မတ်မလီု ၊ သိပ်တမ်ပါ ၂
နကဵု ဒပ်ပၠန်ဂတးဍုၚ်မန် MSRF ဂှ် ပံၚ်ကောံကဵု ဒပ်မဟာမိတ်ပံၚ်တောဲပၠန်ဂတးတံတုဲ ပြေင်ဇန်သၠုၚ်လဝ်အသိၚ် ပရေၚ်လဝေၚ်ပၞာန်ရောၚ် ပ္ဍဲကဵုလိက်ဒုၚ်စဳရေၚ် ပရေၚ်လဝေၚ်ပၞာန် MSRF ပေၚ် ၃ သၞာံ ပတိတ်လဝ် သိပ်တမ်ပါ ၁ ဂှ် ဟီုဂးလဝ်ရ။
နကဵု ဒပ်ပၠန်ဂတးဍုၚ်မန်ဝွံ အပ္ဍဲကာလ ပရေၚ်လဝေၚ်ပၞာန် ပွိုၚ်ပိသၞာံဂှ် ပ္ဍဲတွဵုရးမန် ပွိုၚ်ဍုၚ် မုဒုံ၊ ဇြပ်ဗု၊ ဍုၚ်ရေဝ်သၠုၚ်ကျာကဵု သၟဝ်ကျာ ဟွံက ပ္ဍဲရးတနၚ်သဳ ဍာ်ဗု၊ ကလိၚ်အံၚ်ကေုာံ ဒဵုစိုပ် ပွိုၚ်ဍုၚ် တယိတ်ချံၚ်တံ ပရးလဝ်ဒပ်တုဲ သၠုၚ်လဝ်အသိၚ် ပရေၚ်လဝေၚ်ပၞာန်ရဂှ် လလောၚ်တြးလဝ်ရ။
နူကဵု သၞာံ ၂၀၂၂ စနူဂိတုသိပ်တမ်ပါ ဒဵုစိုပ်သၞာံ ၂၀၂၅ ဂိတုအဝ်ဂတ်ဂှ် နကဵုဒပ် MSRF ဝွံ လၟိဟ်ပေါဲဗတိုက် ဟွံအောန်နူ ၆၉ ဝါ ဗတိုက်ကၠုၚ်လဝ်တုဲ ဂစိုတ်ဂွံလဝ် ကောန်ဒပ်ကဝ်မယှေန်ပၞာန် ၃၆၉ တၠမာန်ရဂှ် ပ္ဍဲကဵုလိက်လလောၚ်တြး ချူလဝ်ရ။
တုဲပၠန် အခိၚ်လဝေၚ်ပၞာန် စနူ ၂၀၂၄ ဒဵုကဵုအခိၚ်လၟုဟ် သၞာံ ၂၀၂၅ ဒဵုစိုပ်ဂိတုအဝ်ဂတ်ဏံ ပ္ဍဲကဵုဒၞာဲဂၠံၚ်ဇၞော်ကၟိန်ဍုၚ် လၟိဟ် ၈ ၊ သ္ကုတ်ဂၠံၚ် ဇြပ်ဗု-ရေဝ်- ထဝါဲတံဂှ် ပံၚ်တောဲကဵု ဒပ်မဟာမိတ်ပၠန်ဂတးတံတုဲ ထိၚ်ချုက်မာန်ကၠုၚ်လဝ် သ္ဂးရ။
ဒပ် MSRF ဝွံ ပ္ဍဲသၞာံ ၂၀၂၃ ဂိတုဒဳဇြေမ်ပါ ၁၅ ဂှ် ဒုၚ်ကတ် ပွမပၠတရဴ ကံၚ်သဳဖိတ်ဒရေဝ်ဍုၚ်မန် MSFC တုဲ သၟဝ်တဲဌာနပရေၚ်စဵုဒၞာ လစှ်ေကံၚ်သဳဏံ ပ္ဍဲကဵုဒေသပၞာန် တွဵုရးမန်ဂှ် ပဵုတုဲတြးလဝ်ဇြဟတ် ချဳဒရာၚ်ကၠုၚ်မာန် သာ်ဝွံ ချူလဝ်ပ္ဍဲလိက်လလောၚ်တြးရ။
တုဲပၠန် ကု ဒပ်ပၞာန်စဵုဒၞာညးဍုၚ်ကွာန် PDF၊ ဒေသလဝေင်ပၞာန် စၟတ် (၁) နဲကဲဗျူဟာ (၃၃) ပၠန်လေဝ် နူကဵုအဆံၚ်မဟာမိတ်ဂှ် သွက်ဂွံကဵုလမျီုတုဲစဵုဒၞာအာမွဲစွံ နဒဒှ် “ဒပ်ကောဒေံ” ပ္ဍဲအဝ်ဂတ် ၂၇ ထပ်ဟပဵုသၠုၚ် ဒက်ပတိုန်လဝ်ဂှ် ကဵုလဝ်သမ္တီရ။
လောန်ကၠုၚ် သၞာံ ၂၀၂၁ ပ္ဍဲအဝ်ဂတ် ၇ ဂှ် သ္ကိုပ်ဗိုလ်ထူ (နာဲဒရာဂန်) သ္ကိုပ်တမ်ဒပ်လၟုဟ် က္ဍိုက်ပ် နကဵု မၞိဟ် ၇ တၠ၊ လွဟ် ၃ ဇကိုအ် ပ္ဍဲကဵုဒေသရေဝ်သၠုၚ်ကျာ စပ္တန်ပံက်ခၞံလဝ် ဒပ်ပၠန်ဂတးဍုၚ်မန် MSRF တုဲ ပြဟ်ဟ်ဏံ ဇြဟတ်ဗွဲမဂၠိုၚ် နွံတိုန်ကၠုၚ်ကီု ဆက်တုဲ လုပ်မံၚ်ပေါဲဗတိုက် ကုဒပ်ကဝ်မယှေန်ပၞာန်ရ။
က္ဍိုပ်သ္ကိုပ်ပၞာန် မေန်အံၚ်လှိုၚ် သီအဝဵုတုဲ ဗွဲကြဴ မွဲကရောံကဵု ပရေၚ်ပၠန်ဂတးကညၚ်ဂှ် ဒပ်ပၠန်ဂတးဍုၚ်မန် မံက်တိုန်ကၠုၚ်တုဲ ဒပ်ပၠန်ဂတး သ္ပပဓာန်လဝ်ကု ဂကူမန်ကဵု ဍုၚ်မန်၊ ဗွဲကြဴအခိၚ်သီအဝဵုဏံ ဒပ်သ္ပလဝ်သ္ဇိုၚ်ကဵု ဂကူမန် ပန်လွဟ်ဖံက်လဝ်သေနာတ် ဗွဲကိုပ်ကၠာအိုတ်ရဂှ် သ္ပလဝ်သမ္တီရ။
ပရိုၚ်-သြၚ်လောန်တိုၚ်မ်
Photo – MSRF