မတ်မလီု၊ အဝ်ဂတ် ၂၉
ပ္ဍဲကဵုတွဵုရးမန် ကဝ်မယှေန်ပၞာန်သီအဝဵု သွက်ဂွံကၠောန်အာပေါဲရုဲမာဲ ကြပ်ကၠုၚ်မံၚ်ကီုလေဝ် ရပ်မံၚ်သၟတ်တံ ဗွဲအဓ္ဓမတုဲ ပရေၚ် ကံက်ပကောံကေတ်မံၚ် ကောန်ပၞာန်တၟိတံဂှ် ဆက်ကၠောန်မံၚ်ဖိုဟ်ရောၚ် ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
အလုံဍုၚ်မွဲ ဇၟာပ်ဒၞာဲပြးဇး ဟိုတ်နူဒုၚ်တဝ်စၞေဟ် ပၠန်ဂတးမံၚ်တုဲ ဒပ်ကဝ်မယှေန်ပၞာန် ဇြဟတ်ပၞာန်အောန်စှ်ေအာ အရာသွက်ဂွံဗပေၚ် တၚ်နွံပၟိက်ကဵုဇြဟတ်တံဂှ် အပ္ဍဲကဵုတွဵုရး ညံၚ်ဂွံဆက်ပံက်အာ တန်ဗတာန်ကွာန်ပၞာန် လၟေၚ်ဂိတုမာန် ဆက်ပကောံ ကောန်ပၞာန်တၟိတုဲ ဖန်ဇန်ကၠုၚ်မံၚ်ရ။
လောန်ကၠုၚ် အဝ်ဂတ် ၁၈ ဂှ်ရ တန်ဗတောန်ယိုက်ဂၠေၚ်ဝန်ပၞာန် လၟေၚ်စၟတ် ၁၆ ကဝ်မယှေန်ပၞာန်ပံက်လဝ်တုဲ သွက်တန်ဗတောန်ယိုက်ဂၠေၚ်ဝန်ပၞာန် လၟေၚ်စၟတ် ၁၇ ပၠန်ဂှ် အသိၚ်ဟွံပိုတ် ဆက်ပကောံမံၚ်ဖိုဟ်ရ။
ကဝ်မယှေန်ပၞာန်သီအဝဵုဝွံ သၟတ်တံ အရၚ်သွက်ဂွံယိုက်ဝန်ပၞာန်ဂှ် ပ္ဍဲအကြာဂၠံၚ်ဇၞော် ကၟိန်ဍုၚ်တံကဵု ဂၠံၚ်ကွာန်ဆက်လဝ်တံ ဗက်ရပ်မံၚ်ကီု၊ တၚ်ထ္ၜးဟိုတ်ဟၟဲမွဲသာ် ဗက်ရပ်ကေတ်ပဝ်တာတုဲ ပလံၚ်ဗစိုပ်ဏာမံၚ် ဇရေၚ် ဘာတန်ဗတောန်ကွတ်ပၞာန်တံရောၚ်။
တုဲပၠန် ဂကောံသ္ကိုပ်ပရေၚ်အုပ်ဓုပ် အရာပ်ကွာန် ကဝ်မယှေန်ပၞာန် အလုံတွဵုရးပၠန် သွက်ဂွံထပက်အဇာ အရၚ်မၞိဟ်ယိုက်ဝန်ပၞာန်တံဂးတုဲ မွဲသ္ၚိမ္ဂး မွဲဠက်ဒကေဝ်ကဵုလပါ်လ္တူ ဗက်ကံက်မံၚ်သြန်လၟေၚ်ဂိတုဂှ်လေဝ် နွံမံၚ်ပၠန်ရ။
ဟိုတ်နူကဝ်မယှေန်ပၞာန် ဗက်ရပ်ပၠုပ်ကောန်ပၞာန်တၟိတံတုဲ သၟတ်လုပ်မံၚ်အဝဲ ယိုက်ဝန်ပၞာန်တံ စနူကဵုအာကၠုၚ် တိတ်ဂၠံၚ်ဍာန်တံ ပရေၚ်ဂီုကၠီုဟၟဲရဂှ် ဟီုဂးမံၚ်အိုတ်ရ။
မွဲလပါ်ပၠန် ကဝ်မယှေန်ပၞာန်တွဵုရးဝွံ သၟတ်လုပ်အဝေါၚ် အဝဲယိုက်ဝန်ပၞာန်တံ စနူအဝ်ဂတ် ၁ ပလံၚ်ဗစိုပ်လဝ် လိက်ရုၚ်ကော်တံနွံတုဲ ယဝ်ရဟွံဒှ်ကၠုၚ်မ္ဂး နကဵုဥပဒေပရေၚ်ယိုက်ဝန်ပၞာန် ဒးဒုၚ်ကေတ်အရေဝ်ရောၚ် ဘပဠလဝ်နွံရ။
ပ္ဍဲတွဵုးရးမန် ကံၚ်သဳပၞာန် သၠာဲပြံၚ်ယၟု ကဝ်မယှေန်ပၞာန် ပ္ဍဲကဵုပံက်ကၠုၚ် တန်ဗတောန်အရာယိုက်ဝန်ပၞာန် နူကဵုလၟေၚ်စၟတ် ၁ ဒဵုစိုပ် လၟေၚ်စၟတ် ၁၆ ဂှ် သၟတ်ဟွံအောန်နူ ၂၇၀၀ တၠတံ နကဵုကောန်ပၞာန်တၟိ ဒးဒုၚ်ပကောံလဝ်တုဲယျ။
ပ္ဍဲကဵုတွဵုရးမန် သွက်တန်ဗတောန်အရာယိုက်ဝန်ပၞာန် လၟေၚ်စၟတ် ၁၇ ဂှ် သၟတ် ၁၀၀ ပြၚ်တံ ဒးဒုၚ်ရပ်ပကောံစွံလဝ် ပ္ဍဲကဵုဒပ်ပရေၚ်ပညာ စၟတ် (၆) ဍုၚ်မတ်မလီု ဂွံတီလဝ်ရ။
ပရိုၚ်-သြင်လောန်တိုၚ်မ်
Photo – CJ