ဘာအၚ်၊ အဝ်ဂုတ် ၃၀
ဗော်သွးကောန်ဂကူကရေၚ် KNUဂှ် ဒှ် က္ဍိုပ်ပကီုပရာတ်ကဵု ဂကောံဟွံလုပ်ဗဗွဲဓရ်ရောၚ် လ္တူကဝ်မယှေန်ပၞာန်သီလဝ်အဝဵု လလောၚ်တြးလဝ်ဂှ် မုလေဝ်သွက်ဂွံဒးသ္ပဂရုဟၟဲပုဟ် ကေုာံ ပရေၚ်ဏံဝွံ ညံၚ်ရဴကမၠတ်ဂှ် ကရေဲဟီုကဵုမၞိဟ်ရဂှ် ညးနွံအခေါင်ဟီုဂး ဗော်သွးကောန်ဂကူကရေၚ် KNU ပဒိုသဝ်တဝ်နဳ ကလေၚ်ဟီုခၠေဝ်ဏာရ။
ဂကောံဗတိုက်သရိုဟ်ပကီုပရာတ်ဗဟဵု ကဝ်မယှေန်ပၞာန်တံဂှ် ပ္ဍဲ အဝ်ဂတ် ၂၈ ဂှ် KNU ဝွံ ဒှ် က္ဍိုပ်ပကီုပရာတ်ရောၚ် လလောၚ်တြးလဝ်ကီု နူကဵုဌာနဝန်ဇၞော် ကေၚ်ကာအပ္ဍဲဍုၚ် ကဝ်မယှေန်ပၞာန်ဂှ်လေဝ် နဒဒှ် ဂကောံဟွံလုပ်ဗဗွဲဓရ် ပတိတ်ဏာလိက်လလောၚ်တြးကီုရ။
ပရေၚ်ဂီုကၠီုညးဍုၚ်ကွာန်ဂမၠိုၚ်၊ ပိုန်ဟာန်ဒြပ်ရတ်လမျီုတံကီု၊ စမြိၚ်အလဵုအသဳဍုၚ် ပိုင်ပြဳလဝ်တံကီု၊ သ္ဇိုၚ်စမြိုၚ်သိုၚ်ခၞံနာနာ၊ ဒဒန်ဂၠံၚ်ဍာံဂမၠိုၚ်တံကဵု ဍုၚ်ကွာန်ဗွဲမဂၠိုၚ်တံဂှ် KNU ပလီုပလာ်လဝ်ရောၚ် ကဝ်မယှေန်ပၞာန် စောဲစပ်လဝ်ရ။
တၚ်လလောၚ် ကဝ်မယှေန်ပၞာန်ဝွံ ကမၠတ်ဂှ် ညံၚ်ရဴကရေဲဟီုကဵုမၞိဟ် ဒှ်မံၚ်တုဲ မုလေဝ်သွက်ဂွံဒးသ္ပဂရုဟၟဲလးလးကီု က္ဍိုပ်ပၞာန်တံရ ဒှ်ဂကောံပကီုပရာတ်ဂှ်ဂၠးကဝ်တီ သာ်ဝွံ ညးနွံအခေါင်ဟီုဂး KNU ပဒိုသဝ်တဝ်နဳ ကလေၚ်ဟီုဏာရ။
ပေါဲရုဲမာဲကဝ်မယှေန်ပၞာန်သီအဝဵု ကၠောန်အာဏံဂှ် ညိလေဝ်ဒုင်တဲဟွံမာန် ဒစဵုဒစးအာပေၚ်ၚ်ရောၚ် နူကဵု ဗဟဵု KNU ပတိတ်ဏာလိက်လလောၚ်တြး ပ္ဍဲအကြာတ္ၚဲတံဏံတုဲ နူကဵုကဝ်မယှေန်ပၞာန်ဂှ်လေဝ် KNU ကလေၚ်လလောၚ်တြးဏာ နဒဒှ်က္ဍိုပ်ပကီုပရာတ်ကဵု ဂကောံဟွံလုပ်ဗဗွဲဓရ်ရ။
