နေဗျဳတဝ်၊ သိပ်တမ်ပါ ၅
ပေါဲရုဲမာဲကဝ်မယှေန် သီအဝဵုကၠောန်အာဏံဂှ် လ္ပသ္ပစၟတ်သမ္တီညိ နူကဵု ဂကောံမှာဇန် ၃၀၀ ပြၚ် ပ္ဍဲကဵုသိပ်တမ်ပါ ၃ဂှ် ပလံၚ်လိက် ကုဇရေၚ်က္ဍိုပ်သ္ကိုပ်အာသဳယာန်တံ အရာကိစ္စဇၞော်တုဲ အာတ်မိက်လဝ်ရ။
သွက်ဂွံကၠောန်အာပေါဲရုဲမာဲ ၂၀၂၅ လ္တူကဝ်မယှေန်ပၞာန်စဳဇန်မံၚ်ဂှ် ဂကောံမှာဇန် ဍုၚ်ဂၠးကဝ် ၃၁၅ ဂကောံတံ ဒဒှ်ရ ပေါဲရုဲမာဲအလီ လလောၚ်တြးလဝ်တုဲတုဲရောၚ် ပ္ဍဲလိက်ကဵုဗစိုပ်လဝ် က္ဍိုပ်သ္ကိုပ်အာသဳယာန်တံဂှ် ချူလဝ်ရ။
ပေါဲရုဲမာဲကံၚ်သဳပၞာန်ဂှ် ဒစဵုဒစးမံၚ်ကဵု တၚ်အာသဳယာန်တုပ်လဝ်စိုတ် ၅ တၚ်ဂှ်တုဲ ပရေၚ်ကြေပ်ဂြတ်နာနာတံ ပဵုပရေအ်အာကီု ပဋိပက္ခဗမာဝွံ ဟိုတ်နူဘပဠမံၚ် ပရေၚ်ဂီုကၠီုအပ္ဍဲဒေသတုဲ နကဵုအာသဳယာန် ညံၚ်ဂွံကၠောန်အာဂံၚ်င် ကိစ္စဇၞော်မံၚ်ရောၚ် ဗတိုက်ဖအောဝ်လဝ်ရ။
ပေါဲရုဲမာဲ ၂၀၂၅ ဂှ် ဒှ်ဗဗွဲသၞောဝ်ဟွံသေၚ် ညးဍုၚ်ကွာန်ဟလိုၚ်တံ ညံၚ်ဂွံတီအာ နကဵုအာသဳယာန် ဒစးဒုၚ်တုဲ ညံၚ်ဂွံလလောၚ်တြးအာ၊ နဲကဲပညာကဵု ဆေၚ်စပ်ကဵု အရီုဗၚ်သြန်တံဂှ် နဲလဵုမှ လ္ပကဵုအရီုဗၚ်ညိ ကု ကဝ်မယှေန်ပၞာန် ကေုာံ လ္ပပလံၚ်ဗစိုပ်နၚ် ညးမၚ်ရံၚ်လ္ၚတ်ပေါဲရုဲမာဲညိဂှ် အာတ်မိက်လဝ်ရ။
တုဲပၠန် လ္တူက္ဍိုပ်သ္ကိုပ်ပၞာန်တံကီု ပရေၚ်ကမၠောန် ဆက်စပ်မံၚ်ကဵု သ္ၚိဌာန်ကၟိန်အိန်ထံၚ် ဍေံတံဂှ် စွံပွန်တုဲ ညံၚ်ဂွံကေတ်အရေဝ်ကီု ပ္ဍဲလိက်ချူပလံၚ်ဂှ် ဗတိုက်ဖအောဝ်လဝ် ဂွံဆဵုရ။
