သွက်ပေါဲရုဲမာဲ က္ဍိုပ်သ္ကိုပ်ပၞာန် သ္ပကၠုၚ်ပရေၚ်ကဵုကေတ်ကု ကြုက်ကဵု အေန္ဒိယ

နေဗျဳတဝ်၊ သိပ်တမ်ပါ ၂

ဗွဲကြဴ ခုတ်စၟတ်လလောၚ်တြး တ္ၚဲသွက်ဂွံကၠောန်ဗ္ဒျ်အာ ပေါဲရုဲမာဲတုဲ ပ္ဍဲကဵုလၟေၚ်တရဴ အာစိုပ်ဍုၚ်ကြုက်ဂှ် က္ဍိုပ်သ္ကိုပ်သီအဝဵုပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် သ္ပကၠုၚ်ပရေၚ်ကဵုကေတ်ကု အလဵုအသဳကြုက်ကဵု အေန္ဒိယတံ စပ်ကဵုပရေၚ်ဍုၚ်ဗမာ အရာဘိုၚ်ပညဳပညပ်မံၚ်တံ နွံကၠုၚ်ရ။

စနူ အဝ်ဂတ် ၃၀ ဂှ်တုဲ က္ဍိုပ်သ္ကိုပ်ပၞာန်အာစိုပ်မံၚ်ဍုၚ်ကြုက်ဂှ် ဆဵုဂဗလဝ်ကဵု သမ္မတကြုက် ယှဳကျေအ်ဖျေန်ကီု၊ ကုသ္ကိုပ်ဝန်ဇၞော် အေန္ဒိယ မိုဒဳလေဝ် ပ္ဍဲအဝ်ဂတ် ၃၁ ဂှ် ဗွဲတၞဟ်ခြာ ဆဵုဂဗသဳကၠဳလဝ်နွံ လိက်ပရိုၚ်တြးဝါဒ ကဝ်မယှေန်ပၞာန်တံ ချူလဝ်ရ။

ပ္ဍဲကဵု မုက်လိက် Facebook သ္ကိုပ်ဝန်ဇၞော်အေန္ဒိယ နရေင်ဒြာ မိုဒို ချူလဝ်ဂှ်တှ်ေ စပ်ကဵုပရေၚ်ၜံက်ခါဲသတ္တု တိသ္အး၊ ဓါတ်လလဳ၊ ပရေၚ်ကူသာန်၊ ပရေၚ်ပံၚ်တောဲရေၚ်တၠုၚ်တံကဵု အရာစပ်ကဵုပရေၚ်ဂီုကၠီုနာနာတံ ချပ်စလဝ်တုဲ ဂွံလဝ်တၚ်တုပ်စိုတ်ရဂှ် ပ္ဍဲအဝ်ဂတ် ၃၁ ချူပတိတ်လဝ်ရ။

ကိစ္စပရေၚ်ၜံက်ခါဲတိသ္အးဂှ် ကဝ်မယှေန်ပၞာန် ၜိုန်ရဟွံချူလဝ် ပ္ဍဲလိက်လလောၚ်တြးကီုလေဝ် သွက်ပေါဲရုဲမာဲဍုၚ်ဗမာ ညံၚ်ဂွံကၠောန်အာ ဗွဲမအံၚ်ဇၞးမာန်ဂှ် နကဵုဍုၚ်အေန္ဒိယ ကဵုဇြဟတ်ထံက်ဂလာန်မံၚ်တုဲ ဗလးကဵု ဂကောံညးရံၚ်မၚ်လ္ၚတ်ပေါဲရုဲမာဲကီုရောၚ် သ္ကိုပ်ဝန်ဇၞော် မိုဒဳ သ္ဂးလဝ်ရ။

