ဘာအၚ်၊ အဝ်ဂတ် ၃၁
လ္တူကောန်အရာပ်ညးဍုၚ်ကွာန်တံ နကဵုဒပ်ပၞာန် ဖန်ဖက် ၜက်ၜေတ်ကၠောန်လဝ် ပွမပလေအ်ထောံဗွဲအဓ္ဓမကဵု ပရေၚ်ပကီုပရာတ်တံ နွံမံၚ်တုဲ ဖံက်ပကဝ်မံၚ်သၞောဝ်ဂၠးကဝ် ဗွဲမကၠးမးတံဝွံ ကုပွဳဗွိုၚ် ဍုၚ်ဂၠးကဝ်ဂမၠိုၚ်တံကဵု ညးမဆေၚ်စပ်တံ သွက်ဂွံပျုတ်ဗဒေက်အာညိဂှ် ဂကောံအခေါၚ်အရာမၞိဟ်ကရေၚ် KHRG ဗတိုက်ဖအောဝ်ဏာရ။
အဝ်ဂတ် ၃၀ ပ္ဍဲကဵု တ္ၚဲပွမပလေအ်ထောံ ဗွဲအဓ္ဓမဂၠးကဝ်ဏံ နူကဵု ဂကောံအခေါၚ်အရာမၞိဟ်ကရေၚ် KHRG ပတိတ်လဝ် လိက်လလောၚ်တြးတုဲ ပ္ဍဲကဵုဍုၚ်ဗမာ ဒေသအဂၞဲဂှ် ဒပ်ပၞာန်ဗမာ သၠဲသၠဲလးလးဖန်ဖက်မံၚ် ပွမပလေအ်ထောံဗွဲအဓ္ဓမတံ နွံမံၚ်ရောၚ် KHRG သ္ဂးလဝ်ရ။
ပ္ဍဲကဵုဍုၚ်ဗမာ ဒေသအဂၞဲ (တွဵုရးကရေၚ်) ဂှ် ဒပ်ပၞာန်တံဝွံ ညိလေဝ် ပရေၚ်ကဵုသတိဟၟဲလးလးတုဲ ရပ်မံၚ်ကောန်ကွာန်တံကီု၊ နကဵုပရေၚ်သၞောဝ်ဓရ် စဵုဒၞာကဵုလဝ်ဟၟဲတုဲ ရပ်ချုက်စွံလဝ် ပ္ဍဲကဵုဗ္ဒိုပ်ပၞာန် သာ်ဂှ်ဟွံသေၚ် ရပ်စုတ်လဝ် ပ္ဍဲထံၚ်တံ ကမၠောန်ပွဗီုဗီုတံဏံဂှ် နကဵု ဂကောံအခေါၚ်အရာမၞိဟ်ကရေၚ် KHRG ဒဵုကဵုတ္ၚဲဏံ ဂွံလဝ်တၚ်နၚ်နွံမံၚ်ရောၚ် ပ္ဍဲလလောၚ်တြးဂှ် ချူလဝ်ရ။
ဗွဲတၟေၚ် သၟတ်ညးတြုံ အကြာအယုက် ၁၅ ကဵု ၂၅ သၞာံတံဂှ် ဆက်စပ်မံၚ်ကဵု ဂကောံပၠန်ဂတးတံဂးတုဲ စောဲစပ် ရပ်ဏာဗွဲအဓ္ဓမတံ ပဵုတုဲဒှ်ကၠုၚ်မံၚ်ဂှ် ဂွံဆဵုလဝ် KHRG သ္ဂးရ။
နကဵုတၚ်နင် KHRG စၟတ်သမ္တီလဝ်ဂှ်မ္ဂး မၞိဟ်ကၠေံအာလဝ်တံဂှ် ဒပ်ပၞာန်ဗမာ ရပ်ဏာတုဲ သွက်ဒပ်ပၞာန်ဍေံတံ နကဵုပဝ်တာ၊ ဂဒံၚ်မၞိဟ်၊ ထ္ၜးဂၠံၚ်၊ မၞိဟ်သောၚ်မါၚ် စကာသုၚ်စောဲလဝ်တုဲ ပွအရာပရေၚ်တံဏံဝွံ စပ်ကဵုဥပဒေ ဓရ်ဗ္စာရဏာမၞိဟ် အလုံဂၠးကဝ်ဂှ် ဖံက်ပကဝ်လဝ် ဇၞော်ကဵုဇြဟတ်တုဲ ဒုဟ်ဒဏ်နွံမံၚ်ရောၚ် ပ္ဍဲလိက်လလောၚ်တြးဂှ် ချူလဝ်ရ။
