ၜင်ကံက် ၊ သိပ်တမ်ပါ ၆
သ္ကိုပ်ဝန်ဇၞော်ဍုင်သေံတြေံ တက်သေန် ယှေန်နာဝါထရာဝွံ နူကဵုစၠတ်ထဝ် ကၠာဟွံဂွံရုဲစှ် သ္ကိုပ်ဝန်ဇၞော်တၟိ ခြာမွဲတ္ၚဲ၊ နူကဵုရုၚ်သၞောဝ်ဓရ် ဖျေံဏာထံၚ်ကုညးတေံမာန် သ္ဂုတ်သွာတ်ကၠာဟွံတိတ်ဏီ ပ္ဍဲသိပ်တမ်ပါ ၄ ဂှ် နကဵုၜၚ်ကျာ ဂြိပ်ပါဲအာ ဍုၚ်မ္ၚးရဂှ် ဒပ်ဗၠာဲသၟိၚ် ဟီုရ။
ပ္ဍဲဍုၚ်သေံ ဒှ်မံၚ် ညးသြဇာဇၞော် ဗဳလျာန်နာမွဲတၠ တက်သေန်ဝွံ ညးတေံဒက်ပတန်လဝ် ဗော်ဖူထာဲ ဂွံလဝ်အဝဵု ပံက်လဝ် ဂကောံအလဵုအသဳပံၚ်ကောံဂှ် ထုဲၜန်မံၚ်အိုတ်တုဲ ကၠာဟွံဂွံရုဲသ္ကိုပ်ဝန်ဇၞော်တၟိ အခိၚ်ဒးဆဵုဂဗမံၚ်ကဵု ပရေၚ်ကော်ဆော ဗော်ပြိုၚ်ပကာန်တံဂှ် ညးတေံ ဂြိပ်ပါဲတိတ်အာ ဍုၚ်မ္ၚးရ။
အခိၚ်ကၠာတေံလေဝ် ပ္ဍဲကဵုဍုၚ်မ္ၚး ပွိုၚ် ၁၅ သၞာံ ညးတေံ ကေၚ်ပါဲမံၚ်လဝ်ကီုရ။
မဟာမိတ်ညးတံ ဂွံတိုန်အဝဵုတုဲ ဗွဲကြဴ ပ္ဍဲသၞာံ ၂၀၂၃ ဂှ် တက်သေန် ကလေၚ်စဴကၠုၚ်ဍုၚ်သေံ ၜိုန်ရဒးဒုၚ်ဖျေံထံၚ်ကီုလေဝ် နကဵုတၚ်ထ္ၜးဟိုတ် ပရေၚ်ထတ်ယုက်တုဲ ဂိတုလံလ မံၚ်ကၠုၚ်လဝ်ပ္ဍဲရုၚ်ဂဥုဲရ။
ဆေၚ်စပ်ကဵု အမှုတက်သေန် ပါလုပ်မံၚ်မွဲတၚ်ဂှ် ပ္ဍဲသိပ်တမ်ပါ ၉ နူကဵု ရုၚ်သၞောဝ်ဓရ် သွက်ဂွံဖျေံအမိၚ် စဳဇန်လဝ်တုဲ နကဵုညးတေံ အကာဲအရာ ဒးဒုၚ်ဖျေံအာ ထံၚ်မာန်ရောၚ်။
အခေါၚ်တိတ်ဍုၚ်မ္ၚးဟၟဲပုဟ်ဂှ် နူကဵုရုၚ်သၞောဝ်ဓရ် ဒၞာတာလဝ်ညးတေံဟၟဲပုဟ် ညးတာလျိုၚ်တံ သ္ပဒတန်တုဲ တက်သေန်ဝွံ နူကဵု သၞေဟ်ၜၚ်ကျာ ဒန်မုၚ် ဍုၚ်ၜံၚ်ကံက် ပ္ဍဲအခိင်ဒေသ သဝ်တ္ၚဲ ၇ နာဍဳ ၁၇ မိနေတ်ဂှ် နကဵုၜၚ်ကျာညးတေံ တိတ်အာရ ဒပ်ဗၠာဲသၟိၚ် ဟီုရ။
ၜၚ်ကျာစုတ်လဝ်မဂၞန် T7GTS ဝွံ ကၠာတဲ ပတဝ်လဝ်က္ဍိုပ်ကု ဍုၚ်သင်ကာပဝ်တုဲ ပဝ်အာမံၚ်ကီုလေဝ် ဂေတ်ဂေၚ်ပဝ်ယာန်မံၚ် လ္တူဍုၚ်မလေယှာကဵု ၜဳဂၚ်ကပ္ပလဳ အတန်ကဵုအတန်တုဲ ပတဝ်အာ လပါ်ပလိုတ်ပဝ်အာရဂှ် ညးမၚ်ရံၚ် ပွမပဝ်ယာန်လ္တူကျာတံ ဟီုရ။
တက်သေန်တိတ်အာဍုၚ်မ္ၚးဂှ် ဟွံဂွံစွံသတိကီုလေဝ် သတ္တဟဂတဏံ အာစိုပ်တိုန်ရုၚ်သၞောဝ်ဓရ်ရောၚ်ဂှ် ညးတေံဟီုလဝ်နွံ ညးဗက်အမှုညးတေံ ဝင်ယတ် ချာတ်မန်ထရဳ ဟီုကီုဌာန်ပရိုၚ်ရိုက်တာရ။
စပ်ကဵုပရေၚ်တက်သေန် ချဳဒရာၚ်မံၚ်တံဂှ် သွက်ဂွံဟီုစၟတ်ကဵုမွဲမွဲသာ်ဟၟဲရောၚ် ညးအခေါင်ဟီုဂးနွံ ဗော်ဖူထာဲ တးပါဲလဝ်ရ။
အယုက် ၇၆ သၞာံ တက်သေန်ဂှ် ဒှ်ညးရပ်ဇုက် ဗော်ဖူထာဲ ဗွဲလက်ကြဴတုဲ ဒှ်အပါ ဖေဝ်ထံၚ်ထာန် သ္ကိုပ်ဝန်ဇၞော်တြေံ ဒးဒုၚ်ပတိတ်လဝ်ဟွံလံဏီဂှ်ရ။
Ref:Reuters