မတ်မလီု၊ သိပ်တမ်ပါ ၃
ပ္ဍဲကဵုတွဵုရးမန် ပေါဲရုဲမာဲ ကဝ်မယှေန်ပၞာန်သီအဝဵုကၠောန်အာဏံ ဗော်ပရေၚ်ဍုၚ်ကွာန် ၁၁ ဗော် လုပ်ပြိုၚ်ရောၚ် အတိုၚ်လလောၚ်တြး ကဝ်မယှေန်ပေါဲရုဲမာဲကၟိန်ဍုၚ် UEC သၟဝ်တဲကဝ်မယှေန်ပၞာန်ဂှ် ဂွံတီကေတ်ရ။
အပ္ဍဲဒေသ ပေါဲရုဲမာဲကဝ်မယှေန်ပၞာန် ကၠောန်ဏံဂှ် ဗော်စန်ဒက်အလုံကၟိန်ဍုၚ် ၉ ဗော်ကဵု ဗော်စန်ဒက်အပ္ဍဲတွဵုရး ၂ ဗော်တံ သွက်ဂွံလုပ်ပြိုၚ်အာရောၚ် ဂွံပရိုၚ်ရ။
အပ္ဍဲကဵု ဗော်စန်ဒက်အလုံကၟိန်ဍုၚ်တံဂှ်မ္ဂး ဗော်ပျဳခိုင်ဖျိုဝ်၊ ဗော်တစည၊ ဗော် ပြည်သူ့ရှေ့ဆောၚ်ပါတီ၊ ဗော် အမျိုးသားနိုင်ငံရေး ဒီမိုကရက်တစ်ပါတီ၊ ဗော် သေံကဵု ဗော်ဒီမိုကရက်တစ် (ဗော်ကၠဗု)၊ ဗော် မြန်မာနိုင်ငံတောင်သူ လယ်သမား ဖွံ့ဖြိုးတိုးတက်ရေးပါတီ၊ ဗော် အမျိုးသား ဒီမိုကရေစီအင်အားစုပါတီ ကေုာံ ဗော်ညးဗြဴ(မန်) တံ ပါလုပ်ရ။
တုဲပၠန် အပ္ဍဲကဵု ဗော်စန်ဒက်အပ္ဍဲတွဵုရးဂှ်မ္ဂး ဗော်ညဳသၟဟ်မန်ကဵု ဗော်တဴတက်ကောန်ဂကူပအိုဝ် မပ္တံနူဗော်သ္ပလဝ်သ္ဇိုၚ် တွဵုရးဍုၚ်မန်တံ လုပ်ပြိုၚ်အာရောၚ်ဂှ် နကဵုတၚ်နၚ် လလောၚ်တြး ကဝ်မယှေန်ပေါဲရုဲမာဲကၟိန်ဍုၚ် UEC သၟဝ်တဲကဝ်မယှေန်ပၞာန်ဂှ် ဂွံတီလဝ်ရ။
ဗော်မလုပ်ပြိုၚ်အာ ပေါဲရုဲမာဲကဝ်မယှေန်ပၞာန်တံဂှ်မ္ဂး သွက်ဂုဏ်ဖဵု က္ဍိုပ်သ္ကိုပ်ဗော်ညးတံရ ဒှ်မာန်တုဲ ဝင်ပရေၚ်ဍုၚ်ကွာန်ညးတံဂှ် ကု ဇကုညးတံဟေၚ် ဍံက်ဏာလဝ် အရံၚ်သာ်လစံက်ရောၚ်ဂှ် ညးစၞးစၠတ်ထဝ်တြေံ ဥူအံၚ်ကျဝ်တူ ပါ်ပါဲရ။
“တၚ်ပထမမွဲတၚ်ဂှ် သှ်ေနူဇုတ် ဒပ်ပၞာန်ကိတ်လဝ်တုဲတုဲ ဂွံကိတ်မံၚ်ညိညမဏီဟာ တၚ်ကူချပ်လဝ်နွံမာန်။ တုဲပၠန် က္ဍိုပ်သ္ကိုပ်ဗော်ညးတံ စပ်ကဵု ပရေၚ်ဂုဏ်ဖဵုပူဂဵု ဥက္ကဌဗော်ညးတံတုဲ ဍိုက်လဝ်ကဵုဇြဟတ်တံနွံမာန်။ ဝင်ပရေၚ်ဍုၚ်ကွာန်ညးတံဂှ် ကုဇကုညးတံရ ဍံက်ဏာအရံၚ်လစံက်။ ညံၚ်ရဴ လလောၚ်တြးဏာ ဗော်ညးလဵုချိုတ်တ် ချိုတ်ဟဍေံ အဲသှ်ေမံၚ်တှ်ေတုဲရ” သာ်ဝွံ သ္ဂးရ။
