မတ်မလီု၊ အဝ်ဂတ် ၃၁
လုပ်ပြိုၚ်ပေါဲရုဲမာဲ ကဝ်မယှေန်ပၞာန်သီအဝဵု ကၠောန်အာဏံဂှ် သွက်ဗော်ဂွံဇၞးဟွံသေၚ်၊ သွက်ဗော်ဂွံဆက် တန်တဴအာ ဍာ်ဇမၠိၚ်မာန် ဒးကၠောန်အာရောၚ် ဥက္ကဌ ဗော်ညးဗြဴ(မန်) မိလျိုၚ်မန် (မိသန်းရှင်) ဟီုကဵု ဌာန်ပရိုၚ်သြင်လောန်တိုၚ်မ်ရ။
ပ္ဍဲကဵု တၚ်နၚ် ကဝ်မယှေန်ပေါဲရုဲမာဲကၟိန်ဍုၚ် UEC ကဝ်မယှေန်ပၞာန် လလောၚ်တြးဂှ်မ္ဂး ပၞောဝ်အာကဵု ဗော်လုပ်ပြိုၚ်မာဲ မွဲအလုံဍုၚ် နွံမၚ် ၉ ဗော်ဂှ် ဗော်ညးဗြဴ(မန်) ပါလုပ်မံၚ် နကဵုဗော်ပရေၚ်ဍုၚ်ကွာန် မွဲဗော်ကီုရ။
ပြဟ်ဟ်ဏံ သွက်ဂွံလုပ်ပြိုၚ်အာမာန် မွဲအလုံဍုၚ်မာန် ဗော်ညးဗြဴ(မန်) ဂှ် ဗက်ပံက်မံၚ်ရုၚ်ဗော်တံကီု ပကောံမံၚ် ကောန်ဗော်တံကီု ဖန်ဖက်ရေၚ်တၠုၚ်မံၚ်ရ။
ဖေက်ဒးဒုၚ်ပလီုထောံဗော်ဂှ်ရ ဒးလုပ်ပြိုၚ်အာမာဲရတုဲ ပရေၚ်စန်ဒက်မာဲတံဂှ် ဗက်ကၠောန်အာဟွံသေၚ်ပုဟ် ဥက္ကဌ ဗော်ညးဗြဴ(မန်) မိလျိုၚ်မန် ဟီုရ။
“ဗော်ပိုဲဖေက်လီုအာ ဖေက်ကွေံကွေံရ၊ မုဒှ်ရောဟီုတှ်ေ သွက်ဂွံကလေၚ်ပ္တန် ဗော်ညးဗြဴဂှ် ကိစ္စဏံ ဟွံလောဲသွာပုဟ်။ ညံၚ်ဗော်ပိုဲ ဟွံဂွံလီုအာဂးတုဲ လၟုဟ် ညးဗြဴပိုယ်တံကီု ညးလ္ၚဵု မန်လ္ၚဵုတံလေဝ် ဘိုၚ်ကၠောန်ကဵုမံၚ်ရ။ ဗီုပြၚ် ပြိုၚ်မာဲဟွံသေၚ်ပုဟ်၊ ပိုဲဟွံကေတ်မာဲပုဟ်။ ဟွံစှ်ေပရေၚ်စန်ဒက်ပုဟ်၊ မုလေဝ်ဟွံကၠောန်ပုဟ်၊ ဗော်ညးဗြဴညံၚ်ဂွံတန်တဴဂွံ ဍာ်ဇမၠိၚ်ဂွံအာမာန် ကၠောန်အာၜိုတ်လ္တူကျာညိညရ” သာ်ဝွံ သ္ဂးရ။
နကဵု ဥပဒေ ပွမ ပတိုန်စၟတ်သမ္တီဗော်နာနာမ္ဂး ယဝ်ဒှ် ဗော်စန်ဒက်အလုံကၟိန်ဍုၚ် ဒှ်မ္ဂး လၟိဟ်ကောန်ဗော် အောန်အိုတ် ၅၀၀၀၀ ဒးနွံတုဲ ပၞောဝ်ကဵုပွိုၚ်ဍုၚ် သီုဖအိုတ်တုဲ ပ္ဍဲဒၞာဲပိဂအုံမွဲဂအုံဂှ် ဒးပံက်အာရုၚ်ဗော်တံရောၚ် ခၞံလဝ်သၞောဝ်ရ။
