ထဝါဲ၊ သေတ်တေန်ဗါ ၆
ပ္ဍဲကဵုရးတနၚ်သဳ ပွိုၚ်ဍုၚ်ထဝါဲ ဒၞာဲဒေသဂြိပ်ဗၟံက်ဂှ် ဒပ်ကဝ်မယှေန် ဟိုတ်နူထပက်ကၠုၚ်ကရောၚ်ပၞာန်တုဲ ပေါဲဗတိုက်အကြာၜါလပါ် သ္ကာတ်မြဟ် ဒှ်မံၚ်ရောၚ် ဒပ်ပၠန်ဂတး ဖျေံလဝ်သ္ဇိုၚ်ဒေသထဝါဲတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵု သိပ်တမ်ပါ ၁ ဂှ် ဟိုတ်နူကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်တုဲ ပ္ဍဲကဵုဒေသဂြိပ်ဗၟံက်ထဝါဲ ဒၞာဲကရပ်ကွာန်“ဝကုၚ်(ဝကုန်း) ကဵု ဗဝပေန် (ဘဝပၚ်) ပွဳပွူမွဲဒမြိပ်ဂှ် အကြာၜါလပါ် ပေါဲဗတိုက်သ္ကာတ်မြဟ် ဒှ်မံၚ်ရ။
ဒဵုကဵုသိပ်တမ်ပါ ၅ ပေါဲဗတိုက်ဆက်ဒှ်မံၚ်တုဲ သီုၜါလပါ် ဒးဘဲဒဏ် ချိုတ်အာလဝ် နွံမံၚ်ရောၚ်သ္ဂးရ။
ပြဟ်ဟ်ဏံ ကရောၚ်ပၞာန် ဒပ်ကဝ်မယှေန်ပၞာန် ညိဟွံကလေၚ်ဆုတ်၊ ဆက်ထပက်မံၚ်ပၞာန် ဂတတေံဂှ်တုဲ ပေါဲဗတိုက်အကြာၜါလပါ် အကာဲအရာ ပဵုတုဲဘိုအ်ဂွံ သ္ကာတ်မြဟ်တိုန်သၟးရ။
စနူ ဂိတု တုဲကၠုၚ်တေံဂှ်ရ ပ္ဍဲကