လ္ဂုၚ်၊ သိပ်တမ်ပါ ၃
ညးဂမၠိုၚ်ဟီုဂးစမံၚ် ပေါဲရုဲမာဲ မၞုံကဵုသၠးပွးဓရ်ယာ အရၚ်ဘိုအ်ဂွံဒှ်ကၠုၚ်မာန် ဟၟဲကီုလေဝ် စနူဂိတုဒဳဇြမ်ပါ က္ဍိုပ်သ္ကိုပ်ပၞာန်တံ ကၠောန်အာပေါဲရုဲမာဲဂှ် အေန္ဒိယ ထံက်ဂလာန်တုဲ ဗလးနၚ် ဂကောံမင်ရံၚ် လ္ၚတ်ပေါဲရုဲမာဲရောၚ် ဟီုလဝ်နွံ နူကဵုမဳဒဳယာ ကဝ်မယှေန်ပၞာန် ထိၚ်ချုက်လဝ်တံ ပ္ဍဲသိပ်တမ်ပါ ၁ ဂှ် ချူပတိတ်ရ။
ဂကောံပံၚ်တောဲရေၚ်တၠုၚ်ယှာန်ဟိုၚ် ကၠောန်ဗ္ဒျ်လဝ် ပ္ဍဲဍုၚ်ကြုက်တေံ မ္ၚးဝိုၚ်သဳကၠဳ ပ္ဍဲကဵု အဝ်ဂတ် ၃၁ ဂှ် က္ဍိုပ်သ္ကိုပ်ပၞာန် မေန်အံၚ်လှိုၚ် ဆဵုဂဗလဝ်ကဵု သ္ကိုပ်ဝန်ဇၞော်အေန္ဒိယ နရာန်ဒရာ မိုဒဳ ရ။
သီအဝဵုတုဲ နူကဵုက္ဍိုပ်သ္ကိုပ်ဂၠးကဝ်တံ ပါဲလဝ်ဝိုၚ်ကဵု မေန်အံၚ်လှိုၚ်ဂှ် သွက်အရာ ကလေၚ်ဂွံဆက်ဆောံအာကဵု ပွဳဗွိုၚ်ဍုၚ်ဂၠးကဝ်တံမာန် ပ္ဍဲကဵုဝိုၚ်သဳကၠဳညးတံ ကၠောန်ၜိုတ်မံၚ်တံဂှ် ခြာဟွံလံဟွံလံ ကြုက်ကော်ဘိက်ကဵုမံၚ်ရ။
အခိၚ်ဆဵုဂဗလဝ်ကဵု မိုဒဳဂှ် သွက်ဒၞာဲပယျဵုၜါဍုၚ် ညံၚ်ဂွံၜိုဟ်သြိုဟ်ညိၚ်ဝပ်အာ၊ သွက်ဂွံသၠုၚ်ပတိုန် ပရေၚ်ကူသာန်၊ ပရေၚ်ဍုက်ကေဝ်ဒဒှ်ေဒယှ်ကဵု ပရေၚ်ပံၚ်တောဲရေၚ်တၠုၚ် ညံၚ်သ္ဂောံဇြဟတ်ခိုဟ်တိုန်အာ နူကဵု မေန်အံၚ်လှိုၚ် သဳကၠဳလဝ် ဂွံတီရ။
အလုံမွဲဍုၚ် ပ္ဍဲဒၞာဲဒေသသီုဖအိုတ် ကၠောန်ဗ္ဒျ်အာပေါဲရုဲမာဲရောၚ် ဒပ်ပၞာန်ဟီုလဝ်ကီုလေဝ် ဒၞာဲဒေသ ဍေံတံ ထိၚ်ချုက်လဝ်ဟွံမာန် ပ္ဍဲဒၞာဲဒေသဍုၚ်တံ သွက်ဂွံကၠောန်အာပေါဲရုဲမာဲဟီုဂှ် ဒှ်ဟွံမာန်ပုဟ်။
ဗော်ဂွံလဝ် ပရေၚ်ထံက်ဂလာန် ညးဍုၚ်ကွာန်ဂၠိုၚ်အိုတ်ဂှ် ညံၚ်ဟွံဂွံလုပ်ပေါဲရုဲမာဲ ဒၞာတာလဝ်တုဲမှ ကၠောန်အာပေါဲရုဲမာဲဂှ်တှ်ေ ဗီုလဵုမှ သွက်ဘိုအ်ဂွံဒှ်ကၠုၚ် ပေါဲရုဲမာဲမၞုံကဵု ပရေၚ်သၠးပွးဓရ်ယာ ဟွံမာန်ပုဟ်ဂှ် ညးလ္ၚတ်တံ ဟီုမံၚ်ကီုလေဝ် ဍုၚ်ဇၞော်ဇိုၚ်ဝုတ်ဒိုဟ်ၜါဍုၚ် ကြုက်ကဵု အေန္ဒိယတံ ထံက်ဂလာန်ရီုဗၚ်ကဵုလဝ်ရ။
ပေါဲရုဲမာဲတၟိ ပ္ဍဲကဵုဍုၚ်ဗမာဂှ် မၞုံကဵုပရေၚ်သၠးပွးဓရ်ယာရောၚ် စၟဳစလဝ်ရ နူကဵု ဌာနဝန်ဇၞော်ပရေၚ်ကေၚ်ကာ ဍုၚ်သ္အာၚ် အေန္ဒိယ ပ္ဍဲကဵုတၚ်လလောၚ်တြး အဝ်ဂတ် ၃၁ ချူလဝ်နွံရ။
အပ္ဍဲကဵုဝိုၚ်သဳကၠဳဏံ မေန်အံၚ်လှိုၚ် ဆဵုဂဗလဝ်ကဵု သမ္မတကြုက် ယှဳကျေအ်ဖျေန်ကီုတုဲ စပ်ကဵုပရေၚ်ပေါဲရုဲမာဲ သဳကၠဳလဝ်နွံ သာ်ဝွံ ပ္ဍဲကဵု မဳဒဳယာလျးဗမာ ပၞော်ပါၚ်ကဝ်မယှေန်ပၞာန်ဂှ် ချူပတိတ်လဝ်ရ။
ပၞောဝ်အာပွိုၚ်ဍုၚ် ၃၃၀ နွံမံၚ်ကီုလေဝ် အခိၚ်ကံက်စရၚ်မၞိဟ်တံဂှ်မှ ပ္ဍဲကဵု ၁၄၅ ပွိုၚ်ဍုၚ်ရဟေၚ် ဟိုတ်နူကံက်ကၠုၚ်မာန်တုဲ နကဵုဗီုပြၚ်သၞောတ်ဗ္ၜတ် အလုံသီုမွဲဍုၚ် သွက်ဂွံကၠောန်အာပေါဲရုဲမာဲဟီုဂှ် ဘိုအ်ဂွံဒှ်ကၠုၚ်မာန်ဟွံသေၚ်ပုဟ် သာ်ဝွံ ညးလ္ၚတ်တံ ဟီုရ။
Ref:The StraitsTimes