ပေကျေန်၊ သိပ်တမ်ပါ ၄
နကဵုစၟတ်သမ္တီ ပေါဲအံၚ်ဇၞးဂျပါန် ပ္ဍဲပၞာန်ဂၠးကဝ်ဒုတိယ ပေၚ် ၈၀ သၞာံ ပ္ဍဲသိပ်တမ်ပါ ၃ ကၠာဟွံစိုပ် ပေါဲထ္ၜးပျးစရာဲကွတ်ပၞာန်ဏီဂှ် သမ္မတကြုက် ယှဳကျေအ်ဖျေန် ဟီုကြဴဇာဏာ “ဒၞာတာအာဍုၚ်ပိုဲ ဟွံဂွံပုဟ်” ဂှ်တုဲ လ္တူဍုၚ်ကေတ်ဇၞးသ္ပမာန်တံဂှ် ဖေက်မံၚ်ဟွံသေၚ်ပုဟ် ဟီုဂးဏာရ။
ပ္ဍဲကဵု သဘၚ်ဇၞော် ပေါဲထ္ၜးပျးစရာဲကွတ်ပၞာန်ဝွံ နကဵု ဗီုပြၚ်ဆက်ဏာမိတ် ညးတံထ္ၜးပတိတ်နၚ် ဇြဟတ်ပၞာန်ကြုက်တံ ရံၚ်အာလွဟ်လက်နက်ဂကူတၟိတံမ္ဂး လွဟ်လက်နက်လေသာတံ၊ ကမ်လှောဝ်ထိၚ်သၞေဝ်နျူကလဳယာတံ ကဵု ဒရုၚ်ဇၞော်သၟဝ်ဍာ်တံ ပါလုပ်ရ။
အပ္ဍဲအခန်ကၞာဏံ က္ဍိုပ်သ္ကိုပ်ကဝ်ရဳယာသၟဝ်ကျာ ကေန်ဂျုၚ်အာန်ကဵု သီုကဵု သမ္မတရတ်ယှာ ပူတေန် ကီု က္ဍိုပ်သ္ကိုပ်ဍုၚ်မ္ၚး ၂၆ တၠတံ တိုန်စိုပ်လဝ်ရ။
ဣဝွံ ယှဳကျေအ်ဖျေန်၊ ပူတေန် ကဵု ကေန်ဂျုၚ်အာန်တံ ဗွဲကိုပ်ကၠာအိုတ် အလန်ပထမ ပွမဆဵုဂဗလဝ်မွဲစွံတုပ်ပ်ရ။
နကဵုသၞောတ်ဒဳမဝ်ကရေသဳ ထာဲဝါန် ၜိုန်ရအုပ်ဓုပ်ပိုၚ်ပြဳလဝ်ဍုၚ်ဇကုကီုလေဝ် ဒေသညးတံပိုၚ်ပြဳလဝ်ဏောၚ် အတိုၚ်ကြုက်မဟီုလဝ်ဏံ သွက်ဂွံဗတိုက်အာထာဲဝါန်ဂှ် နူကဵုပေါဲထ္ၜးပျးစရာဲကွတ်ပၞာန်ဏံ ထ္ၜးဏာပၟတ်လေဝ် ဒှ်မာန် ညးလ္ၚတ်တံ ဟီုရ။
အခန်ကၞာပေကျေန် သမ္မတအမေရိကာန် တိုန်စိုပ်လဝ်ဟၟဲဏံဂှ် ဒှ်ပရေၚ်ဒက်ပ္တန်ပကောံဇြဟတ် သွက်ဂွံဒစဵုဒစး အမေရိကာန် ဒှ်မာန်ရောၚ် သ္ဂးရ။
နကဵုပရေၚ်ထပေၚ်ဇြဟတ် ဗျူဟာပရေၚ်စဵုဒၞာ ကြုက်ဂှ် ညးတံကၠောန်ပတိတ်စွံလဝ် ကမ်လှောဝ်နျူကလဳယာ ဗွဲမဂၠိုၚ်နွံတုဲ အပ္ဍဲကဵု ပေါဲထ္ၜးပျးစရာဲကွတ်ပၞာန်ဏံ ဂွံဆဵုညာတ်လဝ် ကမ်လှောဝ်တၟိတံ နွံရ။
ဆဂး ပ္ဍဲဂၠးကဝ်ဂှ် ဒပ်ဍာ်အမေရိကာန် ပိုၚ်ပြဳလဝ် ဂကောံၜၚ်ဇၞော်ဇၞော်ဖ္ဍိုက်ၜၚ်ကျာ နွံမံၚ်တုဲ နကဵုကြုက် ဂွံဗက်စိုပ် အမေရိကာန်မာန်ဂှ် နွံမံၚ်တၟာဂလိုၚ်ဏီရောၚ် ညးလ္ရတ်ပရေၚ်ပၞာန်တံ ဟီုရ။
ပ္ဍဲအကြာဏံ ပူတန်ကဵု ကေန်ဂျုၚ်အာန် ညးၜါဓဝ် သွက်ဂွံသဳကၠဳ စဳဇန်လဝ် ပ္ဍဲပေကျေန်ဂှ်လေဝ် ဌာန်ပရိုၚ် ရတ်ယှာပိုၚ်လဝ် TASS ချူပတိတ်လဝ်ရ။
အပ္ဍဲဂၠးကဝ်ဏံ ဥပဒေဂြိုပ် မံက်တိုန်ဟွံဂွံပုဟ် ယှဳကျေအ်ဖျေန် ဟီုလဝ်ကီုလေဝ် ဍုၚ်ပလိုတ်လဵုဂှ် ဟီုစၟတ်စုတ်လဝ်ယၟု ဟၟဲဏီပုဟ်။
ဆဂး အမေရိကာန်ဂှ် ဒှ်ဍုၚ်ကေတ်ဇၞးသ္ပမာန်ရောၚ် အခိၚ်ကၠာတေံ ညးတာလျိုၚ်ကြုက်တံ ကေၚ်စောဲစပ်ဟီုဂးလဝ် နွံရ။
Ref:BBC