ဍာ်ဗု၊ အဝ်ဂတ် ၃၁
ပ္ဍဲရးတနၚ်သဳ ခရိုၚ်ထဝါဲ ပွိုၚ်ဍုၚ်ဍာ်ဗု အကြာပေါဲဗတိုက်ၜါလပါ်ဒှ်မံၚ်ဂှ် နူကဵုဒပ်ကဝ်မယှေန်ပၞာန် ကောန်ပၞာန်ဂြိပ်ကၠုၚ်လဝ် ၄ တၠ ရပ်ဂွံလဝ်ရဂှ် သဝ်တာကို သ္ကိုပ်နဲကဲဗျူဟာ ၃၃ ဒပ်ပၞာန်စဵုဒၞာညးဍုၚ်ကွာန် ဟီုကဵုဌာန်ပရိုၚ် သြင်လောန်တိုၚ်မ်ရ။
ပွိုၚ်ဍုၚ်ဍာ်ဗု ဒၞာဲကရောၚ်ပၞာန် ဒပ်ကဝ်မယှေန်ပၞာန်တံ ထပက်မံၚ်ပၞာန် ပ္ဍဲကွာန်ကအ်လှိုၚ်၊ မြာၚ်၊ ၆၀ တိုၚ်ကဵု သာယာမန်တံဂှ် ကောန်ပၞာန် စှ်ေလဝ်ဘာယိုက်ဝန်ပၞာန် ပိတၠကဵု ကောန်ပၞာန်မွဲတၠတံ ပ္ဍဲအဝ်ဂတ် ၂၅ ကဵု ၂၆ အခိၚ်ဍေံတံဂြိပ်တိတ်ကၠုၚ်လဝ်ဂှ် ဂကောံမဟာမိတ်ပံၚ်တောဲတံ ရပ်ဂွံလဝ်ရ။
ကောန်ပၞာန်ဂြိပ်တိတ်ကၠုၚ်လဝ် နူဒပ်ကဝ်မယှေန် ပန်တၠဝွံ ကောန်ဒပ် နာန်ကိုကို၊ ကောန်ဒပ် ဇေယျာဝေန်၊ ကောန်ဒပ် နိုင်လေန်အံၚ်တံ တိုန်လဝ် ဘာယိုက်ဝန်ပၞာန် လၟေၚ် ၈ တုဲ ဗွဲကြဴမွဲတၠဂှ် ကောန်ဒပ် ယာန်နိုၚ်မေန်တံ သ္ဂးရ။
ပြဟ်ဟ်ဏံ ရပ်ဂွံလဝ် ကောန်ပၞာန် ဒပ်ကဝ်မယှေန်ပၞာန် ပန်တၠတံဂှ် အတိုၚ် အလဵုအသဳညဳသၟဟ်ဖျေံလဝ်သၞောဝ် နကဵုဥပဒေဂၠုဲပၞာန် ရပ်ထိၚ်လဝ်ရောၚ် ဂးရ။
အတိုၚ်လဟီု ကောန်ပၞာန် ဒပ်ကဝ်မယှေန်ပၞာန်တံမ္ဂး ညးတာလျိုၚ် အဆံၚ်လ္တူတံ စကာမံၚ်နနဲအဓ္ဓမကီု၊ ပ္ဍဲမုက်ပၞာန် ကဵုအာဂတကၠာအိုတ်တုဲ ကဵုအမိၚ် ဟၟဲမံၚ်ကဵုဗဗွဲဓရ်တံကီု ပ္ဍဲအကြာကွာန် ဗက်ဖံက်မံၚ်သ္ၚိဌာန် ညးဍုၚ်ကွာန်တံဟွံက ရပ်ကောန်ကွာန်တံတုဲ ပျဲပျာံဂစိုတ်ထောံလဝ်လေဝ်နွံမံၚ် သ္ဂးရ။
ဒပ်ကဝ်မယှေန်ပၞာန် သွက်ဂွံကလေၚ်ထိၚ် ဂၠံၚ်ဇၞော်ကၟိန်ဍုၚ် စၟတ် (၈) မာန်ပၠန်ဂှ် ထပက်မံၚ်ကရောၚ်ပၞာန်ဆက်က်တုဲ ဒးဝပ်ဘဲဒဏ် ချိုတ်ဂၠိုၚ်အာဂှ်ရ ကလေၚ်ဗပေၚ်ဇြဟတ်တုဲ ထပ်ထပက်မံၚ် ကရောၚ်ပၞာန်ပၠန်ရဂှ် ဇြဟတ်ပၠန်ဂတးတံ ဟီုရ။
ပ္ဍဲပွိုၚ်ဍုၚ်ဍာ်ဗု အကြာပေါဲဗတိုက်ဒှ်မံၚ်ၜါလပါ်ဏံ ဟိုတ်နူဒပ်ကဝ်မယှေန်တံ ပန်ကၠဟ်လွဟ်ဇၞော်တုဲ ညးဒေသနူ ၆ ကွာန်ဂှ် ညးဍုၚ်ကွာန် ကရပ် ၄၀၀၀ ဒးဂြိပ်ပါဲမံၚ် ဘဲပၞာန်ဖိုအ်ရ။
ပရိုၚ်-သြၚ်လောန်တိုၚ်မ်
Photo – နည်းဗျူဟာ (၃၃) အထူးစစ်ဆင်ရေးအဖွဲ့