မတ်မလီု၊ အဝ်ဂတ် ၃၀
ပ္ဍဲကဵုတွဵုရးမန် ဒပ်မၚ်ကွာန်ကီု ဂကောံဂီုကၠီုညးဍုၚ်ကွာန်ကဵု ဗတိုက်သရိုဟ်ပကီုပရာတ် ကဝ်မယှေန်ပၞာန်တံကီု ဗွဲကြဴဏံ ပ္ဍဲအကြာဒေသ ဗီုကရိုက်စိုတ် ဍေံတံဖန်ဖက်မံၚ်အိုတ်ရောၚ် ညးဒေသတံ ဟီုကဵုဌာန်ပရိုၚ် သြင်လောန်တိုၚ်မ်ရ။
ရဲဂီုကၠီုသၟဝ်တဲကဝ်မယှေန်ပၞာန်တံဂှ် နကဵုဇြဟတ်ဗွဲမဂၠိုၚ် ၜူမာဲကြီုကြမံၚ် အကြာအရာပ် အကြာကွာန်တံတုဲ သ္ပမာန် ကေတ်မံၚ်ဇၞးသၟးဟွံက စနူကဵု ဂဥုဲၜူမာဲနာနာ သွံရာန်မံၚ်အိုတ်ရ။
တုဲပၠန် ယဝ်ရသၟတ်တံ လုပ်ဂကောံဍေံတံမ္ဂး ဟွံဒးယိုက်ဂၠေၚ်ဝန်ပၞာန်ကီု ဟွံဒးတိတ်မုက်ပၞာန်တုဲ ဂွံမံၚ်အာ အကြာအရာပ်ကဵုကွာန်တံကီု စနူကဵုဂဥုဲၜူမာဲ ကဵုအခေါၚ်ရောၚ် စန်ဒက်ဟပၠုပ်မံၚ် သ္ဂးရ။
ရဲဂီုကၠီုကဝ်မယှေန်ပၞာန်တံဂှ် ဗွဲကြဴဏံ အပ္ဍဲကဵုအကြာဒေသ ပရေအ်မံၚ် အိုတ်စောန်တုဲ စိုတ်ဍေံတံဟွံဒးမ္ဂး ကော်ရပ်ဏာသၟတ်မၞိဟ်ဍောတ်တ်တံ နွံမံၚ်ရောၚ် သၟတ်ညးဒေသမွဲတၠ ဟီုရ။
“ဒပ်မၚ်ကွာန်ဟာ မုဟာ ဟွံတီပုဟ်၊ လတက်လဝ်ကယျိုၚ်သာ်ဍီု ကြီုကွေံကွေံရ။ လၟုဟ် လပါ်ပိုဲဏံ ဒပ်မၚ်ကွာန်သက်က် ဟွံအာရ။ ဍေံတံအာတှ်ေ ကယျိုၚ်တသာ်ဍီု ကောံအာမံၚ် ညံၚ်ရဴဗၠာဲသၟိၚ်တံကီု၊ ဒၞာဲပေက်ပၟတ်(မီးပွိုင့်) တံ ဍေံတံရပ်မံၚ်၊ အာကဵုကွဳစက်တှ်ေလေဝ် ဆဵုလ္တူဂၠံၚ် ကော်သၟာန်စၟဳစၟတ်ပၠန်၊ သၟာန်ဗီုတေံဗီုဏံ၊ ဟွံစှ်ေဗီုတှ်ေ မွဲအလန်ဓဝ် ကော်ရပ်ဏာဟဂှ်ရ” သာ်ဝွံ သ္ဂးရ။
ညးဒးဒုၚ်ရပ်ဏာကဵု ရဲဂီုကၠီုဒပ်မကဝ်ယှေန်ပၞာန်ဂှ်တှ်ေ ရဲကြပ်ကဵု ကဝ်မယှေန်ပၞာန်တံကီု၊ ဂကောံပရေၚ်အုပ်ဓုပ်အရာပ်ကွာန်တံဒှ်ဒှ် အာတ်သြန်တုဲ ကလေၚ်ဗလးကဵုမံၚ်နွံကီုလေဝ် ညးတၞဟ်သအာၚ်တံဂှ် မုပရိုၚ်လဝ်ဂွံဟွံမာန် ကၠေံအာလေဝ်နွံမံၚ်ရ။