တုဲပၠန် ပ္ဍဲကဵု ဂကောံပံၚ်တောဲရေၚ်တၠုၚ်ယှာန်ဟိုၚ် SCO ဏံ နကဵုကောန်ဂကောံ ဍုၚ်ဗမာညံၚ်ဂွံဒှ်ကၠုၚ်မာန် နကဵုဍုၚ်အေန္ဒိယ ကဵုမံၚ်ထံက်ဂလာန်တုဲ အကြာဒေသပယျဵု ဍုၚ်ၜါဍုၚ် ပရေၚ်သ္ဂောံညိင်ဝပ်ကီု၊ ညံၚ်သ္ဂောံသၠုၚ်ပတိုန် ကဏ္ဍပရေၚ်ကူသာန်ကပေါတ်ဗၞိက်နာနာ ကေုာံ ပရေၚ်ပံၚ်တောဲ အကြာဒပ်ပၞာန်ၜါဍုၚ်တံဂှ်လေဝ် သဳကၠဳလဝ်ကီု ချူလဝ်ရ။

အတိုၚ် ကြုက်ကဵု အေန္ဒိယတံ နွံမံၚ်ပၟိက် ဖဵုပရေၚ်ပိုန်ဒြပ်တံဂှ် က္ဍိုပ်သ္ကိုပ်ပၞာန် ထ္ၜးလဝ်ကဵု ပရေၚ်ကူသာန်ပိုန်ဒြပ်တံတုဲ ကၠောန်မံၚ် သွက်ဂွံဗတိုက်ပလီုအာ ပၠန်ဂတးကညၚ်ရောၚ် ညးနွံအခေါင်ဟီုဂး မုက်ဒပ်ကောန်ဂကူချေၚ် သလိုင်ထက်နဳ သ္ၚဳဂၠိပ်လဝ်ရ။

“နူကဵု မေန်အံၚ်လှိုၚ်ဂှ် ဗီုပၟိက်စိုတ် ဍုၚ်ကြုက်ကဵု အေန္ဒိယတံနွံမံၚ် သွက်အရၚ်ဂုဏ်ဖဵုဍုၚ်ဍေံတံ ထ္ၜးလဝ်ဟိုတ်ကဵု ပရေၚ်ကူသာန်ပိုန်ဒြပ်တံဂးတုဲ မွဲလပါ်ဂှ် သွက်ဂွံဗတိုက် ဒပ်ကောန်ဍုၚ်အရၚ်ပိုဲကီု ပၠန်ဂတးကညၚ်ကီု ညံၚ်သ္ဂောံဂွံနၚ် အရီုဗၚ် နူဍေံတံ(ကြုက်ကဵု အေန္ဒိယ) ဗဂေတ်လဝ်မွဲလပါ်ရ။ တုဲပၠန် စပ်ကဵုပေါဲရုဲမာဲဏံ ဍုၚ်ဍေံတံၜါဍုၚ် သွက်ဂွံသ္ပကဵုစၟတ်သမ္တီဂးတုဲ ကော်ဏာအတေံ။ ဟီုသရောပ်မ္ဂး အဓိက ပ္ဍဲကဵုပရေၚ်ဗတိုက် ပၠန်ဂတးကညၚ်ဏံ ဍေံ(မအလ) ညံၚ်သ္ဂောံဂွံ ပရေၚ်ထံက်ဂလာန်ၜါဍုၚ်ဏံဂှ် ထ္ၜးစကူသာန်ပရေၚ်ပိုန်ဒြပ်တုဲ ကၠောန်အာရ ညာတ်” သာ်ဝွံ သ္ဂးရ။

အလဵုအသဳ ဍုၚ်ကြုက်ကဵု အေန္ဒိယ ၜါဍုၚ်ဝွံ သွက်ဂကောံပၞာန်ဗမာဂှ် ထံက်ပၚ်သွံကဵုမံၚ် ကပေါတ်လွဟ်ဂတာပ်ခတ် စပ်ကဵုပရေၚ်ပၞာန်တံကီု ဒရုၚ်ကဵု အထံက်အပၚ်ပရေၚ်နာဲကဲနာနာတံကီု ဗတောန်ကဵုမံၚ်ကွတ်ပညာတံလေဝ် နွံမံၚ်ကီု သာ်ဝွံ ဂွံတီလဝ် နူတၚ် Justice For Myanmar ရ။

