မတ်မလီု၊ သိပ်တမ်ပါ ၅
ပ္ဍဲတွဵုရးမန် သွက်ဂွံကၠောန်အာပေါဲရုဲမာဲ ကြပ်ကၠုၚ်ဟဍၚ် ရဲနွံသၟဝ်တဲ ကဝ်မယှေန်ပၞာန်သီအဝဵုတံ ကၠောန်ဖန်မံၚ် ပရေၚ်ပကောံကောန်ပၞာန်တၟိတံဂှ် ပဵုတုဲ ပရေအ်တိုန်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်တန်ဗတောန် ပရေၚ်ယိုက်ဝန်ပၞာန် လၟေၚ် ၁၇ ဂွံပံက်အာ ပ္ဍဲဂိတုသိပ်တမ်ပါဏံဂးတုဲ နဲလဵုဂွံဂွံ လ္တူသၟတ်တံဂှ် ရဲနွံသၟဝ်တဲကဝ်မယှေန်ပၞာန်သီအဝဵုတံ ဖန်ဖက်ပကောံမံၚ်ရ။
ပြဟ်ဟ်ဏံ ဂကောံအုပ်ဓုပ် အရာပ်/ကွာန် သၟဝ်တဲကဝ်မယှေန်ပၞာန်တံ ပလံၚ်ဗစိုပ်လိက်ရုၚ်ကော်တုဲ ပကောံမံၚ်ကီု၊ ဗက်ဂၠာဲရပ်ကေတ် ရဲတိတ်မ္ၚး အခိၚ်ဗ္တံတံဂှ်ကီု စနူကဵု ဗက်ရပ်ကေတ်မံၚ် ရဲအာကမၠောန် စဴနူကမၠောန်မ္ၚးမ္ၚးတံဂှ်ကီု ဖန်ဖက်ပကောံရပ်ကေတ်မံၚ် သွက်ကောန်ပၞာန်တၟိတံဂှ် ဂွံတီရ။
သွက်ဂွံပလံၚ်ကဵု ကောန်ပၞာန်တၟိတံမာန်ဂှ် ရဲသၟဝ်တဲကဝ်မယှေန်ပၞာန်တံ ဗက်ဂၠာဲရပ်မၞိဟ် အခိၚ်ဗတမ် ပဵုဂၠိုၚ်တိုန်တုဲ မၞိဟ်မွဲဓဝ်အာကမၠောန် အခိၚ်စဴနူကမၠောန်တံဂှ်လေဝ် စၟဳစၟတ်တုဲ မၞိဟ်သောၚ်မံၚ်တှ်ေ ကော်ပတိုန်ဏာလေဝ် နွံမံၚ်ရောၚ် ညးလ္တူဍုၚ်မတ်မလီုမွဲတၠ ဟီုရ။
“စပ်ကဵု ပကောံမံၚ်ကောန်ပၞာန်တၟိတံ ဗက်ရပ်မံၚ် နွံမံၚ်၊ အခိၚ်ဗ္တံ ဗက်ရပ်မံၚ် အခိၚ်ဗ္တံဂၠု ဗီုကၠာတေံဟီုတှ်ေ အခိင်ဗ္တံ ပယျာံသ္ဂါ၊ လၟုဟ်ဂှ် ၜိုတ် ၁၀ နာဍဳတှ်ေ ပ္ဍဲကဵုမတ်မလီု အကာဲအရာ ဟွံခိုဟ်ရ၊ ဍေံတံဂှ် ရံၚ်မံၚ်အကာဲမၞိဟ်၊ မၞိဟ်မွဲဓဝ် ဍိုက်ကၠုၚ် ကွဳလိုန်ဓါတ်ဟာ ဗီုတံဏံ၊ ညးလ္ၚဵုစဴနူကမၠောန် ကွာ်အာမံၚ်ဟကဲဂၠံၚ်တံ၊ ဍေံတံကၠုၚ်ကဵုကွဳစက်၊ ဗဒေါအ်ကွဳစက် ကရပ်မၞိဟ်တုဲ သၟာန်စၟဳစၟတ်ဗီုတေံဗီုဏံ ဒၞာဲဏံမၞိဟ်တံ သောၚ်မံၚ်တှ်ေ မွဲအလန်ဓဝ် ကော်ပတိုန်ဏာ လ္တူကွဳစက်ဟဂှ်ရ၊ ပရေၚ် ဗီုဗီုဏံဂှ် ပ္ဍဲမတ်မလီု က္တဵုဒှ်မံၚ် အရိုဟ်ဗ္တံ” သာ်ဝွံသ္ဂးရ။
သွက်ဂွံပကောံကေတ်ကောန်ပၞာန်တၟိတံဂှ် နနဲအဓ္ဓမအတေၚ် ရဲသၟဝ်တဲ ကဝ်မယှေန်ပၞာန်တံ ရပ်ကေတ်ဏာဗီုဏံတုဲ ရဲကၟိန်အိန်ထံၚ်တံဂှ်လေဝ် ဟွံကဵုအခေါင်ဆဵုညာတ်ကီု ဗီုဇကုကဵုဇကု ဂၠာဲသၟာန်သၟုက်ကေတ်တုဲမှ ဒဒှ်ရ ဒးဒုၚ်ပကောံလဝ် ကောန်ပၞာန်တၟိဂှ် ဂွံတီအာ သာ်ဝွံ ညးဆက်ဟီုရ။
သွက်ဂွံယိုက်ဝန်ပၞာန် ပရေၚ်ပကောံကောန်ပၞာန်တၟိမာန် သီုတ္ၚဲသီုဗ္တံ ရဲသၟဝ်တဲကဝ်မယှေန်ပၞာန်တံ ဗက်ရပ်မံၚ်သၟတ်တံကီု ဒၞာဲမ္ၚးမ္ၚးဇၟာပ်ဒၞာဲစုၚ်ၚ် ဟိုတ်နူဗက်ဂၠာဲရပ်ကေတ်မံၚ်တုဲ အကာဲအရာ သၟတ်တံ ဟွံဂံၚ်တိတ်မ္ၚး ဒှ်အာရဂှ် ညးဒေသၜဳလေၚ် မွဲတၠ ဟီုရ။
“လပါ်ဒေသဏံ ပန်ပွိုၚ်ဍုၚ်ဂှ် ပွိုၚ်ဍုၚ်ၜဳလေၚ် ပရေအ်အိုတ်ရ၊ လၟုဟ်တှ်ေ သီုဗ္တံသီုတ္ၚဲရလေဝ်၊ ကောန်ၚာ်တံ ကောန်မံၚ်တှ်ေ လုပ်စၟဳစၟတ် ရပ်ဏာဟဂှ်ရ၊ လမွဲတ္ၚဲတေံ ပ္ဍဲကၠအ်ပ္ကဴၜဳလေၚ် ကောံဗိုၚ်တုဲ ရပ်ဏာ၊ မွဲတ္ၚဲပၠန် မွဲအလန်အလန်ဂှ် သၞေဟ်ကၚ်လဒေါဝ်ဂှ် စၟဳစၟတ်တုဲ ရပ်ဏာ၊ အကြာဂၠံၚ် ၜဳလေၚ်ကဵု မုဟ်ဒဵု(တောင်စွန်း) ဂှ် ဗၠာဲသၟိၚ်တံကဵု ဒပ်မၚ်ကွာန်တံ ပံၚ်တုဲရပ်ဏာ၊ ပ္ဍဲကဵုသုသာန် ဇုတ်သုက်ဂှ် ပံက်သၞေဟ်ကၚ်တုဲ ဂဇအ်လဝ်၊ မၞိဟ်ဟွံသၚ်ကာတှ်ေ ရပ်ဏာဟဂှ်ရ၊ နကဵုသၟတ်တံ စိုတ်ဒးဂွိၚ်ဂွါဲမံၚ်ဂှ်တှ်ေ သီုဗ္တံသီုတ္ၚဲ ဒှ်မံၚ်အကာဲအရာ ဟွံဂံၚ်တိတ်မ္ၚး” သာ်ဝွံသ္ဂးရ။