ပရေၚ်ဒဒှ်ဗွဲမဂၠိုၚ်တံဂှ် ဒပ်ပၞာန်ဗမာတံ ဖန်ဖက်ကၠောန်လဝ်ဂၠိုၚ် ဒှ်မံၚ်ကီုလေဝ် အပ္ဍဲတွဵုရးကရေၚ်ပၠန် ဂကောံရပ်လွဟ်လ္ၚဵုတံလေဝ် ပလေအ်ထောံဗွဲအဓ္ဓမတံ ဖန်ဖက်လဝ်နွံ ဂှ်ကီု ဂွံလဝ်တၚ်နၚ်စၟတ်သမ္တီလဝ်တံနွံမံၚ် KHRG ထမံက်လဝ်ရ။
သွက်ညးဍုၚ်ကွာန် နွံမံၚ် ပ္ဍဲဍုၚ်ဗမာ ဒေသအဂၞဲတံ ဖဵုပရေၚ်ဇီုကပိုက် ပွမပလေအ်ထောံဗွဲအဓ္ဓမတံ အကာဲအရာပရအ်မံၚ် ဗွဲမလောန်တုဲ သွက်ရဲဒးဒုၚ်လဝ်ဘဲဒဏ်တံဂှ်မ္ဂး ပရေၚ်ညးတံဒးဆဵုဂဗလဝ်ကဵု ပရေၚ်ပကီုပရာတ်တံဂှ် ဟွံဂံၚ်ကလေၚ်ချပ်ဒးလးလးတုဲ ရဲသ္ၚိကၟိန်အိန်ထံၚ် တံဂှ်ပၠန် ဒးဒုၚ်အာလဝ် ဘဲဒဏ်ဝေဒနာစိုတ်နာနာ၊ ပွမဖေက်တံ၊ ပရေၚ်အောန်စိုတ်နာနာသာ်တံကဵု အရာမွဲသာ်လေဝ်ဟွံချိုတ်ပၠိုတ်တံ ဂွံဒုၚ်စသိုၚ်မံၚ်ရောၚ် သ္ဂးရ။
နကဵုပွဳဗွိုၚ်ဂၠးကဝ်တံကဵု ညးမဆေၚ်စပ်တံဂှ် ပွမခြော်ရော်ဗတိုက်ကြာန်န်၊ ဂအုံမၞိဟ်တံ ထောံဌာန်ဒဴပါဲအာဌာန်သ္ၚောဲ၊ နနဲအဓ္ဓမပလေအ်ထောံမၞိဟ်ကဵု ဗီုပြၚ်ပကီုပရာတ်တၞဟ်ဟ်တံ လ္တူတၠအဝဵုပၞာန် ညးဖန်ဖက်လဝ် အပ္ဍဲကဵုဍုၚ်ဗမာဝွံ အခေါင်အရာမၞိဟ်ကဵု ပရေၚ်ဗ္စာရဏာမၞိဟ်တံ သွက်ပရေၚ်ကြေပ်ဂြတ်ဂွံဒုၚ်ကၠုၚ်ဂှ် ဒှ်မံၚ် ကောန်ဒုဟ်အဓိကရောၚ် ညံၚ်ဂွံခုတ်စၟတ်ကဵု KHRG ဗတိုက်ဖအောဝ်လဝ်ရ။
တုဲပၠန် ညံၚ်ဂွံဒေါအ်ထောံ ပရေၚ်ကဵုအထံက်ပၚ်သြန် လ္တူတၠအဝဵုပၞာန် ကၠောန်မံၚ်ပကီုပရာတ်ဂှ်ကီု၊ သွံကဵုမံၚ်ကပေါတ်ပၞာန် လွဟ်လက်နက်တံဂှ် ညံၚ်ဂွံမာတ်ဆိုအ်ထောံဖအိုတ်ကီု လ္တူက္ဍိုပ်သ္ကိုပ်ပၞာန်တံ၊ ကာန်ပဏဳပံၚ်တောဲလဝ်ကဵု ဒပ်ပၞာန်တံ လ္တူရိုဟ်ကၞက်သြန်လုပ်ဍေံတံ ညံၚ်ဂွံမာတ်ဆိုအ် ကေတ်အာအရေဝ်မာန် ဂကောံအခေါၚ်အရာမၞိဟ်ကရေၚ် KHRG ဗတိုက်ဖအောဝ်လဝ် တၚ်နၚ် ၈ တၚ် သွက်ရဲပွဳဗွိုင်ဍုၚ်ဂၠးကဝ်တံကဵု ညးဆေၚ်စပ်တံရ။
ပရိုၚ်-သြၚ်လောန်တိုၚ်မ်
Photo – KHRG