နူကဵုဌာန်ပရိုၚ်သေၚ်ဟွာ အလဵုအသဳကြုက် ချူလဝ်ဂှ်မ္ဂး နူကဵုဍုၚ်ဗမာ နဒဒှ် သမ္မတယာယဳ ညးမကေတ်လဝ်တာလျိုၚ်

ဥက္ကဌ ကဝ်မယှန်ပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ်ဝွံ သွက်ပရေၚ်ၜိုဟ်လလမ်ကေုာံ ပရေၚ်ညိၚ်ဝပ် သ္ကုတ်သၟဝ်ကျာဍုၚ်ဗမာဂှ် နကဵုအခန်ကဏ္ဍသဘဴကမၠောန်ဂွံဒှ်အာ ဍုၚ်ကြုက်ပါလုပ်အာလဝ်ရောၚ် သ္ဂးလဝ်ရ။

အတိုၚ် ဖိုၚ်ရမျှာၚ် မံက်တိတ်လဝ်ဂှ်တှ်ေ သွက်ဒေသသ္ကုတ်သၟဝ်ကျာ ညံၚ်ဂွံဖောအ်ဗြဳအာ လ္တူဂကောံရပ်လွဟ် အပ္ဍဲကဵုဒေသပယျဵုတံ ဟိုတ်နူဍုၚ်ကြုက် ကဵုလဝ်ဇြဟတ်ဟရိုဟ်တုဲ လ္တူအကာဲအရာဂွံလဝ် ပရေၚ်ၜိုဟ်လလမ်ဏံ ဗွဲတၟေၚ်တၚ်ဏာဂုဏ် သာ်ဝွံ အဃောက္ဍိုက်သ္ကိုပ်ပၞာန် ဆဵုဂဗလဝ် သမ္မတကြုက် ယှဳကျေအ်ဖျေန်ဂှ် ဟီုဂးလဝ်ရ။

သ္ပပရေၚ်ဒစဵုဒစးကဵုကြုက်တုဲ ညံၚ်ဒပ်ပၞာန် ဂွံသရိုဟ်စှ်ေအာမာန် တၚ်နၚ်ဗီုလဵုဗတိုက်ရော ဂကောံသ္ကုတ်သၟဝ်ကျာတံ ဒးထမံက်အာရုပ်ရဴရဏောၚ် ညးလ္ၚတ်မံၚ်အကာဲအရာ ပရေၚ်ပၞာန် CDM ဗိုလ်ဇၞော် ဇြေန်ယဝ် ထံက်ထ္ၜးရ။

“လ္တူအလဵုအသဳကြုက် တၠပိုန်ဒြပ်ကြုက်တံ ၜါလပါ်တံ (ဒပ်ပၞာန်ကဵု ဂကောံသၟဝ်ကျာ) ညးမွဲမှ ဟွံဂံၚ်ကော်ဆောတဝ်ဝ်ပုဟ်၊ တဝ်ဝ်လေဝ် ဟွံဂံၚ်စာန်စးမွဲသာ်ပုဟ် ဂွံဆဵုအာတၚ်နၚ်ဏံ။ ဟိုတ်ဂှ်ရ ဗီုလဵုမှ ကယျာန်ဟွံဂွံပုဟ်။ လၟုဟ်တှ်ေ သီုမ သီုကလောအ် ဂွံဆဵုအာတဝ်ဝ်ယျ ဒှ်မံၚ်အကာဲအရာဗီုဏံ။ ဟိုတ်ဂှ်တုဲ ကြုက်ညံၚ်ဂွံဟွံပါလုပ် ဒစဵုဒစးကြုက်တုဲ ဒပ်ပၞာန်ဂွံသရိုဟ်စှ်ေ ဗီုလဵုဗတိုက်အာရော ဒးကလေၚ်ချပ် ကဏ္ဍအခန်ဏံ ဒးထမံက်အာရုပ်ရဴဏောၚ်” သာ်ဝွံ သ္ဂးရ။

