မဝ်သကဝ်၊ သိပ်တမ်ပါ ၂
သွက်သ္ဂောံဂွံ ပ္ဍဲယူခရုၚ်မာန် ပရေၚ်သမ္မတအမေရိကာန် ဒဝ်နေဝ်ထရ ဂစာန်မံၚ်တံဂှ် ဍုၚ်ဇြဟတ်ဇၞော် သမဂ္ဂယူရောပ် တာဒၞာမံၚ်ရောၚ် နကဵုယူခရုၚ် လက်ျှန်ဗီုပြၚ်နွံမံၚ်ပၟိက်ဍာံဍာံ ဒဵုကဵုအခိၚ်ထ္ၜးကၠုၚ် ဆက်ကၠောန်အာ ပရေၚ်လဝေင်ပၞာန်တံရောၚ်
ဟီုဂးဏာရ။
သွက်ဂွံဒေါအ်ထောံပေါဲပၞာန်ယူခရုၚ် ပရေၚ်ရတ်ယှာကဵု အမေရိကာန်တံ ဂိုတ်ဂစာန်မံၚ်တံဂှ် ဍုၚ်ယူရောပ်ဇြဟတ်ဇၞော် နွံပၟိက်ပၞာန်တံ တာဒၞာမံၚ်ရောၚ် ညးအခေါင်ဟီုဂးနွံ နန်ထဝ်ခရေန်မလေန် ဒဳမဳထရဳ ပက်သကိုတ်ဗ် ဟီုဏာကဵု အစာပရိုၚ် မဳဒဳယာ ဍုၚ်ရတ်ယှာတံရ။
”နကဵုပရေၚ်ဍုၚ်ကွာန် နကဵုနဲကူအမာတ်ကလုတ် ညံၚ်ဂွံသောၚ်ကလးပြဿနာ ပိုဲမၚ်မံၚ်ဂွန်ရ၊ ပ္ဍဲအရာ ဂစာန်သောၚ်ကလးအာမံၚ်ဏံ နူကဵုအလဵုအသဳကိဗ်တံ သဘဴလစွံစိုတ်ဗီုပြၚ်တုပ်မံၚ် ဟွံဂွံဆဵုညာတ်ဏီ။ ဟိုတ်ဂှ်ရ ပရေၚ်လဝေၚ်ပၞာန်တၟေၚ်ဂှ် ပိုဲဆက်ကၠောန်အာမံၚ်” သာ်ဝွံ ညးအခေါင်ဟီုဂးနွံ ပက်သကိုတ်ဗ်ဟီုဏာကဵု သ္ဂးလဝ်ရ။
အကြာ ရတ်ယှာထံက်ပၚ်လဝ် ရဲပါ်တိတ်နူယူခရုၚ်တံကဵု ဒပ်ယူခရုၚ်တံ ပ္ဍဲသ္ကုတ်ဗၟံက်ယူခရုၚ် ပေါဲဗတိုက် ပွိုၚ် ၈ သၞာံ ဒှ်ကၠုၚ်လဝ်တုဲ ပ္ဍဲသၞာံ ၂၀၂၂ ဂိတုဖေဖဝ်ဝါရဳဂှ် သွက်ဂွံၜက်ၜေတ်ဗတိုက်အာဍုၚ်ယူခရုၚ်ဂှ် သမ္မတရတ်ယှာ ဗလာဒဳမာပူတေန် ကဵုလဝ်အမိၚ်ရ။
ပြဟ်ဟ်ဏံ တိဍာ်ယူခရုၚ် ၜိုတ် ၅ ဂအုံ ၁ ဂအုံဂှ် ရတ်ယှာ ထိၚ်ချုက်ဂွံလဝ်တုဲ ယူခရုၚ်ပၠန်လေဝ် ထိၚ်ဂွံလဝ် တိဍာ်ရတ်ယှာ ညိညကီုရ။
နကဵုပူတေန်ဝွံ သွက်ယူခရုၚ် သွက်ၜိုဟ်လလမ် ပၟိက်ဟၟဲမံၚ် ဒဒှ်ရပတေဟ်ကေတ်လဝ်ဂှ် က္ဍိုပ်သ္ကိုပ်ယူရောပ်တံ ဟီုဂးရ။
ယဝ်ခါရ ဇကုဒှ်ကၠုၚ်သမ္မတမ္ဂး အပ္ဍဲပွိုၚ် ၂၄ ဂှ် ဗဒေါအ်ထောံပေါဲဗတိုက် ယူခရုၚ်ရောၚ် ညးမကြဵုဇာကၠုၚ်လဝ် နကဵုဒဝ်နေဝ်ထရလေဝ် ဂၠာဲမံၚ်သွဟ်ခက်မံၚ်ဏီတုဲ လ္တူရတ်ယှာ ကဵုအာပရေၚ်ကဵုဒုဟ်ဒဏ် ကၠောန်ပရေၚ်မာတ်ဆိုအ်ရေၚ် ကဵုလဝ်သတိရ။
နကဵုရတ်ယှာ သွက်ဂွံကေတ်အာပရေၚ်ၜိုဟ်လလမ် မၚ်လဝ်ဂွန် ၜိုန်ရပူတေန် ဟီုဂးလဝ်ကီုလေဝ် သီကေတ်ဂွံလဝ်တိဍာ် ပ္ဍဲယူခရုၚ်တံဂှ် ကလေၚ်ကဵုအာဟွံသေၚ်ရောၚ် သ္ဂးလဝ်ရ။
Ref:Reuters