တုဲပၠန် နူကဵု ပေါဲရုဲမာဲ ကဝ်မယှေန်သီအဝဵုဏံ အလဵုအသဳမံက်တိုန်ကၠုၚ်ဂှ်တှ်ေ နွံမံၚ်သၟဝ်တဲ ပရေၚ်အထိၚ်အကြာပ် ကဝ်မယှေန်ပၞာန်ရတုဲ မုအရာလေဝ် တၟေၚ်ကၠုင်ဟွံသေၚ်ကီု ဗော်လုပ်ပြိုၚ်လဝ်တံပၠန်လဝ် နဒဒှ်ဗော် ဒးလေဲအာခတှ်ဝင်မွဲအယုက် သှ်ေၜက်အာရောၚ် ညးဆက်ဟီုလဝ်ရ။
ပရေၚ်ဍုၚ်ကွာန်ဂှ် နနဲပရေၚ်ဍုၚ်ကွာန်ဟေၚ် ဟိုတ်နူကဵု မိက်ဂွံအာဂှ်ရ မ္ဒးလုပ်ပြိုၚ်အာပေါဲရုဲမာဲဒှ်တုဲ အခက်အခုဲဗီုလဵုနွံနွံ အာကဵု နနဲပရေၚ်ဍုၚ်ကွာန်ဟေၚ် ဖျေံလဝ်သ္ဂုတ်သွာတ်ရ သာ်ဝွံ ဥူအံၚ်ကိုဝေန် ညးတာလျိုၚ်တွဵုရးမန် ဗော်ညးဍုၚ်ကွာန်( ပြည်သူ့ပါတီ) ဟီုရ။
“ပရေၚ်ဍုၚ်ကွာန်ဂှ် နဲပရေၚ်ဍုၚ်ကွာန်ဟေၚ်ရ ပိုဲတံမိက်ဂွံအာ။ ပေါဲရုဲမာဲမွဲ ဒှ်ကၠုၚ်ရတှ်ေ ပၞော်တိတ်ဒပ်ပၞာန်ဟီုဟီု ပၞော်တိတ်ညးဍုၚ်ကွာန်ဟီုဟီု ဗီုလဵုဟီုဟီု ပိုဲတံ ဂွံအလဵုအသဳမွဲဏောၚ်။ စၠတ်ထဝ်မွဲ မံက်ကၠုၚ်ဏောၚ်။ ပိုဲတံ အခက်အခုဲ ဒှ်ကီု ဟွံဒှ်ကီု ဂီုကၠီုနွံကီု ဂီုကၠီုဟၟဲကီုဒှ်ဒှ် ဂၠံၚ်ပိုဲဒးအာ နဲကဲပရေၚ်ဍုၚ်ကွာန်ဂှ် နကဵုနဲပရေၚ်ဍုၚ်ကွာန်ဟေၚ် သွက်ဂွံဒးအာ ဖျေံလဝ်သ္ဂုတ်သွာတ်ရ” သာ်ဝွံသ္ဂးရ။
ပေါဲရုဲမာဲ ကဝ်မယှေန်ပေါဲရုဲမာဲကၟိန်ဍုၚ် UEC ကဝ်မယှေန်ပၞာန်သီအဝဵု သ္ကုတ် ၁ ဂှ် သွက်ဂွံကၠောန်အာ ပ္ဍဲဒဳဇြမ်ပါ ၂၈ လလောၚ်တြးလဝ်တုဲ စပ်ကဵု လၟေၚ်ကမၠောန် ပရေၚ်ပေါဲရုဲမာဲတံဂှ် အဆက်ဆက်ရေၚ်တၠုၚ် ဖန်ဖက်မံၚ်ရ။
သွက်ပေါဲရုဲမာဲ တွဵုရးမန်ဂှ် ခုတ်စၟတ်လဝ် ဒၞာဲဒေသဆန္ဒမာဲ သီုကဵုအလုံ ၁၀ ပွိုၚ်ဍုၚ်တုဲ အပ္ဍဲဏံ ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံဂှ် နကဵုပေါဲရုဲမာဲသ္ကုတ် ၁ ကၠောန်ဗ္ဒျ်အာရောၚ် လလောၚ်တြးလဝ်ရ။
ဂကောံဇြဟတ်ပၠန်ဂတး နွံမံၚ်အပ္ဍဲဒေသတံဂှ်တှ်ေ လ္တူကဝ်မယှေန်ပၞာန် ကၠောန်အာကဵု ပေါရုဲမာဲအလီဏံ နကဵုညးဍုၚ်ကွာန် ညံၚ်ဟွံဂွံပါလုပ် ရေၚ်တၠုၚ်အာ ကေုာံ ဗော်ပရေၚ်ဍုၚ်ကွာန်တံပၠန်လေဝ် ညံၚ်ဟွံဂွံပံၚ်တောဲ ပါလုပ်အာ ဗတိုက်ဖအောဝ်လဝ်တုဲ နဲလဵုဒှ်ဒှ် ဒစဵုဒစး ဗတိုက်သရိုဟ်အာ ပေါဲရုဲမာဲရောၚ် ကဵုလဝ်သတိနွံရ။
ပရိုၚ်-သြၚ်လောန်တိုၚ်မ်
Photo – Social Media