က္ဍိုပ်ပၞာန်တံ လ္တူ KNU နဒဒှ် က္ဍိုပ်ပကီုပရာတ်ကဵု ဂကောံဟွံလုပ်ဗဗွဲဓရ် ဟိုတ်နူလလောၚ်တြးတုဲ ဗွဲကြဴ ဟိုတ်နူပရေၚ်ဆက်ဇီုကပိုက်တံတုဲ အကာဲအရာ ပရေၚ်ညးဍုၚ်ကွာန်တံ အာကၠုၚ်ကဵု ပရေၚ်ဂီုကၠီု ပဵုခက်တိုန်မာန်ကီု ဆက်ဆောံကဵု ဂကောံဗဗွဲဓရ်ဟွံသေၚ်ဂးတုဲ တက်စုတ်ဍိုပ် ပဵုတုဲ ဗက်ရပ်ကၠုၚ်မာန်ရောၚ် သ္ကိုပ်စၞောန် အခေါင်အရာမၞိဟ်ကရေၚ်- KHRG သဝ်အေဝ်ဗါတ် ထံက်ထ္ၜးရ။
လပါ်ကဝ်မယှေန်ပၞာန်သီအဝဵု ပ္ဍဲဂိတုဒဳဇြေမ်ပါဏံ သွက်ဂွံကၠောန်အာပေါဲရုဲမာဲ ဗော်ဇဳရောၚ် ဖန်ဇန်လဝ်တုဲ ကၠာဟွံစိုပ်ပေါဲရုဲမာဲဏံ ပ္ဍဲတွဵုရးကရေၚ် သွက်ဂွံကလေၚ်သီထိၚ်ချုက်အာ ဂၠံၚ်ဇၞော်အာယှကီု တေန်ဂါန်ညဳနံင်၊ ဍုၚ်ဗြဝတဳတံမာန်ဂှ် ထပက်မံၚ်ပၞာန် ဇၞော်ကဵုဇြဟတ်ရ။
ပြဟ်ဟ်ဏံ အပ္ဍဲဍုၚ်ကအ်ကြိက်ဂှ် ဒပ်ကဝ်မယှေန်ပၞာန်တံ ထပ်ဗပေၚ်လဝ်ဇြဟတ်ပၞာန်ပေၚ်ၚ်တုဲ ဒၞာဲကဵု ဂကောံဇြဟတ်ပၠန်ဂတးတံ ထိၚ်ချုက်ကောပ်ကာဲလဝ် ဂၠံၚ်ဇၞော်အာယှကဵု ဂၠံၚ်ဒဵုတြေံ ဒဝ်န၊ ဂၠံၚ် ကြုၚ်ဒဵု-နဗူတံဂှ် ထပက်ကၠုၚ်မံၚ် ကရောၚ်ပၞာန် တုဲ ပေါဲဗတိုက်တံ ဒှ်မံၚ်ဆက်က် သ္ကာတ်မြဟ်ဇၞော်ကဵုဇြဟတ်ရ။
တုဲပၠန် လပါ်သၠုၚ်ကျာဗြဝတဳ ကရပ်ပယျဵုသေံ-ဗမာ ဒၞာဲကုန်ဗဒိုပ်ဗျူဟာ ဝဝ်လေဝ် ဂှ် ဒပ် KNLA သ္ကိုပ်သ္ကလဝ် ဂကောံမဟာမိတ်ပံၚ်တောဲတံ ဗိုၚ်လဝ်ဂေတ်ကၠောံ မာတ်ဆိုအ်ဗတိုက်မံၚ်တုဲ ညံၚ်ဗဒိုပ်ဗျူဟာ ဟွံစှ်ေအာဂှ် နူကဵုဂၠံၚ်ကျာ ဒပ်ကဝ်မယှေန်ပၞာန်တံ ဇၞော်ကဵုဇြဟတ် ဖျေံဗုမ်ကဵုမံၚ်ပၞာန်ရီု ဒုၚ်တဝ်စၞေဟ်မံၚ် အိုတ်စောန်ရ။
နူကဵုကဝ်မယှေန်ပၞာန် KNU ဂှ် က္ဍိုပ်ပကီုပရာတ်ကဵု ဂကောံဟွံလုပ်ဗဗွဲဓရ် ဟိုတ်နူလလောၚ်တြးလဝ်ဂှ်တှ်ေ ပေါဲဗတိုက်တံ ပဵုတုဲသ္ကာတ်မြဟ်ကၠုၚ်မာန်ကီု စွံပွန်ကဵု ညးဒေသကောန်အရာပ်တံတုဲ နူကဵုဒပ်ကဝ်မယှေန်ပၞာန် ပရေၚ်ပေါဲဗတိုက်တံ ပဵုတုဲ ကၠောန်ကၠုၚ်မာန်ရောၚ် ညးလ္ၚတ်ပရေၚ်ဍုၚ်ကွာန် လ္ၚဵုလ္ၚဵုတံ ဟီုဂးမံၚ်ရ။
ပရိုၚ်-သြၚ်လောန်တိုၚ်မ်
Photo – KNU