲ အလံၚ်ညးစၞး စၟတ်ကဵုလဝ်အခိၚ်ဂှ် နကဵုဗော်ပိုဲ ဒစးဒုၚ်ပလေဝ်ပလေတ်လဝ်အောန်မံၚ်တုဲ အခက်အခုဲနွံမံၚ်၊ ဗော်ပိုဲတံ လၟိဟ်ညံၚ်ဂွံပေၚ်ဖ္ဍိုက် အခိၚ်ဂစာန်ဗက်ဂၠာဲမံၚ်ဏံ မၞိဟ်ခိုဟ်ဟ်လေဝ် ညံၚ်သ္ဂောံဂွံ မာန်ကီု မၞိဟ်ညးဂမၠိုၚ် ရှ်ေသှ်ေတံလေဝ် ညံၚ်ဂွံပါလုပ်မာန်ကီု နကဵုတင်တၞဟ်ဟ်တှ်ေ နကဵုဗော်ဇၞော် မွဲမွဲ ညံၚ်ဂွံလုပ်စေဝ်ပၞောန် နူတမ်မူလတေံ ဒးဂစာန်ကၠုၚ်လဝ်နွံမံၚ်တုဲ ပိုဲဒးဗက်ဂၠာဲမၞိဟ် ဒှ်အာဝါတ်ဂါတ် ညိညနွံ” သာ်ဝွံ သ္ဂးရ။
တုဲပၠန် နူကဵု ကဝ်မယှေန်ပေါဲရုဲမာဲကၟိန်ဍုၚ် လလောၚ်ပတိတ်လဝ် သွက်ဂွံပတိုန်စရၚ် အလံၚ်ညးစၞးတံဂှ် အခိင်ကြပ်မံၚ်ဗွဲမလောန်တုဲ အတိုၚ်ဗီုပြၚ်ဗော်ဖျေံလဝ် စရာဲဍာ်ဒကေဝ်ညံၚ်ဂွံပေၚ် ဒးဗက်ဂၠာဲမံၚ်ဂှ်လေဝ် ဒှ်အခက်အခုဲ ဗွဲမလောန် ညးဆက်ဟီုရ။
ပ္ဍဲအရာဂၠာဲအလံၚ်ညးစၞးဝွံ စရာဲဍာ်ဒကေဝ် ဥပဒေ စၟတ်လဝ်တံဂှ် စွံလဝ်ကၠာ မၞိဟ်ဗော်နွံပၟိက်တံ ညံၚ်ဂွံပါလုပ်အာ ချပ်တုဲဒးဖန်ကၠောန်အာမံၚ်ရောၚ် ညးအခေါၚ်ဟီုဂးနွံ ဗော်ညဳသၟဟ်မန် နာဲတာန်ယှိုဲ ဟီုရ။
“သွက်ဂွံရုဲစှ် အလံၚ်ညးစၞးဂှ် အဓိက ပိုဲပလေဝ်ပလေတ်စလဝ်နွံမံၚ်၊ လၟုဟ် သၞောတ်ၜါဂကူဟီုတှ်ေ ပိုဲဗီုလဵိုရုဲစှ်အာရော၊ တုဲပၠန် စရာဲဍာ်ဒကေဝ် ညးစၞးတံဏံပၠန်၊ အဓိက စရာဲဍာ်ဒကေဝ် ဥပဒေ စၟတ်လဝ်ဂှ် စွံလဝ်ကၠာ ဗီုပြၚ် ဗော်ပိုဲနွံပၟိက်ဂှ်ရုဲဏာ ၊ ဖန်ဇန်မံၚ် ဗီုပြၚ်ရုဲစှ်ဖိုဟ်ရ” သာ်ဝွံသ္ဂးရ။