နဒဒှ်ညးစၞး ညးဍုၚ်ကွာန်ဍုၚ်ဗမာ NUG၊ NUCC ကဵု ယူနေတ်ဖိတ်ဒရေဝ်တံကီု၊ ဂကောံကောန်ဍုၚ်အရၚ်ရပ်လွဟ်တံဂှ် တိုက်ရိုက်ဆက်စၠောံ ကၠောန်အာထေက်ရောၚ် ကဵုလဝ်ကသပ်ကဵု အာသဳယာန်ကီုရ။
အရီုဗၚ်သွက်ညးဍုၚ်ကွာန်တံဂှ်လေဝ် နူကဵုဂၠံၚ်ဍာန် ဟွံဆက်စပ်ကဵု ကံၚ်သဳပၞာန်တံမွဲအဆံၚ်ဂှ် ထေက်ကဵုဒးပလံၚ်ဗစိုပ်ရောၚ် ဂကောံမှာဇန် ဍုၚ်ဂၠးကဝ် ၃၀၀ ဂကောံပြၚ်တံ ပလံၚ်လိက် ဗတိုက်ဖအောဝ်လဝ်ရ။
နကဵုကံၚ်သဳပၞာန်ဂှ် အလုံဍုၚ်ၜိုတ် ၂၁% ရ ထိၚ်ချုပ်လဝ်မာန်တုဲ ဒေသသှ်ေမံၚ်တံဂှ် အလဵုအသဳညဳသၟဟ်ကောန်ဂကူ NUG ကဵု ဂကောံကောန်ဍုၚ်အရၚ်ရပ်လွဟ်တံ အုပ်ဓုပ်စဵုဒၞာလဝ်ရောၚ် သ္ဂးရ။
မွဲလပါ်ပၠန် နူကဵုကဝ်မယှေန်ပၞာန် ကၠောန်လဝ်ပရေၚ်ပေါဲဗတိုက်ပၞာန်ကျာ ၇,၀၀၀ ပြၚ်တုဲ ဗက်ဘပဠမံၚ် ညးဍုၚ်ကွာန်တံဂှ် ရဲဒဴပၞာန် ၃ ဒဿမ ၅ ပြကောဋိကိုတ်ပြၚ် ဒးဂြိပ်ပါဲမံၚ်အိုတ်ရောၚ် ထံက်ထ္ၜးလဝ်ရ။
သၞောတ်တၠအဝဵုပၞာန်ဂှ် ညးဍုၚ်ကွာန်ဗမာတံ ပွိုၚ်ပန်သၞာံပြၚ် ဟိုတ်နူလုပ်မံၚ်ပေါဲဗတိုက် သ္ကာတ်မြဟ်တုဲ ဂုဏ်သိက္ခာ အာသဳယာန်မ္ဂးဂှ် ပွမဒတူလိုၚ် လပါ်ညးဍုၚ်ကွာန်တံ (ဝါ) တန်တဴမံၚ်ကဵု ပရေၚ်သ္ပစၟတ်သမ္တီကု ကဝ်မယှေန်ပၞာန်ရောၚ် သ္ဂးရ။
ဟိုတ်ဂှ်ရ တးပါဲထောံ ပေါဲရုဲမာဲလီဠာန်ဂှ်တုဲ ကၠောန်ၜိုတ်ဆက်ဆောံကု ညးစၞးလုပ်သၞောဝ်ဂှ်ဟေၚ် သွက်ဂွံသၠုၚ်ပတိုန် ပရေၚ်ညဳသာသၟဟ်န် အာသဳယာန်မာန်ကီု ကေုာံ သီုဂွံသၠုၚ်ပတိုန် ဂလာန်ပတှ် ဖျေံစိုတ်တံမာန်ရောၚ် ဂကောံဆေၚ်စပ်ကဵု ဒဳမဝ်ကရေသဳဍုၚ်ဗမာ အလုံဂၠးကဝ်မွဲ ထံက်ဂလာန် ထပက်လဝ်စၟတ်တဲ ပ္ဍဲကဵုလိက်ဏံရ။
ပရိုၚ်-သြင်လောန်တိုၚ်မ်
Photo – SAC/Asean