ဂကောံဂီုကၠီုကဝ်မယှေန်ပၞာန်တံဂှ် ၜက်လောန်လဝ် နူကဵုဥပဒေ ကဝ်မယှေန်ပၞာန်ပတိတ်လဝ်တံ ဟိုတ်နူကၠောန်သ္ပမံၚ်အိုတ်ဂှ်ရ ဘဝ ပရေၚ်ပိုန်ဒြပ်ညးဍုၚ်ကွာန်တံ ဒးအာစိုပ်မံၚ်ဒဒိုက်ရောၚ် ညးဒေသမွဲပၠန်ဂှ် ဟီုရ။
“ဂကောံကဝ်မယှေန်ပၞာန် ဇွိတ်သပေါတ်ၜံၚ်ပတိတ်လဝ်ဏံ ကဝ်မယှေန်ပၞာန်ပတိတ်လဝ်ညိညိဂှ် ကောန်ရဲဍေံတံဂှ် ကၠောန်အာဂၠိုၚ်ၚ်၊ ကၠောန်မံၚ်ပွဗီုဗီုတံဏံဂှ် ပိုဲညးဍုၚ်ကွာန်တံ ဘဝပိုန်ဟာန်ဂွံတဴတက်ဂှ် မုအဆံၚ်လေဝ် ကၠောန်စဟွံဂွံ။ မုဒှ်ရောဟီုတှ်ေ နူကနေံတေံ နူဂယး ၆ နာဍဳ ပိုဲတိတ်ဂၠံၚ်အာအတေံအဏံ။ ဗက်ရပ်ကွဳလိုန်ဖအိုတ်။ လၟုဟ်နူဂယးပြဟ် ၄ နာဍဳ ဗက်ရပ်ပၠန်။ နူကၠာဟွံစိုပ်ပေါဲရုဲမာဲ ဒုက္ခဒဒိုက်ညးဍုၚ်ကွာန် ဂွံကၠောန်ပရေၚ်ပိုန်ဟာန်ညးတံ ဝါတ်ကျာတ်မံၚ်ဗီုဏံမ္ဂး ကြပ်ကၠုၚ်ကဵု ပေါဲရုဲမာဲတှ်ေ ပဵုတုဲ ပရေအ်ဏောၚ်” သ္ဂးရ။
ပ္ဍဲအကြာဒေသ နူကဵုကဝ်မယှေန်ပၞာန်တံ ခါန်ကၞက်စုတ်လဝ် ဒပ်မၚ်ကွာန်ကေုာံ ဂကောံဂီုကၠီုညးဍုၚ်ကွာန်ကဵု ဗတိုက်သရိုဟ်ပကီုပရာတ်တံဂှ်တှ်ေ ညးပရီုတံ၊ ရဲသုၚ်စောဲၜူမာဲ စပ္တံနူကဵုရဲသွံဂဥုဲၜူမာဲတံ ပါလုပ်မံၚ်ရ။
ညးပရီုကြီုကြတံဂှ် နကဵုက္ဍိုပ်လိက် သွက်ပရေၚ်ဂီုကၠီုညးဍုၚ်ကွာန် ခါန်ကၞက်စုတ်လဝ်တုဲ ဗီုကရိုက်စိုတ်ဍေံတံ ဖန်ဖက်မံၚ်ဂှ်ရ ပရေၚ်ဂီုကၠီု ညးဍုၚ်ကွာန်တံဟၟဲသၟးဟွံက ဒၞာဲဍေံတံနွံမံၚ်ဂှ် သွက်ဂွံတတ်ၜက်အာမာန် အကာဲအရာ ဘိုအ်ဒးဂွိၚ်ဂွါဲ ဒှ်မံၚ်ရဂှ် ညးဒေသတံ ဟီုဂးမံၚ်ရ။
ပ္ဍဲတွဵုရးမန်ဝွံ နူကဵုကဝ်မယှေန်ပၞာန် ခါကၞက်စုတ်လဝ် ဒပ်မၚ်ကွာန် ကေုာံ ဂကောံဂီုကၠီုညးဍုၚ်ကွာန်ကဵု ဗတိုက်သရိုဟ်ပကီုပရာတ်တံဂှ် ပ္ဍဲအကြာဒေသ မာတ်ဆိုအ် ဗက်ဂၠိုက်ဂၠာဲစၟဳစၟတ်မံၚ်တံကီု မၚ်ကၚ် အကြာသၞေဟ်ကၚ်ဂိက်၊ ဗက်စၟဳစၟတ်စရၚ်ကၟုဲတံဟွံက မၚ်ဂီုကၠီုပ္ဍဲအခန်ကၞာနာနာတံဂှ် ဒးကၠောန်ကဵုမံၚ်အိုတ်။
ပရိုၚ်-သြၚ်လောန်တိုၚ်မ်
Photo – CJ