မဝ်သကို၊ သိပ်တမ်ပါ ၅
နူကဵု ပွမပညဳပညပ်ကေတ်မွဲအဆံၚ် ဂၠံၚ်ဍာန်ပတုဲအာ ပေါဲပၞာန်ယူခရုၚ်မာန်ဂှ် ပဵုတုဲဒးစိုတ်ကီုလေဝ် သွက်ဂွံပတုဲပေါဲပၞာန် နဲကဲစကာဇြဟတ်မွဲဟေၚ် သှ်ေမံၚ်မ္ဂး အတိုၚ်နဲဂၠံၚ်ဍာန်ဏံ သွက်ဂွံစကာသုၚ်စောဲ အာဇြဟတ် မၚ်လဝ်ဂွန်တုဲတုဲရောၚ် သမ္မတဍုၚ်ရတ်ယှာ ဗလာဒဳမာပူတေန် ဟီုလဝ် ပ္ဍဲသိပ်တမ်ပါ ၃ ဂှ်ရ။
သွက်ကြုက် သွက်ဂွံဆက်စၠောံ ပိုက်ဂက်စ်တၟိ ဂွံတၚ်တုပ်စိုတ် လၟေၚ်တရဴပေကျေန် ချုက်လဝ်တုဲအာဂှ် ဗွဲကြဴပၞာန်ဂၠးကဝ်ဒုတိယတုဲ သွက်ဂွံဂၠာဲအာသွဟ် ပေါဲပၞာန်ဇၞော်အိုတ် အပ္ဍဲကဵု ဗလးတိယူရောပ်မာန် ဟိုတ်နူအမေရိကာန်တံ ဗွဲမယဵုလ္ဂူဂိုတ်ဂစာန်တုဲ ပ္ဍဲအကာဲအရာမွဲဂှ် ဂၠာဲသွဟ်ဆဵုရောၚ် ပတေဟ်ကေတ်လဝ် သမ္မတပူတေန် ဟီုရ။
နူကဵုပရေၚ်ပညဳပညပ်ကေတ်မွဲအဆံၚ် သောၚ်ကလး ပေါဲပၞာန်ယူခရုၚ်ဟွံမာန်မ္ဂး စကာသုၚ်စောဲဇြဟတ်တုဲ ညံၚ်ဂွံပတုဲထောံ မၚ်လဝ်ဂွန်တုဲတုဲ နွံမံၚ် ပူတေန် ဟီုကဵု အစာပရိုၚ်တံရ။
စပ်ကဵုတၚ်ရတ်ယှာတံ မအာတ်မိက်ကၠုၚ်လဝ် သၞာံမလံလကာဖာတေံ ညံၚ်သ္ဂောံဖအိုတ်ကၠေံထောံ ပွမပါ်ခြာဆက်ဆောံ ညးဟီုဂးအရေဝ်ရတ်ယှာ နွံမံၚ်ယူခရုၚ်တံကီု၊ ပွမဂိုတ်ဂစာန်မံၚ် ညံၚ်ဂွံ လုပ်ဂကောံပၞာန်နေတဝ်ဂှ် သွက်ဂွံဗလဲတဲဒေါအ်ထောံကီု ရမျှာၚ်ကျာ ပူတေန် ညိလေဝ်ဟွံယအ်အာဏီပုဟ်။
နကဵုသမ္မတယူခရုၚ် ဗိုလိုဒဳမာ ဇဳလန်သကဳ ကၠုၚ်မဝ်သကိုမ္ဂး ညးတေံမၚ်သဳကၠဳမံင်ရောၚ် ပူတေန် ဟီုရ။
ဆဂး ပရေၚ်သွက်ဂွံဆဵုဂဗအာ ဗီုဏံဂှ် မ္ဒးစဳဇန်လဝ်ခိုဟ်ဟ်တုဲ ဒးပတဝ်လဝ်က္ဍိုပ်ကဵု သွဟ်ခိုဟ်ဟ်တံရောၚ် ညးတေံ ဟီုရ။
ဒၞာဲညးၜါလပါ် ဂွံဆဵုဂဗအာ စၟတ်လဝ်ဍုၚ်မဝ်သကိုဂှ် ဘိုအ်ဂွံဒုၚ်တဲဟွံမာန် ဒှ်မံၚ်ရောၚ် ဝန်ဇၞော်ပရေၚ်ကေၚ်ကာဍုၚ်သ္အာၚ် ယူခရုၚ် သ္ဂးရ။
သွက်ဂွံဆဵုဂဗသဳကၠဳအာကဵု ပူတေန် နကဵုသမ္မတ ဇဳလန်သကဳ ကဵုဇြဟတ်ဟရိုဟ်အာတ်မိက်မံၚ်ကီလေဝ် အကြာၜါလပါ် ဂွံဆဵုဂဗမာန်ဂှ် သ္ၚောဲမံၚ်အိုတ်စောန်ဏီ။
ဍုၚ်ပလိုတ်တံ ဟိုတ်နူဖျေံဒဏ်မာတ်ဆိုအ်လဝ်ဂှ် လက်ျှန်ပရေၚ်ပိုန်ဒြပ်ရတ်ယှာ ယုတ်ဒေက်ကၠုၚ် အခိၚ်ဂွံဆဵုညာတ်မံၚ်ဏံ သွက်ဂွံသောၚ်ကလးအာ ပဋိပက္ခ နနဲပရေၚ်ကလုတ်ဂှ် ပဵုတုဲနွံမံၚ်ပၟိက် ပူတေန်ဟီုဂးကၠုၚ်ရ။
ဒေသယူခရုၚ် ပန်ဒၞာဲဂှ် ဟပၠုပ်ထောံ အပ္ဍဲတိဍုၚ်ပိုဲယျ အခိၚ်ရတ်ယှာတံ ဟီုဂးမံၚ်ဏံ ပရေၚ်ဏံဝွံ ဗီုပြၚ်ခေတ်ကဝ်လဝ်နဳတၟိ ပွမသီကတ်တိဍာ် ဟွံဗဗွဲလုပ်သၞောဝ် ဒှ်မံၚ်ရောၚ် ဍုၚ်ပလိုတ်တံ ဟီုဂးလဝ်ရ။
Ref:Reuters