မတ်မလီု၊ သိပ်တေမ်ပါ ၄
အနှေန်ၚုဟ်မးထဝ်ဂၠးကဝ် ဟိုတ်နူဆက်သၠုၚ်တိုန်မံၚ်တုဲ ၚုဟ်ထဝ် အပ္ဍဲဍုၚ်လေဝ် ကလေၚ်သၠုၚ်တိုန်မံၚ်ဏောၚ် ညးတၠကမၠောန်ထဝ်တံ ဟီုကဵုဌာန်ပရိုၚ်သြၚ်လောန်တိုၚ်ရ။
ပ္ဍဲအဝ်ဂတ် သတ္တဟလက်ကြဴအိုတ်တေံ အနှေန်ၚုဟ်မးထဝ်ဂၠးကဝ် မွဲအံၚ်သ ဒဝ်ဠာအမေရိကာန် ပွဳပွူ ၃၃၇၀ နွံကီုလေဝ် စိုပ်သိပ်တမ်ပါ ၃ ဂှ် အနှေန်ၚုဟ်ထဝ်မွဲအံၚ်သ ဒဵုကဵုကရပ် ၃၅၃၀ ဒဝ်ဠာ သၠုၚ်တိုန်အာရ။
အနှေန်ၚုဟ်ထဝ်ဂၠးကဝ် သၠုၚ်တိုန်တုဲ ၚုဟ်ထဝ်အပ္ဍဲဍုၚ်ဂှ်လေဝ် ထဝ်ကလောအ် လျိုၚ်မွဲဒကေဝ်တှ်ေ နူကဵုဗဒါဲ ၇၄ ကိုတ်ဂှ် ဒဵုကဵု ၇၈ ကိုတ်ပြၚ် ဆက်က် သၠုၚ်တိုန်အာကီုရ။
အနှေန်ၚုဟ်ထဝ် အပ္ဍဲဍုၚ် ဟိုတ်နူဂွံသၠုၚ်တိုန်ဏံဂှ် ဟိုတ်နူ ၚုဟ်မးထဝ်ဂၠးကဝ် သၠုၚ်တိုန် ၜက်အာသၞောတ်ဗ္ၜတ်တုဲ ကလေၚ်တော်အာကဵု အနှေန်ထဝ်ဗမာမ္ဂး ပဵုနူဏံ ဘိုအ်ဂွံထပ်သၠုၚ်အာမာန်ဏီရောၚ် ညးတၠကမၠောန် ဆေၚ်ထဝ်မွဲတၠ ဟီုရ။
“အနှေန်ၚုဟ်ဂၠးကဝ် သၠုၚ်ၜက်တိုန်မံၚ် နူကဵုသၞောတ်ဗ္ၜတ်အိုတ်စောန်၊ ဆေၚ်စပ်မံၚ်ကဵု မူဝါဒပရေၚ်ပိုန်ဒြပ် ဍုၚ်အမေရိကာန်တုဲ စပ်ကဵုအကာဲအရာ ပရေၚ်ထတ်ယုက် ထရ ကောလဟောလံၚ် တိတ်ကၠုၚ်တုဲ မၞိဟ်ဂမၠိုၚ် ပကောံရာန်မံၚ်ထဝ်။ ဟိုတ်နူရာန်မံၚ်အိုတ်ဂှ်ရ အနှေန်ၚုဟ်ထဝ်ဂၠးကဝ် အရိုဟ်ဟ်တ္ၚဲ ဆက်တိုန်ကၠုၚ်မံၚ်” သာ်ဝွံ သ္ဂးရ။
အနှေန်ၚုဟ်မးထဝ်ဂၠးကဝ်ကီု သီုကဵု ၚုဟ်ထဝ်အပ္ဍဲဍုၚ်ကီု သၠုၚ်တိုန်မံၚ်ကြာန်န်တုဲ နကဵုညးဍုၚ်ကွာန် ရဲရာန်ပကောံမံၚ်ထဝ်တံဂှ် ပ္ဍဲကာလဏံ ဗွဲတၟေၚ်ထေက်ကဵုဒးစွံလဝ်သတိကီု ပၟိက်ဟၟဲမ္ဂး လ္ပရာန်၊ ဒှ်မံၚ်အခိၚ်ကာလ ဒးမၚ်ရံၚ်အာဏောၚ် ညးဆက်ဟီုရ။
အပ္ဍဲကဵု ဗွဝ်ဖျာအပ္ဍဲဍုၚ်မ္ဂး ဟိုတ်နူအနှေန်ၚုဟ်မးထဝ် တိုန်သၠုၚ်အာကြာန်မံၚ်တုဲ ပရေၚ်သွံရာန် ဂံက်စှ်ေမံင်ဂှ်ကီု လ္တူအနှေန်ၚုဟ်ထဝ် သၠုၚ်တိုန်အာမံၚ် ဆက်က်ဗီုဏံဂှ်တှ်ေ ရဲဌာနဆေၚ်စပ် သၟဝ်တဲကဝ်မယှေန်ပၞာန်တံ မၚ်ရံၚ်မံၚ်ဏောၚ် ဂွံတီရ။
တ္ၚဲသိပ်တမ်ပါ ၃ ဂှ် အတိုၚ် ကမ်မတဳခုတ်စၟတ်ၚုဟ်မး သတ္တုဓါတ် (ထဝ်) ကဝ်မယှေန်ပၞာန် ခၞံပ္တန်လဝ်အနှေန်ထဝ် လျိုၚ်မွဲဒကေဝ်မ္ဂး သၠုၚ်ပတိုန်လဝ် သြန် ၅,၉၃၀,၀၀၀ ဒကေဝ်ကီုလေဝ် ပၞောဝ်အာကဵု အနှေန်ၚုဟ်ထဝ်ဖျာမ္ၚးတှ်ေ ခြာမံၚ်ကရပ် ၁၉ ကိုတ်ဏီရ။
ပရိုၚ်-သြၚ်လောန်တိုၚ်မ်
Photo – Social Media