ကအ်ကြိက်၊ အဝ်ဂတ် ၂၉
ပ္ဍဲတွဵုရးကရေၚ် ဒၞာဲကဵုဂၠံၚ်ဇၞော်အာယှ ဗြဝတဳ-ကအ်ကြိက်ကဵု ဂၠံၚ်တြေံဒဵုဒဝ်နတံဂှ် ကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်တုဲ ပေါဲဗတိုက်ဆက်ဒှ်မံၚ်ကဵု ဒပ် ပံၚ်တောဲမဟာမိတ် ဂကောံပၠန်ဂတး KNLA သ္ပသ္ကိုပ်သ္ကတံရဂှ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဂၠံၚ်ဇၞော်အာယှ ဗြဝတဳ-ကအ်ကြိက် ဒပ်မဟာမိတ်ပံၚ်တောဲ ဂကောံပၠန်ဂတး KNLA သ္ပသ္ကိုပ်သ္က ထိၚ်ချုက်အုပ်ဓုပ်လဝ်တံ သွက်ဂွံကလေၚ်သီကေတ်မာန် ဒပ်ကဝ်မယှေန်ပၞာန်တံ စနူအဝ်ဂတ်မံက်ကၠုၚ်ဂှ် ထပေၚ်ကၠုၚ်မံၚ် ဇြဟတ်မၞိဟ် လွဟ်လက်နက်တံကီု စကာသုၚ်စောဲ လွဟ်ဇၞော်၊ ဒရုၚ်၊ ပၞာန်ရီု ၜၚ်ကျာတံတုဲ ထပက်ပၞာန် ဗတိုက်ကၠုၚ်မံၚ်ရ။
ကရောၚ်ပၞာန်ဒပ်ကဝ်မယှေန်တံဝွံ ပံၚ်တောဲလဝ်ကဵု ဒပ် DKBA ဗိုလ်ဗိ က္ဍိုက်လဝ်ဍိုပ်ဂှ်တုဲ နူကဵုဍုၚ်ကအ်ကြိက်မွဲအဆံၚ် ကရောၚ်ပၞာန်ထပက်မံၚ် ဂၠံၚ်ဇၞော်အာယှကဵု လပါ်ဂၠံၚ်တြေံဒဵုဒဝ်နတံဂှ် ဒှ်မံၚ်ပေါဲဗတိုက်ကု ဒပ် KNLA မဟာမိတ်ပံၚ်တောဲ ဂကောံပၠန်ဂတးတံ အရိုဟ်ဟ်တ္ၚဲရ။
တုဲပၠန် နူကဵုတမ်ဒပ် ခလရ ၂၇၅ ဖျေံလဝ်သ္ဇိုၚ် ဍုၚ်ဗြဝတဳဂှ်မွဲအဆံၚ် ဒပ်ကဝ်မယှေန်ပၞာန် ထပက်ကရောၚ်ပၞာန် ဗတိုက်အာရောၚ် ပရိုၚ်တိတ်မံၚ်တုဲ နူတမ်ဒပ် ခလရ ၂၇၅ ကောန်ပၞာန်ၜိုတ် ၃၀၀ တံပၠန် ပ္ဍဲကဵုအဝ်ဂတ် ၂၄ တေံ ကၠုၚ်လုပ်ကေတ်လဝ်ဒၞာဲ ပ္ဍဲကဵု ဒဒန်ပရေၚ်ဆာန်ကၟိန် လၟိဟ် ၂ သေံ-ဗမာ ရဂှ် ကောန်ဍုၚ်ဗြဝတဳတံ ဟီုရ။
ဒဒန်ပရေၚ်ဆာန်ကၟိန် လၟိဟ် ၂ သေံ-ဗမာ နွံမံၚ် ဍုၚ်ဗြဝတဳလေဝ် လောန်ကၠုၚ်အဝ်ဂတ် ၁၆ တေံဂှ် ကဝ်မယှေန်ပၞာန် ဟွံထ္ၜးဟိုတ်မွဲသာ် မာတ်ထောံမွဲလပါ်ဓဝ်ကီု နကဵုဇြဟတ်ဗွဲမဂၠိုၚ် သီုကဵုကၠုၚ်ဖျေံလဝ်ဒပ် ပ္ဍဲကဵုဒဒန် လၟိဟ် ၂ ဂှ်ရ။
နူကဵုဒပ်ကဝ်မယှေန်ပၞာန် ဟလိုၚ်ဇြဟတ် ကၠုၚ်ဖျေံလဝ်ဒပ် ဇရေၚ်ဒဒန်လၟိဟ် ၂ ဏံဂှ်တှ်ေ ပ္ဍဲကဵုတမ်ဒပ် ခလရ ၂၇၅ ဇြဟတ်မၞိဟ်ဂၠိုၚ်မံၚ်တုဲ ပါ်စွံကဝက် ပြံၚ်စွံလဝ် ဒၞာဲဒဒန်လၟိဟ် ၂ လဝ်ဒှ်မာန်၊ သွက်ပရေၚ်ဂီုကၠီုလဝ် ဒှ်မာန်ရောၚ် ညးဒေသဍုၚ်ဗြဝတဳလ္ၚဵုလ္ၚဵုတံ သ္ၚဳဂၠိပ်မံၚ်လေဝ် နွံရ။
နူကဵုကဝ်မယှေန်ပၞာန် ထပက်မံၚ်ပၞာန်လၟုဟ်ဂှ်တှ်ေ ကၠာဟွံစိုပ်ပေါဲရုဲမာဲတေံ နူကဵုဂၠံၚ်ဇၞော်အာယှမွဲအဆံၚ် သွက်ဂွံကလေၚ်သီ ထိၚ်ချုက်ကေတ် တေန်ဂါန်ညဳနံၚ်(သင်္ကန်းညီနောင်) ကဵု ဍုၚ်ဗြဝတဳတံမာန် ပတိတ်ဇြဟတ် ဂစာန်မံၚ် ဗွဲမလောန်ရ။
ပရိုၚ်-သြင်လောန်တိုၚ်မ်
Photo – Social Media