တုဲပၠန် နကဵုဗော်ပရေၚ်ဍုၚ်ကွာန်တံဝွံ ကၠာဟွံကၠောန်ဗ္ဒျ်ပေါဲရုဲမာဲ အပ္ဍဲကဵုပွိုၚ် ၉၀ တ္ၚဲဂှ် အတိုၚ်စၟတ်လဝ် လၟိဟ်ကောန်ဗော်တံကဵု ရုၚ်ဗော်တံ ပံက်ဟွံမာန်မ္ဂး နကဵုဥပဒေစၟတ်သမ္တီဗော် ၝောံပိုဒ် ၁၂ ဂှ် ကေတ်အရေဝ်ရောၚ် ကဝ်မယှေန် ပေါဲရုဲမာဲ ကဝ်မယှေန်ပၞာန် လလောၚ်တြးလဝ်ရ။
နကဵုဗော်ညးဗြဴ(မန်) ဂှ် အတိုၚ်ကဝ်မယှေန်ပေါဲရုဲမာဲခုတ်စၟတ်လဝ် ပကောံဂွံလဝ် လၟိဟ်ကောန်ဗော်တံ ပေၚ်ၜက်မံၚ်ရဒှ်တုဲ ရုၚ်ဗော်တံလေဝ် ပေၚ်မံၚ်ဂှ်ရ ဆက်ကၠောန်မံၚ် စရၚ်ပရေၚ်အလံၚ်ညးစၞးတံ သ္ဂးရ။
အလံၚ်ညးစၞးတံဂှ် ၁၀ တန်လပါ်လ္တူ ဟိုတ်နူခုတ်စၟတ်လဝ်တုဲ အပ္ဍဲကောန်ဗော်တံ ရုဲကေတ်မံၚ် ညးၜက်စှ်တန်တံကီု သွက်ပေါဲရုဲမာဲ နကဵုဗော်ညးဗြဴ(မန်) အလံၚ်အမာတ် ၜိုတ်ပန်ကၠံ ဘိုအ်ဂွံပၠုပ်စရၚ် နွံမံၚ် ဥက္ကဌ ဗော်ညးဗြဴ(မန်) မိလျိုၚ်မန် (မိသန်းရှင်) ဟီုကဵုလဝ် ဌာန်ပရိုၚ်သြင်လောန်တိုၚ်မ်ရ။
“အလံၚ်ညးစၞးတံပၠန် စှ်တန်လပါ်လ္တူ၊ ခုတ်စၟတ်လဝ်ဗီုဏံနွံတုဲ ပိုဲရုဲမံၚ်ရ၊ နူအပ္ဍဲဗော်ပိုဲဂှ်ရ ရုဲကေတ်ရုဲၜက်လဝ် စှ်တန်တံရလေဝ်၊ တင်ဏံ ပိုဲအခက်အခုဲဟၟဲပုဟ်။ ဇြဟတ်ကောန်ဗော် မွဲကိုတ်ပြၚ်ၜါကိုတ်နွံမံၚ်တုဲ အလံၚ်ညးစၞး ၜိုတ်ပန်ကၠံဂှ် တိတ်ဏောၚ်၊ တၚ်ၜိုတ်တံဏံ အခက်အခုဲဟၟဲပုဟ်” သာ်ဝွံသ္ဂးရ။
ဗော်ညးဗြဴ(မန်) ဂှ် စဒက်ပတန်လဝ် ပ္ဍဲသၞာံ ၂၀၁၄ တေံတုဲ ပ္ဍဲကဵုပေါဲရုဲမာဲ ၂၀၁၅ ကဵု ၂၀၂၀ တေံ လုပ်ပြိုၚ်မာဲကီုလေဝ် မွဲဒၞာဲမှ ကေၚ်ဂွံဇၞးလဝ်ဟၟဲကၠုၚ်ဏီ။
ပ္ဍဲကဵုလက်ထက် ဂကောံပၞာန်သီအဝဵု ကလေၚ်ပ္တိုန်လဝ် စၟတ်သမ္တီ ဗော်ညးဗြဴ(မန်) တုဲ ဗွဲကြဴ လောန်ကၠုၚ် ၂၀၂၃ သၞာံ ဂျောန် ၂၃ ဂှ် ဂွံလဝ်စၟတ်သမ္တီဗော်ရ။
ပရိုၚ်-သြၚ်လောန်တိုၚ်မ်
Photo – ဗော်ညးဗြဴ(မန်)