ပေါဲရုဲမာဲကဝ်မယှေန်ပၞာန် ကၠောန်အာဏံ ဗော်လုပ်ပြိုၚ် ဒၞာဲကဵုဒေသ ဗွဲမဂၠိုၚ်တံဝွံ စရာဲဍာ်ဒကေဝ် အလံၚ်ညးစၞး ကိတ်ညဳကဵု ဗော်ညးတံ ခုတ်စၟတ်လဝ်တံ ညံၚ်ဂွံဂွံမာန် ဆက်ဂၠာဲမံၚ်ဖိုဟ်တုဲ ပရေၚ်ညးတံ ကော်ဘိက်လဝ်ဂှ် မၞိဟ်ဗွဲမအောန်တံရ ဒုၚ်လဝ်တဲဏီ ဂွံတီရ။
ပ္ဍဲအရာဂၠာဲအလံၚ်ညးစၞး ခက်ခုဲမံၚ်ဗီုဏံဂှ်တှ်ေ ဟိုတ်နူတၚ်ဒုၚ်လျိုၚ် ပရေၚ်ဂီုကၠီုဟၟဲကီု လ္တူပေါဲရုဲမာဲ ကဝ်မယှေန်ပၞာန်ဂှ် ဂလာန်ပတေဟ်ဟၟဲမံၚ်ကီု အလဵုအသဳမံက်တိုန်နူဏံဂှ် အတိုၚ်ကဝ်မယှေန်ပၞာန်ကဵုလှ်ေ အလဵုအသဳကောန်ရုပ်ပလှ်ေမွဲရ ဒှ်မံၚ်တုဲ ညံၚ်ဟွံဒးဒုၚ်ဝၚ်ဂှ် ပါဲဓလေတ်မံၚ်လေဝ်ဒှ်မာန်ရောၚ် ဟီုဂးမံၚ်အိုတ်ရ။
ၜိုန်ဂှ်လေဝ် ညးဂမၠိုၚ်တီလဝ် ဗော်ပျဳခိုၚ်ဖျို ဗော်ခယံက်ဒပ်ပၞာန်ဂှ်တှ်ေ သွက်ဂွံပတိုန်စရၚ်အလံၚ်ညးစၞး ပ္ဍဲကဵုညးတံ မၞိဟ်ဍိုက်ပေၚ်မံၚ်ယျဏောၚ်ဂှ် ညးကြပ်ကဵုဗော်ညးတံ ဟီုရ။
မွဲလပါ်ဂှ်ပၠန် နကဵု ကဝ်မယှေန်ပေါဲရုဲမာဲကၟိန်ဍုၚ် UEC ကဝ်မယှေန်ပၞာန်ဂှ်တှ်ေ အလုံတွဵုးရးမန် ၁၀ ပွိုၚ်ဍုၚ် ဒၞာဲသီုဖအိုတ်ဂှ် ခုတ်စၟတ်လဝ် ဒၞာဲဒေသဆန္ဒမာဲတံတုဲ အပ္ဍဲဏံ ကျာ်ထဝ်၊ သဓီု၊ မတ်မလီု၊ ၜါသွာၚ်၊ ကျာ်မြဟ်တံဂှ် နကဵု ပေါဲရုဲမာဲသ္ကုတ်(၁) သွက်ဂွံကၠောန်ဗ္ဒျ်အာ စဳဇန်လဝ်ရ။
ပ္ဍဲတွဵုရးမန် ပေါဲရုဲမာဲကဝ်မယှေန်ပၞာန် ကၠောန်အာဏံဂှ်တှ်ေ ဗော်ပျဳခိုၚ်ဖျို၊ ဗော်ညးဍုၚ်ကွာန်၊ ဗော်ပြည်သူ့ရှေ့ဆောၚ်ပါတီ၊ ဗော်သေံ (ကၠဗု)၊ ဗော်ညဳသၟဟ်မန်၊ ဗော်ညးဗြဴ(မန်) တံကဵု ဗော်လ္ၚဵုလ္ၚဵုကြပ်မံၚ်ကဵု ကဝ်မယှေန်ပၞာန်တံ သွက်ဂွံလုပ်ပြိုၚ်အာ နွံရ။
ပရိုၚ်-သြၚ်လောန်တိုၚ်မ်
Photo – Social Media