ၜံၚ်ကံက်၊ သိပ်တမ်ပါ ၁
နကဵုပွမဖံက်ပကဝ်ဝတ်တာလျိုၚ် လ္တူသ္ကိုပ်ဝန်ဇၞော် ဖေဝ်ထံၚ်ထာန် ယှေန်နဝါထရာဂှ် နူကဵုရုၚ်သၞောဝ်ဓရ် သ္ဇိုၚ်သၞောဝ်ဥပဒေ ပ္ဍဲကဵုအဝ်ဂတ် ၂၉ ဟိုတ်နူနုက်ပတိတ်ထောံဂှ် သွက်ဝင်ခေတ်ပရေၚ်ဍုၚ်ကွာန် ကၟိန်သ္ၚိဌာန် ယှေန်နဝါထရာတံ ပရေၚ်ဇီုကပိုက်ဇၞော်ကဵုဇြဟတ်မွဲတၚ် ဒှ်အာတုဲ ပရေၚ်ရုန်မဵုပြိုၚ်ပကာန်အဝဵု က္တဵုဒှ်ကၠုၚ်မာန်ရောၚ် ညးလ္ၚတ်တံ ဟီုရ။
ဖေဝ်ထံၚ်ထာန်ဝွံ ပၞောဝ်ကဵုသ္ကိုပ်ဝန်ဇၞော်သေံတံမ္ဂး အယုက်ဍောတ်အိုတ်ဒှ်တုဲ အကြာသၞာံၜါဗွဝ်စှ်ဏံ မၞိဟ်အစာကၠေမ် ဗဂေတ်မံၚ်ပရေၚ်ဍုၚ်ကွာန်သေံတံ ပ္ဍဲကဵုအရာပြိုၚ်ပကာန် ဓလူဒစုက်ပၠံၚ်မံၚ်အဝဵုဏံ ရဲဒပ်ပၞာန်ကဵု ဌာနသၞောဝ်ဓရ်တံ ပါဲတးဏာ မဟာသေဌဳဗဳလျာန်နာ ကၟိန်သ္ၚိဌာန် ယှေန်နဝါထရာ ဟွံသေၚ်မ္ဂး သ္ကိုပ်ဝန်ဇၞော် လၟေၚ် ၆ ကၟိန်သ္ၚိဌာန် ယှေန်နဝါထရာ ထံက်လဝ်ဂလာန်တံရ။
ပ္ဍဲစၠတ်ထဝ် ၜိုန်ရညးစၞးအမာတ်အောန်ကီုလေဝ် ပဵုၜက်နူကဵုညးတၞဟ်ညိတုဲ ဗော်ဖူထာဲ ဖေဝ်ထံၚ်ထာန်တံ ဂွံလဝ်အဝဵုဝွံ ဟိုတ်နူသ္ဂုတ်သွာတ် ရုၚ်သၞောဝ်ဓရ်ဖျေံဏာဗီုဏံဂှ်တှ်ေ ပရေၚ်ဂွံရုဲစှ်ပတိုန်အာ သ္ကိုပ်ဝန်ဇၞော်တၟိ သွက်စၠတ်ထဝ် ဂၠံၚ်ဍာန်ပံက်အာယျ။
ပြဿနာပယျဵု ဍုၚ်ခမေန် က္တဵုဒှ်အာတုဲ စပ်ကဵုပရေၚ်ဟီုဂးတက်လဝ်ကျာအပ္ဍဲဖုၚ် ကုက္ဍိုပ်သ္ကိုပ်ခမေန်တြေံ ညးသြဇာဇၞော် ဟန်သာန် ပ္ဍဲဂိတုဂျောန်တေံ ဖေဝ်ထံၚ်ထာန်ဟီုဂးလဝ်တံဂှ် ဖံက်လဝ်ဝတ်တာလျိုၚ်ရောၚ် နူကဵုရုၚ်သၞောဝ်ဓရ် သ္ဇိုၚ်သၞောဝ်ဥပဒေသေံ ဖျေံသ္ဂုတ်သွာတ်တုဲ ပတိတ်ထောံ ဍေံရ။
သ္ဂုတ်သွာတ်ရုၚ်သၞောဝ်ဓရ် တိတ်ကၠုၚ်တုဲ ခြာဗၞတ်ပွိုၚ်နာဍဳဂှ် နူကဵုအလဵုအသဳပံၚ်ကောံ ဖေဝ်ထံၚ်ထာန် ညးမနုက်တိတ်အာ အနုတေန် ဇျှာန်ဗဳကူလ် က္ဍိုပ်သ္ကိုပ်ဗော် ဗောန်ဂျိုၚ်ထာဲဝွံ ပ္ဍဲပွိုၚ်ပန်ဂိတုဏံ ပလီုကဵုစၠတ်ထဝ်ရောၚ် နကဵုဂတိပါၚ်ဟီုဂးတုဲ ညံၚ်သ္ဂောံဂွံ ပရေၚ်ထံက်ဂလာန်ဗော်ဂမၠိုၚ် အပ္ဍဲကဵုၜၚ်ကံက် အတန်အခၠန်အာကၠုၚ် ဗက်စန်ဒက်မံၚ်မာဲရ။
ညးမဒှ်ကောန်ဝုတ် မဟာသေဌဳဗဳလျာန်နာ သ္ကိုပ်ဝန်ဇၞော်တြေံတက်သေန် နွံအယုက် ၃၉ သၞာံ ဖေဝ်ထံၚ်ထာန်ဝွံ ကၠာဟွံစိုပ်အခိၚ် ဟိုတ်နူဒးဒုၚ်ပတိတ်ထောံ နူတာလျိုၚ် သ္ကိုပ်ဝန်ဇၞော်တုဲ စပ်ကဵုပရေၚ်ဍုၚ်ကွာန်သေံဂှ် ဟွံတိုန်ဟွံစှ်ေ အကာဲအရာဒေါအ်ဒေၚ်အာ မာန်ရောၚ် နူကဵုတက္ကသိုလ် ချူလာလၚ်ကောန် ညးလ္ၚတ်ပရေၚ်ဍုၚ်ကွာန်တံ ဟီုရ။
ညးထံက်ဂလာန် ကၟိန်သ္ၚိဌာန် ယှေန်နဝါထရာ သ္ကိုပ်ဝန်ဇၞော်တြေံ သရဳသာ သာဗဳသေန် ဒးဒုၚ်ပတိတ်တုဲ ခါန်ကၞက်စုတ် ဖေဝ်ထံၚ်ထာန် နကဵုသ္ကိုပ်ဝန်ဇၞောန်ဂှ် အပ္ဍဲကဵု လောကပရေၚ်ဍုၚ်ကွာန်သေံမ္ဂး အရာညးဂမၠိုၚ်ဒးဟီုဂးပါ်ပါဲကၠုၚ်ဒှ်အာတုဲ ဗီုလၟုဟ် ဒးဒုၚ်ပတိတ်ထောံ ဒှ်ကၠုၚ်ရ။
ပ္ဍဲကဵုပြဿနာပယျဵုဂှ် အတိုၚ်ပၟိက်စိုတ် ခမေန်တံ ညံၚ်ရဴ ဖေဝ်ထံၚ်ထာန် ဖန်ဖက်ရေၚ်တၠုၚ်ကဵုလဝ်ရောၚ် ကောန်ဍုၚ်သေံတံ ပတေဟ်ကေတ်လဝ်နွံရ။
Ref:Reuters