တုဲပၠန် အတိုၚ်ဏံ ရဲသၟဝ်တဲကဝ်မယှေန်ပၞာန်တံ ဟိုတ်နူဗက်ဂၠာဲရပ်မံၚ်မၞိဟ်ကြာန်န်တုဲ သၟတ်အကြာဒေသတံ ဗွဲမဂၠိုၚ် ဟွံဂံၚ်မံၚ်တန်တဴတုဲ သၟတ်လ္ၚဵုတံ ၜိုတ်ဂြပ်ကသပ်နွံဂှ် ပံၚ်သွံထောံတုဲ နဗဗွဲသၞောဝ်ဟွံသေၚ် ဂြိပ်လုပ်အာ လပါ်ဍုၚ်သေံ ဂၠိုၚ်တိုန်ရဂှ် ညးဆက်ဟီုရ။
မွဲလပါ်ပၠန် သွက်တန်ဗတောန် ကောန်ပၞာန်တၟိ ညံၚ်ဂွံပေၚ် နူကဵုကဝ်မယှေန်ပၞာန် ကဵုမံၚ်ဇြဟတ်ဟရိုဟ်ကဵု ဂကောံအုပ်ဓုပ် အရာပ်/ကွာန် သၟဝ်တဲဍေံတံဂှ်တုဲ အတိုၚ်လၟိဟ်ချိၚ်လဝ် မၞိဟ်ပကောံကဵုလဝ်ဟွံမာန်တံဂှ် ကလေၚ်နုက် ပလှ်ေပတိတ်ထောံ နူဍေံတံကဵုလဝ်တာလျိုၚ်ဂှ် ကၠောန်ဖန်မံၚ်နွံ ဂွံတီလဝ်နူကဵု ဂကောံအုပ်ဓုပ် အရာပ်/ကွာန်တံရ။
ပြဟ်ဟ်ဏံ ရဲသၟဝ်တဲကဝ်မယှေန်တံဂှ် ပေါဲရုဲမာဲဏံ ကြပ်ကၠုၚ်ဟဍၚ် ပရေၚ်ပကောံမံၚ်ကောန်ပၞာန်တၟိ သၟးဟွံက သီုကဵုသွက်ပရေၚ်ဂီုကၠီုပေါဲရုဲမာန်ကီု ဒးဟပဵုပကောံမံၚ် ကောန်ပၞာန်တၟိတံ နွံမံၚ်တုဲ နကဵုဗီုပြၚ်နဲကဲနာနာ လ္တူသၟတ်တံ ရပ်မံၚ်ပဝ်တာလေဝ် အကာဲအရာပရေအ်လောန် က္တဵုဒှ်မံၚ်ရောၚ် ညးဒေသတံ ဟီုရ။
အတိုၚ်တၚ်နင် ဌာန်ပရိုၚ် သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲကဵုတွဵုရးမန် ကဝ်မယှေန်ပၞာန် လၟေၚ်ၚ်ဂိတု ပံက်ကၠုၚ်လဝ် တန်ဗတောန်အရာယိုက်ဝန်ပၞာန် နူလၟေၚ် ၁ ဒဵုစိုပ်လၟေၚ် ၁၆ ဂှ် ပကောံဂွံလဝ်ကောန်ပၞာန်တၟိ ၂၇၀၀ ပြၚ်နွံမံၚ်ရ။
ပရိုၚ်-သြင်လောန်တိုၚ်မ်
Photo – MOI