ပ္ဍဲကဵုကၠောန်လဝ်ပေါဲဆဵုဂဗ အဝ်ဂတ် ၃၁၊ အရာသၠုၚ်ပတိုန် ပရေၚ်ပံၚ်တောဲရေၚ်တၠုၚ်ပရေၚ်ပိုန်ဒြပ် ဗမာ-ကြုက်ဂှ် လ္တူရဲကၠုၚ်ကၠောန် ဓလိုက်တမ်ရိုဟ် ပရေၚ်ကူသာန်သွံရာန် ပ္ဍဲကဵုဍုၚ်ဗမာတံ ပရေၚ်ဂိလေၚ်ဆောံအာ ညံၚ်ဟွံဂွံက္တဵုဒှ်အာ ဂစာန်ကဵုဏောၚ် က္ဍိုပ်သ္ကိုပ်ပၞာန် ဟီုလဝ်ရ။

စိုပ်ဒဳဇြမ်ပါဏံမ္ဂး အပ္ဍဲကဵုဍုၚ်ဗမာ ကၠောန်အာပေါဲရုဲမာဲတုဲ အကာဲအရာ ပရေၚ်ဍုၚ်ကွာန်လေဝ်ဇြဟတ်ခိုဟ်တိုန် ဒေသလေဝ်ညိၚ်ဝပ်တုဲ ပၞော်အခေါၚ်အရာပရေၚ်ဍုၚ်ကွာန်တံလေဝ် ပဵုတဴတက်ကၠုၚ်ရောၚ် ဟီုလဝ်ရ။

တုဲပၠန် ဍုၚ်ကြုက်ဂှ်တှ်ေ ဓလိုက်လဝ်တမ်ရိုဟ် ပရေၚ်ပိုန်ဒြပ် ပ္ဍဲကဵုဍုၚ်ဗမာ ဂၠိုၚ်အိုတ်ဒှ်မံၚ်တုဲ ပၞောဝ်ကဵု ဍုၚ်ကၠုၚ်ဓလိုက်လဝ်တမ်ရိုဟ် ပ္ဍဲဍုၚ်ဗမာ ၅၃ မ္ဂး နွံမံၚ် အဆံၚ်ဒၞာဲ ၂ ရောၚ် က္ဍိုပ်သ္ကိုပ်ပၞာန် သ္ဂးလဝ်ရ။

နူကဵုဍုၚ်ဗမာ သၟဝ်တိ၊ လ္တူတိ၊ သယံဇာတဍာ်တံ၊ ရိုဟ်ကၞက်ဇြဟတ်မၞိဟ်တံကဵု ပရေၚ်ဓလိုက်တမ်ရိုဟ်ကြုက်တံ ပံၚ်အာမ္ဂး သွက်ၜါဍုၚ် သွဟ်ခိုဟ်ဟ် ထေၚ်ၚ်လဵုလဵု ဒးမံက်တိတ်ကၠုၚ်ဏောၚ် ညးဟီုလဝ်ရ။

ပြဟ်ဟ်ဏံ ပ္ဍဲကဵု ဒေသပယျဵု ဗမာ-ကြုက် ဟိုတ်နူ ပရေၚ်ဟွံညိၚ်ဝပ်တံတုဲ ပရေၚ်ပိုန်ဒြပ် ယူနာန်လေဝ် ယုတ်ဒေက်စှ်ေအာနွံမံၚ်ဂှ်ရ သွက်အရာညိၚ်ဝပ်ကဵု ပရေၚ်ဂီုကၠီု ဒေသပယျဵုၜါဍုၚ်ဏံ ကိုပ်ကၠာအိုတ် ဒးဖန်ဖက်ရေၚ်တၠုၚ်အာရောၚ် သ္ဂးရ။

