ကအ်ကြိက်၊ သိပ်တမ်ပါ ၃
ဟိုတ်နူဒပ်ပၞာန် ထပက်ပၞာန် ပ္ဍဲတွဵုရးကရေၚ် ဒၞာဲသ္ကုတ်ဂၠံၚ်အာယှ ကအ်ကြိက်-ဗြဝတဳကဵု ဂၠံင်တြေံဒဵုဒဝ်န ဒဵုကဵု သိပ်တမ်ပါ ၂ အခိၚ်နူဂယး အကြာၜါလပါ် ပေါဲဗတိုက်ဆက်ဒှ်မံၚ်ဖိုအ်ရောၚ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စပ်ကဵုပရေၚ်ကူသာန်ဒေသပယျဵု ဒှ်မံၚ်ဒၞာဲအဓိကတံ သွက်ဂွံကလေၚ် ထိၚ်ချုက်အုပ်ဓုပ်အာမာန် ပ္ဍဲကဵုသ္ကုတ်ဂၠံၚ်အာယှ ကအ်ကြိက်-ဗြဝတဳကဵု ဂၠံၚ်တြေံတံဂှ် နူကဵုဒပ်ပၞာန် စနူဂိတုအဝ်ဂတ် သီုကဵုဇြဟတ်မၞိဟ် ကပေါတ်လွဟ် မကမ်နာနာ ပလံၚ်ဗစိုပ်နၚ်လဝ်ဇရေၚ်ဗဒိုပ်တမ်ဒပ် ဖျေံသ္ဇိုၚ် ဍုၚ်ကအ်ကြိက် တံတုဲ ကၠောန်လဝ် ပရေၚ်ထပေၚ်ဇြဟတ်ပၞာန် ဆက်က်ရ။
ဒပ်ကဝ်မယှေန်ပၞာန်ဝွံ သီုကဵုထပေၚ်ဇြဟတ် မၞိဟ်၊ လွဟ်မကမ်နာနာသာ်တုဲ လပါ်ဒၞာဲတိဍာ်ဒေသ ဒပ်ပံၚ်တောဲပၠန်ဂတးတံ သီဂွံလဝ်တံဂှ် ထပက်ကရောၚ်ပၞာန် ချဳဒရာၚ်ကၠုၚ်ဂှ်ရ ပ္ဍဲကရပ်ဍုၚ်ကအ်ကြိက် ဒၞာဲဂၠံၚ်အာယှကဵု လ္တူဂၠံၚ်တြေံ ဒဵုဒဝ်န လပါ်ကွာန်ယာန်ကုက်တေံ ပေါဲဗတိုက်ဇီုကပိုက် ဒှ်ကၠုၚ်လဝ်ရ။
သိပ်တမ်ပါ ၂ အခိၚ်နူဂယး ဒၞာဲသ္ကုတ်ဂၠံၚ်အာယှကဵု လပါ်ဂၠံင်တြေံဒဵုဒဝ်နတံ အဃော်ပေါဲဗတိုက်ဆက်ဒှ်အာမံၚ်ဂှ် ဒပ်ကဝ်မယှေန် ဖျေံလဝ်သ္ဇိုၚ် ဍုၚ်ဗြဝတဳ နူကဵု တမ်ဒပ် ၂၇၅ ဝွံ စွံပွန်ကဵု လပါ်တေန်ဂါန်ညဳနံၚ် ကဵု ဂၠံၚ်အာယှဂှ်တုဲ ရမျှာၚ်ပန်ကၠဟ်မံၚ်ကဵု လွဟ်ဇၞော်ဂမၠိုၚ် ဂွံမိၚ်မံၚ်ရောၚ် တမ်ရိုဟ်ကၞက် ညးဒေသတံ သ္ဂးရ။
တုဲပၠန် နူကဵုဒပ်ကဝ်မယှေန်ပၞာန် တမ်ဒပ်ခလရ ၂၇၅ ဂှ် ပတဝ်လဝ်က္ဍိုပ်ကု တေန်ဂါန်ညဳနံၚ်တုဲ ကရောၚ်ပၞာန်မွဲကရောၚ် ဘိုအ်ဂွံချဳဒရာၚ်အာ ပရေၚ်ပၞာန်ဂှ်လေဝ်ပရိုၚ်တိတ်မံၚ်ကီု လောန်ကၠုၚ်အဝ်ဂတ် ၁၈ တေံ နူကဵုမာတ်ထောံ ဒဒန်ပရေၚ်ဆာန်ကၟိန် စၟတ် ၂ ဂှ်တုဲ အပ္ဍဲဗွိုၚ်ဒဒန်ဝွံ ကောန်ပၞာန်ကဝ်မယှေန်ပၞာန် ကရပ် ၃၀၀ ကၠုၚ်စိုပ်ဖျေံလဝ်ဒပ်နွံရ။
သ္ကုတ်ဂၠံၚ်ကြုၚ်ဒဵု-ကအ်ကြိက်ဂှ် လောန်ကၠုၚ်ဂိတဂျူလိုင်တေံ ကလေၚ်သီကေတ်လဝ်တုဲ ဗွဲကြဴဏံ သွက်ဂွံကလေၚ်သီကေတ်အာ ဂၠံၚ်အာယှဂှ် ဖန်ဖက်ရေၚ်တၠုၚ်အာရောၚ် နူလပါ်ကဝ်မယှေန်ပၞာန် လလောၚ်ပတိတ်လဝ် ပရိုၚ်တုဲ သအာၚ်နူ ဂၠံၚ်ကြုၚ်ဒဵု-နဗူ သၟးဟွံက ဂၠံၚ်အာယှ၊ ပ္ဍဲဂၠံၚ်တြေံဒဵုဒဝ်နတံဂှ် သၠုၚ်ပတိုန်လဝ် အသိၚ်ပၞာန် ထပက်တံ ကၠောန်ကၠုၚ်မံၚ်ရ။
အကြာဏံ ပ္ဍဲပွိုၚ်ဍုၚ်ကအ်ကြိက် ပေါဲဗတိုက်သ္ကာတ်မြဟ် ဆက်ဒှ်မံၚ်တုဲ လပါ်သၠုၚ်ကျာ ပွိုၚ်ဍုၚ်ဗြဝတဳ ဗ္ဒိုပ်ဗျူဟာ ဒပ်ကဝ်မယှေန်ပၞာန် နွံမံၚ်ကရပ်ဍုၚ် ဝဝ်လေဝ် ဂှ်လေဝ် ဒပ်ပံၚ်တောဲပၠန်ဂတး KNLA မဟာဒပ် ၆ တံ ဆက်တုဲ မာတ်ဆိုအ်ကောံဗိုၚ် ဗတိုက်မံၚ်ဖိုအ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media