တယိတ်ချံၚ်၊ အဝ်ဂတ် ၂၈
ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်အာ ပ္ဍဲရးတနၚ်သဳ ပွိုၚ်ဍုၚ်တယိတ်ချံၚ်ဂှ်ရ ကွာန်ပိကွာန် သ္ၚိ ၇၀ မပြၚ် ဒဒုၚ်စံၚ်တုဲ ညးဒေသကောန်ကွာန်ၜါတၠ ဒးဒုၚ်ဂစိုတ်ဏာလဝ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူအဝ်ဂတ် ၁၄ တေံဂှ် ဒပ်ကဝ်မယှေန်ပၞာန် ဍိုက်ကဵုဇြဟတ်ပေၚ်ၚ်တုဲ ထပက်လဝ်ကရောၚ်ပၞာန် ပ္ဍဲပွိုၚ်ဍုၚ် တယိတ်ချံၚ် ကွာန်ဥတ္တူ၊ သဝ်ဖျာကဵု မိုယှိုဲကုၚ်တံဂှ် ဒှ်ပေါဲဗတိုက်ကဵု ဒပ်ပၠန်ဂတးတံရ။
အပ္ဍဲပေါဲဗတိုက်တံဏံ ဟိုတ်နူ ဒပ်ကဝ်မယှေန်ပၞာန်တံ ဒးဘဲဂိအာဂှ်ရ ပ္ဍဲကွာန်သဝ်ဖျာဂှ် သ္ၚိ ၅၀ မပြၚ်၊ ကွာန်မိုယှိုဲကုၚ်ဂှ် သ္ၚိ ကရပ် ၂၀ မ၊ ကွာန်ဥတ္တူဂှ် သ္ၚိဟွံအောန်နူ ၜါမဟွံက ဒးဒုၚ်စံၚ်ပလီုဏာရ။
တုဲပၠန် ပ္ဍဲကွာန် မိုယှိုဲကုၚ် ကရပ်ဘာလကျာ်ကဵု ဘာဗတောန်လိက်ဂှ် ဇွညးတြုံအယုက် ၅၀ ပြၚ်ၜါတၠ အခိၚ် ကရောၚ်ပၞာန် တိတ်အာဂှ် ကလေၚ်ဆဵုညာတ်လဝ်ရ။
ကရောၚ်ပၞာန်တိတ်အာတုဲ ရဲဒဴပၞာန်ဗွဲမဂၠိုၚ်တံ စနူအဝ်ဂတ် ၂၇ ဂှ် ကလေၚ်စဴကၠုၚ်ကွာန် မံၚ်ဒၟံၚ်အိုတ်ရဂှ် ညးဒေသတံ ဟီုလဴရ။
ဟိုတ်နူပေါဲဗတိုက် တယိတ်ချံၚ်ဂှ် ရဲကွာန်ဥတ္တူ၊ သဝ်ဖျာကဵု မိုယှိုဲကုၚ်တံ ညးဒေသ ၃၀၀၀ ပြၚ် ထောံသ္ၚိဌာန်တုဲ ဒးဂြိပ်ဒဴပါဲလဝ်ရ။
ပရိုၚ်-သြၚ်လောန်တိုၚ်မ်
Photo – CJ