ဗြဝတဳ၊ သိပ်တမ်ပါ ၆
ပေါဲရုဲမာဲ ကဝ်မယှေန်ပၞာန်သီအဝဵု ကၠောန်အာဏံ ထံက်ဂလာန်ပေၚ်ၚ်တုဲ ကဵုအာအရီုဗၚ်ရောၚ် ဂကောံကဵုကသပ်ဗဟဵု ပရေၚ်ကောပ်ကာဲ ဒပ်မၚ်ပယျဵု (တွဵုရးကရေၚ်) BGF လလောၚ်တြးလဝ် ပ္ဍဲသိပ်တမ်ပါ ၃ ရ။
စိုပ်ဒဳဇြမ်ပါဏံ သွက်ဂွံကၠောန်အာ ပေါဲရုဲမာဲ ဍုၚ်ဗမာဝွံ ပတဝ်အာက္ဍိုပ်ကဵု သၞောတ်ဒဳမဝ်ကရေသဳ သွက်အနာဂတ် ဍုၚ်ဗမာ၊ သွက်ဂွံဖန်ဗ္ဒျ် ဘဝညးဍုၚ်ကွာန်တံ ဂွံညိၚ်ဝပ်ၜိုဟ်လလမ်အာမာန် ဒှ်မံၚ်အရာပၟိက်ဇၞော်မံၚ်ဂှ် ကၠိုဟ်ခၠၚ်ဒုၚ်ကေတ်လဝ်ရောၚ် ဒပ်မၚ်ပယျဵု (တွဵုရးကရေၚ်) ဟီုပတိတ်နၚ်ရ။
နကဵု ဒပ်မၚ်ပယျဵု တွဵုရးကရေၚ် BGF ဝွံ အပ္ဍဲပေါဲရုဲမာဲ ကၠောန်အာလၟုဟ်ဏံ လ္တူဗော်ပရေၚ်ဍုၚ်ကွာန်နာနာတံ ပရေၚ်ပါ်ခြာဟွံစွံလဝ်တုဲ ပရေၚ်ဓရ်ယာနွံနွံ ရီုဗၚ်အာတုဲ လ္တူညးအခေါၚ်ကဵုမာဲနွံ တၠဆန္ဒကဵုမာဲတံ အန္တရာဲညံၚ်ဟွံဂွံ က္တဵုဒှ်အာ စွံဇြိုဟ်နက်တုဲ ရီုဗၚ်ရေၚ်တၠုၚ်အာရောၚ်ဂှ် ဟီုလဝ် ပ္ဍဲလိက်လလောၚ်တြးဂှ်ရ။
ပ္ဍဲကဵုဒဳဇြမ်ပါ ဍုၚ်ဗမာ ကၠောန်အာ ပေါဲရုဲမာဲဂှ် ထံက်ဂလာန်ပေၚ်ၚ်တုဲ ပေါဲရုဲမာဲအပ္ဍဲကဵုတွဵုးရကရေၚ်ဝွံ ပရေၚ်ညိင်ဝပ် ဂီုကၠီုကေုာံ ပွမဓရ်ယာနွံနွံ ညံၚ်ဂွံကၠောန်အာမာန်ကီု ညံၚ်ဂွံဒှ် ပေါဲရုဲမာဲသီုဖအိုတ်ပါလုပ်မံၚ် ရီုဗၚ်ရေၚ်တၠုၚ်အာရောၚ် ဒပ်မၚ်ပယျဵု ကရေၚ် BGF လလောၚ်ပတိတ်လဝ်ရ။
နူကဵုသၟဝ်တဲကံၚ်သဳပၞာန်ဂှ် ပ္ဍဲသၞာံ ၂၀၂၄ ဂိတုဂျာန်နဝါရီတေံ ဒပ်မၚ်ပယျဵု ကရေၚ် BGF နုက်တိတ်လဝ်တုဲ နဒဒှ် ဒပ်ပၞာန်ကောန်ဂကူကရေၚ် KNA ပြံၚ်သၠာဲဒက်ပ္တန်အာရောၚ် ဟီုဂးလလောၚ်တြးလဝ်ဂှ်ကီု ဗီုကံၚ်သဳပၞာန်ကီု ပကောံမံၚ်ဇြဟတ်ဒပ်ပၞာန်တံဂှ်လေဝ် ကၠောန်မံၚ်ရ။
နကဵုဗော်သွးကောန်ဂကူကရေၚ် KNU ဂှ်တှ်ေ ပ္ဍဲကဵုပေါဲရုဲမာဲ ကဝ်မယှေန်ပၞာန်ဏံ ညးဍုၚ်ကွာန်ကရေၚ်တံကီု ဂကောံဇြဟတ် ပရေၚ်ဍုၚ်ကွာန်ကရေၚ်တံကီု ဗော်ပရေၚ်ဍုၚ်ကွာန်တံကဵု အလုံညးဍုၚ်ကွာန်တံ ညံၚ်ဟွံဂွံပါလုပ်တုဲ နကဵုနဲကဲ ပကီုပရာတ်ဟွံသေၚ်တံ ညံၚ်ဂွံဒစဵုဒစးအာ ဗတိုက်ဖအောဝ် လလောၚ်တြးလဝ်ကီုရ။
ပြဟ်ဟ်ဏံ ကၠာဟွံစိုပ် ဂိတုဒဳဇြမ်ပါ ကၠောန်အာပေါဲဏံ ပ္ဍဲကဵုတွဵုရးကရေၚ် နူကဵုဒပ်ကဝ်မယှန်ပၞာန် လ္တူဂကောံဇြဟတ်ပၠန်ဂတးတံ သၠုၚ်အသိၚ်တုဲ ထပက်မံၚ်ပၞာန်နွံမံၚ်ဂှ် ဒၞာဲဂၠံၚ်အာယှကဵု ဒၞာဲတၞဟ်ဟ်တံ ဒှ်မံၚ်ပေါဲဗတိုက် သ္ကာတ်မြဟ်ကီုရ။
ပရိုၚ်-သြင်လောန်တိုၚ်မ်
Photo – DKBA