မတ်မလီု၊ အဝ်ဂတ် ၂၈
ပ္ဍဲတွဵုရးမန် ပွိုၚ်ဍုၚ်ဗွဲမဂၠိုၚ်တံဝွံ သွက်ဂွံကၠောန်အာပေါဲရုဲမာဲ ကဝ်မယှေန်ပၞာန်သီအဝဵု အခိၚ်ကြပ်ကၠုၚ်မံၚ်ဂှ်ရ နကဵုဇြဟတ်ပေၚ်ၚ် ထပ်သၠုၚ်လဝ်ပရေၚ်ဂီုကၠီုတုဲ ပရေၚ်မာတ်ဆိုအ်စၟဳစၟတ်တံ ကၠောန်မံၚ်ဆက်က်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ထ္ၜးဟိုတ်ပရေၚ်ဂီုကၠီုတုဲ ကုဂကောံနွံသၟဝ်တဲ ကဝ်မယှေန်ပၞာန် ဒပ်ဗၠာဲသၟိၚ်၊ ဒပ်မၚ်ကွာန်၊ ပရေၚ်ဂီုကၠီုညးဍုၚ်ကွာန်ကဵု ပရေၚ်ဗတိုက်သရိုဟ်ပကီုပရာတ်တံဂှ် စကာသုၚ်စောဲ ဟပဵုတိုန်လဝ် ဇြဟတ်ဗွဲမဂၠိုၚ်နွံရ။
ရဲဒပ် ဟပဵုတိုန်လဝ် ဇြဟတ်ဗွဲမဂၠိုၚ်တံဂှ် ထ္ၜးဇြဟတ်ဂေတ်ဂေၚ် ပရေၚ်ဂီုကၠီုနာနာ၊ ဒၞာဲမၞိဟ်တံ အာကၠုၚ်ဂၠိုၚ်ကဵု ဒၞာဲဟွံထေၚ်ခယျလဝ်မွဲသာ်တံဂှ် မာတ်ဆိုအ်ဂၠိုက်ဂၠာဲ၊ ဒၞာဲပၞော်ဂၠံၚ် လုပ်တိတ်ဍုၚ်တံ စၟဳစၟတ်တိုန်ကၠေတ်တ် သာ်ဝွံ ကၠောန်သ္ပမံၚ်ရ။
အခိၚ်ကြပ်ကၠုၚ်မံၚ်ကဵု ပေါဲရုဲမာဲဏံ ကဝ်မယှေန်ပၞာန်တံ သွက်သ္ဂောံဂွံ ဇြဟတ်ပရေၚ်ဂီုကၠီုဂးတုဲ ကော်ကေတ်လဝ် ညးပရီုဒေသဂမၠိုၚ်တံဂှ် နဲကဲနာနာ ဘပဠ ဍဵုဍိုက် ကဵုမံၚ်ဒဒိုက်ကဵု ညးဍုၚ်ကွာန်တံနွံရဂှ် ညးဒေသတွဵုရးမန် ဟွံမိက်ထမံက်ယၟုမွဲတၠ ဟီုရ။
“သွက်ပရေၚ်ဂီုကၠီု ပေါဲရုဲမာဲဂးတုဲ ကော်ဟပၠုပ်ဏာ ဒပ်မၚ်ကွာန်၊ မၞိဟ်ဗီုလဵုရောဟီုတှ်ေ ရဲစခွေတ်တက်ခွါတ်ဂတာကွာန်တံရ၊ မၞိဟ်ဗီုတံဏံ ဗွဲမဂၠိုၚ် စိုပ်အာ ဒပ်မၚ်ကွာန်အိုတ်ယျ။ စိုပ်အာ ဒပ်မၚ်ကွာန်တုဲ မုဒှ်ရောဟီုတှ်ေ ကလေၚ် ဍဵုဍိုက်ညးဍုၚ်ကွာန်တံပၠန်၊ ဘပဠ မၞိဟ်တံ၊ ဗီုဒးစိုတ်ကၠောန်မံၚ်။ နဲကဲစုၚ်စုၚ် ဍေံတံကဵုမံၚ် ဒဒိုက်ကဵု ညးဍုၚ်ကွာန် အာလ္တူဂၠံၚ်တံရ” သာ်ဝွံ သ္ဂးရ။
တုဲပၠန် ကောန်ဒပ်သၟဝ်တဲကဝ်မယှေန်ပၞာန်တံဂှ် ဗွဲကြဴဏံ စကာဇြဟတ်ဗွဲမဂၠိုၚ်တုဲ ဗက်စၟဳစၟတ်မံၚ် စရၚ်ကၟုဲကီု၊ ဟွံသကႅာကဵု သၟတ်တံတှ်ေ လက်ဆဴၜုၚ်တက်ဏာကီု ဂြိပ်တှ်ေ ဗက်အာဒဵုစိုပ်သ္ၚိတုဲ ရပ်ကော်ဏာပၠန် ကမၠောန်ပရေအ်ပရေအ်ဂမၠိုၚ် ကၠောန်လဝ်နွံ ညးဆက်ဟီုရ။
ကဝ်မယှေန်ပၞာန် ထ္ၜးလဝ်ဟိုတ်ကဵု ပရေၚ်ဂီုကၠီုတုဲ စကာသုၚ်စောဲဇြဟတ်ဂမၠိုၚ် ဗီုဒးစိုတ် ဖန်မံၚ်တံဂှ် သၟတ်ဂမၠိုၚ် အခိၚ်ဗတမ် ဟွံဂံၚ်တိတ်မ္ၚး ပရေၚ်ဒးဂွိၚ်ဂွာဲနွံမံၚ်တုဲ တိတ်ဂၠံၚ်တှ်ေလေဝ် ပရေၚ်ဂီုကၠီုဟၟဲရ သာ်ဝွံသ္ဂးရ။
ကဝ်မယှေန်ပေါဲရုဲမာဲ ကဝ်မယှေန်ပၞာန်တံ ပ္ဍဲကဵုတွဵုရးမန်ဂှ်တှ်ေ သီုအလုံ ၁၀ ပွိုၚ်ဍုၚ်ဂှ် နဒဒှ်ဒၞာဲဆန္ဒမာဲ ခုတ်စၟတ်လဝ်တုဲ ပေါဲရုဲမာဲ သ္ကုတ် (၁) ဂှ် ပ္ဍဲကဵု ပွိုၚ်ဍုၚ် ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျိုက်မြဟ်တံ သွက်ဂွံကၠောန်ဗ္ဒျ်အာ စဳဇန်လဝ်ရ။
ပရိုၚ်-သြၚ်လောန်တိုၚ်မ်
Photo – CJ