ဍာ်ဗု၊ သိပ်တမ်ပါ ၅
ပ္ဍဲရးတနၚ်သဳ ပွိုၚ်ဍုၚ်ဍာ်ဗု ဒၞာဲသ္ကုတ်ဂၠံၚ် ရေဝ်-ထဝါဲဂှ် မာတ်လဝ်ဂၠံၚ် ၁၀ တ္ၚဲ ပေၚ်အာတုဲ ခၞေဝ်ကေဝ်နာနာတံ အုဲအေၚ်အာဂှ် ဒးကၠဟ်ထောံအိုတ်ရ သာ်ဝွံ ဂွံတီနူ ညးဒဳကွဳစက်ဖ္ဍိုက်ခၞေဝ်ကေဝ်တံရ။
လောန်ကၠုၚ်နူအဝ်ဂတ် ၂၅ တေံ အကြာသိပ်တမ်ပါ ၄ ဏံ အခိၚ်ဒးမာတ်ဆိုအ်ဒၞာတာလဝ် တတ်ကၠောံအာကၠုၚ်ဟွံဂွံတုဲ ခၞေဝ်ကေဝ်အုဲအေၚ်အိုတ်ဂှ် ဒးကၠဟ်ပသောၚ်ထောံလဝ် သ္ဂးရ။
ခၞေဝ်ကေဝ်စွံလံလံဟွံဂွံတံ မပ္တံ ကဝ်ဖဳဓုပ်၊ ခဍေၚ်ဟစး၊ ရာဲမုၚ်ညေၚ် ကေုာံ ကဖျုန်နာနာတံ အုဲအာအိုတ်တုဲ ဗွဲမဂၠိုၚ်ဂှ်ဒးကၠဟ်ထောံလဝ် ဒကဲဂၠံၚ်ဇၞော် သီုၜါစြေက်ကီု ဟွံပံက်ကဵု ဂၠံၚ်ဍာန်ဂှ် ညးဒဳကွဳစက် ဂၠံၚ်မာတ်မံၚ်တံ ဒၞာဲစဒၞာဲမံၚ်ဟၟဲ စိုပ်မံၚ်ဒဒိုက်အိုတ်ရဂှ် ညးဒဳကွဳစက် ခၞေဝ်ကေဝ်မွဲတၠ ဟီုကဵုသြၚ်လောန်တိုၚ်မ်ရ။
အခိၚ်မာတ်လဝ်ဂၠံၚ် တ္ၚဲလအ်အာဂှ်ရ သၟာဗၞိက်ခၞေဝ်ကေဝ်ဗွဲမဂၠိုၚ်တံ ဟိုတ်နူ ကပေါတ်ဆောံလေၚ်အာ ကျအာသီုဖအိုတ်တုဲ ဂတးစဴလေဝ်ဟွံဂွံ ဒးဆဵုဂဗမံၚ်ကဵု ဒဒိုက်နာနာသာ်တံရ။
ညံၚ်ဂွံပံက်ကဵုဂၠံၚ် ရဲဒဳကွဳစက်တံ သဳကၠဳမံၚ်ကဵု ညးရပ်လွဟ်တံကီုလေဝ် ပရေၚ်ပြေပြံၚ်ဟၟဲဏီတုဲ ဂၠံၚ်ဒးဆက်မာတ်လဝ် ဖိုအ်ရ။
လပါ်ကဝ်မယှေန်ပၞာန်တံလေဝ် ထပ်ဗပေၚ်မံၚ် ဇြဟတ်ပၞာန်တံ နွံမံၚ်ဖိုအ်တုဲ ပရေၚ်ပၞာန် ဆက်ကြံၚ်မ္ၚိုဟ်မံၚ်တုဲ ပေါဲဗတိုက်တံလေဝ် ဒှ်မံၚ်ဖိုအ်ရောၚ် ဂွံတီရ။
စနူၜိုတ်အဝ်ဂတ် ၂၇ တေံတုဲ အပ္ဍဲကဵုပွိုၚ်ဍုၚ်ဍာ်ဗု ကရပ်ကွာန် ၆၀ တိုၚ်၊ သာယာမန်တံဂှ် ဒပ် KNLA ပံၚ်တောဲတံ နကဵုအကာဲအရာပရေၚ်ပၞာန် ဟိုတ်နူ မာတ်လဝ်ဂၠံၚ်ဂှ် ကပေါတ်ဗၞိက် ကၠုၚ်နူလပါ်ဍုၚ်လ္ဂုၚ်တံ ဟွံစိုပ်ဍုၚ်ထဝါဲတုဲ အနှေန်ကပေါတ် ၚုဟ်မးသၠုၚ်တိုန်တုဲ ကပေါတ်ပိုတ်မံၚ်အိုတ်ရ သာ်ဝွံသ္ဂးရ။
ဒၞာဲအကာဲအရာပၞာန် ကြံၚ်မ္ၚိုဟ်မံၚ် ကရပ်ဗ္ဒာဲကွာန် ၆၀ တိုၚ်၊ သာယာမန်တံဂှ် ကွဳစက်ဖ္ဍိုက်ကပေါတ်ကဵု ဖ္ဍိုက်ရဲအာတရဴ သီုလပါ်တိုန်လပါ်စှ်ေ ကွဳစက်ၜိုတ် ၅၀၀ မပြၚ် မာတ်မံၚ်အိုတ်ရ။
ပရိုၚ်-သြင်လောန်တိုၚ်မ်
Photo – Social Media