ဍာ်ဗု၊ အဝ်ဂတ် ၂၈
ရးတနၚ်သဳ ပွိုၚ်ဍုၚ်ဍာ်ဗု ကွာန်နွံမံၚ် သ္ကုတ်ဂၠံၚ်ဇၞော်ကၟိန်ဍုၚ်တံဂှ် ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ် အကြာပ်ၜါလပါ် ပေါဲဗတိုက်ဆက်ဒှ်အာမံၚ် အရိုဟ်ဟ်တ္ၚဲရဂှ် ညးတာလျိုၚ် PDF နဲဗျူဟာ ၃၃ သဝ်ဒါကို ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် ဇြဟတ် ၂၀၀ ပြၚ်တံဝွံ စနူကဵု အဝ်ဂတ် ၂၇ တေံဂှ် ပ္ဍဲပွိုၚ်ဍုၚ်ဍာ်ဗု ကွာန်နွံမံၚ် သ္ကုတ်ဂၠံၚ်ဇၞော်ကၟိန်ဍုၚ်တံ ကွာန်ကအ်လှိုၚ်၊ ၆၀ တိုၚ်၊ သာယာမန်ကဵု ကွာန်မြာၚ်(ဗရာၚ်)တံ ထပက်မံၚ်ကရောၚ်ပၞာန်ရ။
ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ် ဒဵုကဵု အဝ်ဂတ် ၂၆ တေံ ပေါဲဗတိုက်အကြာၜါလပါ် ဆက်ဒှ်မံၚ်တုဲ နူကဵုဌာန်ဂအုပ်ဒပ်ဍာ်မောရဝတဳ ဖျေံလဝ်သ္ဇိုၚ်ဍာ်ဗုဂှ် ပွိုၚ်မွဲတ္ၚဲမ္ဂး လွဟ်ဇၞော် ဟွံအောန်နူကဵု ၅၀ မ ဘိုၚ်ရီုဗၚ်ပန်ကၠဟ်ကဵုမံၚ်ရ။
ပေါဲဗတိုက်အကြာၜါ်လပါ် ပ္ဍဲပွိုၚ် ၁၀ တ္ၚဲဏံ ရဲဒပ်ကဝ်မယှေန်ပၞာန် ဟွံအောန်နူကဵု ၅၀ တၠ ဒးဝပ်ချိုတ်အာလဝ်တုဲ လပါ်ဒပ်ပံၚ်တောဲမဟာမိတ် ဂကောံပၠန်ဂတးဂှ် ၁၀ တၠ ဒးလဝ်ဘဲဝပ်နွံမံၚ် သ္ဂးရ။
အကြာပေါဲဗတိုက်ၜါလပါဏံ ဒပ်ကဝ်မယှေန်ပၞာန်တံ ပန်ဂစိုတ်ထောံ ရဲကွာန် ၆၀ တိုၚ် အယုက် ၆၀ သၞာံ ဗြဴကဵုတြုံၜါတၠကဵု ကောန်တြုံမွဲတၠတုဲ သၟတ်ဗြဴ ရဲကွာန်မြာၚ်မွဲတၠ ဒးဒုၚ်ပလီုသ္ပဏာကောန်သမ္ဘာနွံရဂှ် သဝ်ဒါကို ဟီုရ။
ဟိုတ်နူပေါဲဗတိုက်ဒှ်တုဲ ရဲကွာန်တံ အဃောဒးဂြိပ်ပါဲဓလေတ်မံၚ်ဂှ် ရဲဒပ်ကဝ်မယှေန်ပၞာန်တံ ဖံက်လုပ်အာသ္ၚိရဲကွာန်တံတုဲ ကပေါတ်နွံကဵုၚုဟ်မးတံဂှ် ဖ္ဍိုက်ကေတ်ဏာ နကဵုကွဳစက်လေဝ်နွံမံၚ် ညးဒေသတံ ဟီုရ။
ဟိုတ်နူပေါဲဗတိုက်ဍာ်ဗုဂှ် ရဲကွာန်ရတ်တၟး၊ ကျာ်ပိ၊ ကအ်လှိုင်၊ ၆၀ တိုၚ်၊ သာယာမန်တံ ညးဒေသ ၄၀၀၀ ပြၚ် ဒးဂြိပ်ပါဲဒဴမံၚ် ဘဲပၞာန်အိုတ်ရ။
ပရိုၚ်-သြၚ်လောန်တိုၚ်မ်
Photo – PDF