သွက်အရၚ် ဒေသပယျဵု ကြုက်-ဗမာ ဂွံညိၚ်ဝပ်အာဂှ် ပံၚ်တောဲမ္ဒးစဵုဒၞာအာတုဲ သွက် မၞိဟ်ပူဂဵု၊ ဂကောံ၊ ပရေၚ်ဂီုကၠီုကိုန်အစဳဇန် ကြုက် မၞိဟ်မံၚ်အပ္ဍဲဍုၚ်ဗမာတံ ညံၚ်သ္ဂောံ ဒးချိုတ်ပၠိုတ်လဝ်ပေၚ်ၚ်ဏောၚ် သမ္မတ ယှဳကျေအ်ဖျေန် ဟီုလဝ်ရ။

နကဵုဍုၚ်ဗမာ ဇြဟတ်ပရေၚ်ဍုၚ်ကွာန်အပ္ဍဲဍုၚ် ဗွဲမသၠဲလး ညံၚ်ဂွံစန်ပကောံ ရေၚ်တၠုၚ်ကၠောန်အာ ပရေၚ်ညဳသာသၟဟ်သၟန် ရေၚ်သ္ကံတုဲ အရာ ကလေၚ်ထမံက်ပတိုန် ပရေၚ်ညိၚ်ဝပ်ကဵု ပရေၚ်ဖောအ်ဗြဳတံဂှ် ထံက်အာဂလာန်ဂှ် ဟီုဂးလဝ်ရောၚ် ပ္ဍဲဌာန်ပရိုၚ် သေန်ဟွာ ချူလဝ်ရ။

ဍုၚ်ကြုက်ကဵု ဍုၚ်ဇြဟတ်ဇၞော်တံဂှ် သွက်ဖဵုဍေံတံ အပ္ဍဲကဵုဍုၚ်ဗမာ အလဵုအသဳဒဳမဝ်ကရက်တေတ် မံက်တိုန်ကၠုၚ်ဂှ် ဟၟဲပၟိက်တုဲ ထံက်ဂလာန် လပါ်က္ဍိုပ်သ္ကိုပ်ပၞာန်ရဂှ် က္ဍိုပ်သ္ကိုပ်ကွးဘာ ကိုမေန်တွိုဲတေတ် သ္ၚဳဂၠိပ်ရ။

“ပ္ဍဲကဵုဍုၚ်ဗမာ ဂကောံညးဍုၚ်ကွာန် ဟွံဒးစိုတ် ဒပ်ပၞာန်ဏံ ဆက်နွံမံၚ်မ္ဂး ကြုက်ကီု ဍုၚ်သအာၚ်တၞဟ်ဟ်တံကီု ကပေါတ်သယံဇာတပိုဲတံဂှ် ၚုဟ်မးဂၠးကဝ်ဍာံဍာံဟွံသေၚ် ၜိုဟ်အနှေန်ဖျာ ၚုဟ်မးကမၠတ်ရ ဂွံမံၚ်။ ၚုဟ်မးၜိုတ်ဍေံတံကဵုရ ဂွံမာန်။

