ထဝါဲ- သိပ်တမ်ပါ ၂
ဒၞာဲပယျဵု တွဵုရးဍုၚ်မန်ကဵု တနၚ်သဳ ပ္ဍဲပွိုၚ်ဍုၚ်ဗု ဟိုတ်နူပေါဲဗတိုက်ၜါလပါ်ဂှ်ရ ပရေၚ်ကပေါတ်လုပ် အောန်စှ်ေအာမံၚ်ဗွဲမလောန်တုဲ ပ္ဍဲဍုၚ်ထဝါဲ အနှေုန်ၚုဟ်မးကပေါတ် ထပက်တိုန်ကၠုၚ်မံၚ်ရောၚ် ညးဒေသတံ ဟီုကဵုဌာန်ပရိုၚ်သြင်လောန်တိုင်မ်ရ။
စနူကဵု အဝ်ဂတ် ၁၉ ဂှ်တုဲ ပ္ဍဲပွိုၚ်ဍုၚ်ဍာ်ဗု ဒၞာဲကွာန်သ္ကုတ်ဂၠံၚ်ဇၞော်ကၟိန်ဍုၚ် ဍာ်ဗု-ထဝါဲတံ ဟိုတ်နူကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်လဝ်တုဲ အကြာဒပ်ပၠန်ဂတးတံ ပေါဲဗတိုက်ၜါလပါ် ဒှ်ကၠုၚ်လဝ်ရ။
ဟိုတ်နူ ပေါဲဗတိုက်ၜါလပါ်ဂှ် ဒၞာဲကွာန်သ္ကုတ်ဂၠံၚ်ဇၞော်ကၟိန်ဍုၚ် ဍာ်ဗု-ထဝါဲတံ အခေါင်စကာဂၠံၚ် ဒးဒုၚ်ကၟာတ်လဝ်တုဲ ကုရးတနၚ်သဳ ဍုၚ်ထဝါဲဂှ် ကပေါတ်ဗၞိက်နာနာ ဟွံလုပ်စိုပ်ကၠုၚ်လဝ်ၜိုတ် ၅ တ္ၚဲပြၚ် လံအာယျ သာ်ဝွံ ညးဒေသတံ ဟီုရ။
ဟိုတ်နူကပေါတ်ဗၞိက် ဟွံလုပ်လဝ်တုဲ အပ္ဍဲဍုၚ်ထဝါဲဂှ် ခၟာဲစၚ်မွဲမ နူကဵု ၅၀၀ ဒကေဝ် ဒဵုစိုပ် ၁၀၀၀၊ ခဍောင်ဟစးမွဲပဿာ နူကဵု ၃၅၀၀ ဒကေဝ် ဒဵုကဵု ၁၀၀၀၀ သၠုၚ်တိုန်အာတုဲ ကပေါတ်ဗၞိက်တၞဟ်ဟ်တံဂှ်ပၠန် တန်တဴကဵု ဂကူဍေံတုဲ နူကဵု ၃၀% ဒဵုကဵု ၅၀% ၚုဟ်မးသၠုၚ်တိုန်ကၠုၚ်ရ။
ပြဟ်ဟ်ဏံပၠန် ဟိုတ်နူအကာဲအရာ ပရေၚ်ပၞာန်ၜါလပါ်ဂှ် ပ္ဍဲပွိုၚ်ဍုၚ်ဗု ဒၞာဲကွာန် ၆၀ တိုၚ်ကဵု သာယာမန်တံဝွံ ကွဳစက်အာတရဴတံကဵု ကွဳစက်ဖ္ဍိုက်ကပေါတ်တံ ဗၞတ် ၅၀၀ မ ကၟာတ်ဆိုအ်မံၚ်တုဲ ညးဍုၚ်ကွာန်အာတရဴတံဂှ်လေဝ် ပရေၚ်စသုၚ်မံၚ်စံၚ် ဒှ်မံၚ်အခက်အခုဲရ။
ပေါဲဗတိုက်ဍာ်ဗုဝွံ ဒဵုကဵုသိပ်တမ်ပါ ၁ ဏံ ပရေၚ်ပၞာန်အကြာၜါလပါ် ဆက်တုဲကြံၚ်မ္ၚဵုမံၚ်ဖိုအ်တုဲ ရဲလပါ်ဒပ်ကဝ်မယှေန်ပၞာန်တံပၠန် ကရောၚ်ပၞာန် ဗီုပြၚ်ကလေၚ်ဆုတ်ဟၟဲဏီပုဟ်။
ပ္ဍဲရးတနၚ်သဳ ဟိုတ်နူပေါဲဗတိုက်ဍာ်ဗုတုဲ နူကွာန်ကအ်လှိုၚ်၊ မြာၚ် ၊၆၀ တိုၚ်၊ သာယာမန်တံ ညးဒေသ ၄၀၀၀ ပြၚ် ဒၞာဲဗၠးဘဲ ဒးဂြိုပ်ပါဲဒဴမံၚ်ရ။
ပရိုၚ်-သြၚ်လောန်တိုၚ်
Photo – Social Media