ကျာ်ထဝ်၊ အဝ်ဂတ် ၂၉
ဒၞာဲဂကောံပၠန်ဂတးတံ ထိင်ချုက်လဝ် ပ္ဍဲတွဵုရးမန် ဒေသပွိုၚ်ဍုၚ်ကျာ်ထဝ်တံ ကၠာဟွံစိုပ်ပေါဲရုဲမာဲဏံ ဒပ်ကဝ်မယှေန်ပၞာန်တံ ဂစာန်အုပ်ဓလီုကၠုၚ်မံၚ် တိဍာ်ရဂှ် ဒပ်ပၠန်ဂတးတံ ဟီုကဵုဌာန်ပရိုင်သြင်လောန်တိုင်မ်ရ။
စနူ ဂိတုအဝ်ဂတ် ဒုတိယသတ္တဟဂှ်တုဲ ပ္ဍဲပွိုၚ်ဍုၚ်ကျာ်ထဝ် ဒၞာဲသ္ကုတ်ဂၠံၚ် လ္ဂုၚ်-မတ်မလီု၊ ကျာ်ထဝ်- ကေန်မောန်သခါန် (ကင်မွန်းစခန်း)၊ မုပ္ပလေန်-တိၚ်ဇြယျာပ်ဂှ် ဒပ်ကဝ်မယှေန်ပၞာန်တံ ကလေၚ်ချဳဒရာၚ်တိုန် ပရေၚ်ပၞာန်ရ။
နကဵုဒပ်ကဝ်မယှေန်ပၞာန် အပ္ဍဲကဵုသ္ကုတ်ဂၠံၚ်တံဏံ ထပ်ဗပေၚ်မံၚ် ဇြဟတ်ဒပ်ကီု၊ ထပ်ထပဵုပတိုန်လဝ် ကၚ်ဒမၠုက်ဂမၠိုင်ကီု၊ ဒၞာဲဒေသလ္ၚဵု ဒပ်ပၠန်ဂတးတံ ထိၚ်ချုက်လဝ်ဂှ် ထပက်မံၚ်ကရောၚ်ပၞာန် သာ်ဝွံ ကၠောန်သ္ပမံၚ်နွံရ။
ဟိုတ်နူဒပ်ကဝ်မယှေန်ပၞာန် ချဳဒရာၚ်ကၠုၚ် ပရေၚ်ပၞာန်တုဲ ပ္ဍဲအဝ်ဂတ် ၂၇ ပ္ဍဲကဵုပွိုၚ်ဍုၚ်ကျာ်ထဝ် ကရပ်ဗဒါဲကွာန် သေတ်ကွေန်ဂှ် ပွိုၚ် ၂၀ မိနေတ် ဒှ်အာပေါဲဗတိုက်ကဵု ဒပ်ပၠန်ဂတးတံရ။
မွဲလပါ်ဂှ်ပၠန် ဒပ်ကဝ်မယှေန်ပၞာန်တံဝွံ ထပ်ကၠောန်ဟလိုင်ပတိုန်လဝ် ဗါန်ကာဒုၚ်ပၞာန်ကီု ခါဲၜံက်လဝ်ဗရံၚ် ဒၞာဲသၞေဟ်ကၚ်စၟဳစၟတ်တံကဵု ပ္ဍဲကဵုရုၚ်ဌာန်ဂအုပ်တမ်ဒပ်တံ နွံရ။
ပရေၚ်ချဳဒရာၚ်ပၞာန် ဒပ်ကဝ်မယှေန်ပၞာန်တံဂှ် သွက်ပေါဲရုဲမာဲဂွံအံၚ်ဇၞး ပတေၚ်လဝ် ပရေၚ်ဂီုကၠီုရောၚ်ဂှ် ကိုဧမေန်ထောန် ညးတာလျိုၚ်နဲကဲဗျူဟာ ၂၇ ဒေသပၞာန် သၠုၚ်ကျာ၊ ဒပ်ပၞာန်စဵုဒၞာညးဍုၚ်ကွာန် PDF ဟီုကဵုဌာန်ပရိုၚ် သြင်လောန်တိုၚ်ရ။
တုဲပၠန် ဒပ်ကဝ်မယှေန်ပၞာန်တံဂှ် ကွာန်ဒေသ ပၞော်ဒပ်ပၠန်ဂတးတံ လုပ်ကၠုၚ်အပ္ဍဲဍုၚ်မာန် မပ္တံကဵုကွာန် တေတ်သိက်ပေန်၊ အဂႅဗို၊ ကျောန်တဝ်၊ မယာန်ချံၚ်၊ ဝေန်ကလဝ်၊ ကွာန်တံၚ်ကလေဝ်တံကဵု ပ္ဍဲကဵုကွာန်ဒကဲဂၠံင်ကွဳစက်တံဂှ် ထပ်ဟလိုင်ပတိုန်လဝ် ဇြဟတ်ပၞာန်တံရ။
ပွိုၚ်ဍုၚ်ကျာ်ထဝ်ဝွံ ပွိုၚ်ဍုၚ်ပါဲလုပ်မံၚ် ပ္ဍဲကဵုပေါဲရုဲမာဲ ဒပ်ကဝ်မယှေန်ပၞာန် ကၠောန်အာသ္ကုတ် (၁) ဒှ်တုဲ အပ္ဍဲဒေသဏံ ကွာန်ဗွဲမဂၠိုၚ်တံဂှ် ဗော်သွးကောန်ဂကူကရေၚ် KNU မဟာဒပ် (၁) ခရိုၚ်သဓီုကဵု ဒပ် PDF တံ ထိၚ်ချုက်လဝ်ရ။
ပရိုၚ်-သြင်လောန်တိုၚ်မ်
Photo – Social Media