အလဵုအသဳညးဍုၚ်ကွာန်ရုဲစှ်လဝ် အလဵုအသဳဗဗွဲဓဝ်ဟွံသေၚ်တုဲ ပ္ဍဲကဵုပရေၚ်ကူသာန်သွံရာန်ကဵု ဍုၚ်ဂၠးကဝ်တံဂှ်လေဝ် ဒှ်အခက်အခုဲနွံမံၚ်။ တုဲပၠန် ပရေၚ်မာတ်ဆိုအ်ပိုန်ဒြပ်လေဝ် နွံမံၚ်။ ဟိုတ်ဂှ်ရ ပ္ဍဲအကာဲအရာဏံ ဍုၚ်ကြုက်ကဵု ဍုၚ်ဇၞော်ဇၞော်တံဗွဲမဂၠိုၚ်တံဂှ် ပ္ဍဲဍုၚ်ပိုဲဏံ အလဵုအသဳဒဳမဝ်ကရက်တေတ်မံက်တိုန်ကၠုၚ်ဂှ် ဟၟဲမံၚ်ပၟိက်။ မုဟိုတ်ရောတှ်ေ ဖဵုဂုဏ်ပရဲပရၚ်ဍေံတံ ယအ်အာမာန်မံၚ်” သာ်ဝွံ သ္ဂးရ။

ပ္ဍဲကဵုပေါဲဆဵုဂဗ အရာသၠုၚ်ပတိုန် ပရေၚ်ပံၚ်တောဲရေၚ်တၠုၚ်ပရေၚ်ပိုန်ဒြပ် ဗမာ-ကြုက်ဏံ ပ္ဍဲကဵုထပက်လဝ် လိက်ကသုက် ပရေၚ်ဓဝ်ကၠိုဟ်ခၠၚ် MoU တံဂှ် အကြာ ဌာနဝန်ဇၞော်လလောၚ်ပရိုၚ် ရမျှာၚ်ဗမာကေုာံ ရုပ်ရမျှာၚ် ကေုာံ ဌာန်ပရိုၚ်အေဂျေန်သဳ သေန်ဟွာတံလေဝ် ချုက်လဝ်လိက် ပရေၚ်ပံၚ်တောဲတံ နွံရ။

ဂကောံ ကမၠောန်အဇာဍောတ်ကဵုအဇာဇၞော် ဍုၚ်ကြုက်(CASME) ကေုာံ ဂအုပ်ဂကောံတၠဗၞိက်ဂမၠိုၚ်ကဵု တၠပိုန်ဒြပ်ကွတ်တဲကွတ်စက်ဍုၚ်ဗမာ (UMFCCI) တံကီု ဂကောံပရေၚ်ပံၚ်တောဲရေၚ်တၠုၚ်ကဵု ပရေၚ်ဖောအ်ဗြဳတဴတက် ဗမာ-အေန္ဒိယ- ကြုက် (MICA) တံလေဝ် ထပက်လဝ်လိက်ကသုက် ပရေၚ်ဓဝ်ကၠိုဟ်ခၠၚ် MoU တံရ။

တုဲပၠန် အကြာ ရွှေသံလွင်ဟိုးလ်းဒင်းကုမ္ပဏီလီမိတက်ကဵု China Harbor Engineering Co., Ltd. (CHEC) တံကီု ကာန်ပနဳဗမာ ၃ ကဵု ကာန်ပနဳကြုက် ၃ တံ ထပက်လဝ်လိက်ကသုက်ကီုရ။

ပရေၚ်ပံၚ်တောဲ ကြုက်ကဵု အေန္ဒိယတံ သီုဖအိုတ်တံဂှ်မ္ဂး ရံၚ်အာဂုဏ်ဖဵုမွဲဟေၚ်ရ ဒှ်တုဲ လပါ်ကဝ်မယှေန်ပၞာန်ဂှ်လေဝ် သွက်ပေါဲရုဲမာဲ ပရေၚ်ထံက်ဂလာန် ဗီုနွံပၟိက်တံ ညံၚ်ဂွံမာန် ကၠောန်အာလဝ် ပရေၚ်ကဵု-ကေတ် ညးသ္ကံဗီုဏံရ သာ်ဝွံ ညးခါတ်အကာဲပရေၚ်ဍုၚ်ကွာန်တံ ထံက်ထ္ၜးဟီုဂးမံၚ်ရ။

ပရိုၚ်-သြၚ်လောန်တိုၚ်

Photo – Social Media