ပေကျေန်၊ သိပ်တမ်ပါ ၄
သွက်ဍုၚ်ဗမာ အရာသ္ဂောံညိၚ်ဝပ်အာ ဂွံလဝ်တၚ်ဒုၚ်လျိုၚ် နူကြုက်ရောၚ် ကဝ်မယှေန်ပၞာန် ဟီုပတိတ်လဝ်တုဲ လ္တူသ္ပလဝ်စၟတ်သမ္တီကဵု ဂကောံပၞာန်ဂှ် ညံၚ်ဂွံဒေါအ်လဝ်ကၠာ နူအလဵုအသဳညဳသၟဟ်ကောန်ဂကူ NUG ပလံၚ်ဏာလိက် ဗတိုက်ဖအောဝ် ကုအလဵုအသဳကြုက်ဂှ် ပ္ဍဲသိပ်တမ်ပါ ၃ ကဵုလဝ်သမ္တီရ။
စပ်ကဵုက္ဍိုပ်သ္ကိုပ်ဂကောံပၞာန် အာစိုပ်လဝ်ဍုၚ်ကြုက်ဂှ်တုဲ နကဵု စၞးညးဍုၚ်ကွာန် ဍုၚ်ဗမာတံကဵု အလဵုအသဳ NUG ဂှ် ဝန်ဇၞော်ကၟိန်ဍုၚ် ဌာနပရေၚ်ကေၚ်ကာဍုၚ်သ္အာၚ် ဒဝ်ဇင်မာအံၚ် ပလံၚ်ဏာလဝ် လိက်ဗတိုက်ဖအောဝ် ၃ တၚ် ကုဇရေၚ်အလဵုအသဳကြုက် ပ္ဍဲသိပ်တမ်ပါ ၁ တေံရ။
ပ္ဍဲတၚ် ဗတိုက်ဖအောဝ်လဝ်ဂှ်တှ်ေ နကဵုဍုၚ်ကြုက် သ္ပလဝ်စၟတ်သမ္တီကဵု ဂကောံပၞာန်ဂှ် ညံၚ်ဂွံဒေါအ်လဝ်ကၠာ၊ ပရေၚ်မၚ်ရံၚ်လ္ၚတ်ပေါဲရုဲမာဲဂှ် ညံၚ်ဂွံတးပါဲထောံကီု ကေုာံ ညံၚ်ဂွံဒေါအ်ထောံ ဟီုဂးကော်ခဴစ သမ္မတယာယဳ ကုက္ဍိုပ်သ္ကိုပ်ပၞာန် တၚ်နၚ်တံ ပါလုပ်ရ။
တုဲပၠန် သွက်ပရေၚ်ၜိုဟ်လမ်ဍုၚ်ဗမာကဵု ညံၚ်သ္ဂောံကလေၚ်ဂွံ ပရေၚ်ဖောအ်ဗြဳ တဴတက်မာန် နကဵုသဘဴအခန်ကဏ္ဍ လပါ်ခိုဟ် ဍုၚ်ကြုက် ပါလုပ်မံၚ်ဖိုအ်ရောၚ် နကဵုအလဵုအသဳ NUG ပတေဟ်ကေတ်လဝ် သာ်ဝွံ ချူလဝ်ရ။
ညးဍုၚ်ကွာန်ဍုၚ်ဗမာတံ ၜိုန်ရဟၟဲပၟိက်ကဵု က္ဍိုပ်သ္ကိုပ်ဂကောံပၞာန်ကီုလေဝ် နကဵုဍုၚ်ကြုက် ဘိက်ပၟိၚ်ဏာလဝ်ဂှ်တှ်ေ ညံၚ်ရဴကောန်ညးဍုၚ်ကွာန်တံ ဂွံကလေၚ်ပလန်စဵုစးအာ ဒှ်မံၚ်ပရေၚ်ကော်ဘိက်တုဲ အကြာညးဍုၚ်ကွာန် ၜါဍုၚ်တံ ပရေၚ်ဆာန်ကၟိန်ဍုက်ကေဝ် ဗိုန်ဇၟအ်ကၠုၚ်လဝ် သၞာံမလံလ ကာဖာတေံဂှ် ယုတ်ဒေက်အာမာန်ရောၚ် ချူလဝ်ရ။
ဆန္ဒညးဍုၚ်ကွာန်ဟွံပါမွဲသာ် သၟဝ်ပရေၚ်ထိၚ်ကြာပ် ဍဵုဍိုက်လဝ်တံ သွက်ဂွံကၠောန်ဗ္ဒျ်အာ ပေါဲရုဲမာဲအလီဂှ် ဂကောံပၞာန် ဖန်ဇန်မံၚ်ရောၚ် ထပ်ချူစုတ်လဝ် ပ္ဍဲလိက်ဏံရ။
အလဵုအသဳညဳသၟဟ်ကောန်ဂကူ၊ ဂကောံကောန်ဍုၚ်အရၚ်ပၠန်ဂတးရပ်လွဟ် EROs တံကဵု ဒပ်စဵုဒၞာညးဍုၚ်ကွာန် PDF တံဂှ် ဂွံလဝ်ပရေၚ်ထံက်ဂလာန် ညးဍုၚ်ကွာန်တံ ပေင်င်တုဲ ဗတိုက်သရိုဟ်မံၚ် သၞောတ်တၠအဝဵုပၞာန်ဂှ်လေဝ် ပ္ဍဲကဵုလိက်ဏံ ဗတိုက်ဖအောဝ်ဏံ ချူလဝ်ကီုရ။
တုဲပၠန် ပတဝ်လဝ်ကဵု အနာဂတ် ဖိတ်ဒရေဝ်ဒဳမဝ်ကရေသဳတုဲ ပရေၚ်ညံၚ်ဂွံပါလုပ်သီုဖအိုတ် ပရေၚ်ညဳသၟဟ် ကေုာံ ဒုၚ်သ္ဇိုၚ်ကဵု လ္တူအခေါင်ကံကုသဵုဇကု ဇကုဖန်က်ကေတ်တ်မာန် ပရေၚ်ပေါဲအံၚ်ဇၞး ပၠန်ဂတး ပံၚ်ကောံတဝ်စၞေဟ်မံၚ်တံဂှ် သွက်ဍုၚ်ဗမာ ပရေၚ်ၜိုဟ်လလမ် ထာဝရ၊ အရာညိၚ်ဝပ် ကေုာံ ပရေၚ်တဴတက်ဖောအ်ဗြဳဍာ်ဇမၠိၚ် ညံၚ်သ္ဂောံဂွံအာမာန် ဒှ်ဂၠံၚ်ဍာန်ဂွံဖျေံစိုတ်ရောၚ် ပတေဟ်စလဝ် သာ်ဝွံ ကဵုလဝ်သမ္တီကီုရ။
ပရိုၚ်-သြၚ်လောန်တိုၚ်မ်
Photo – SAC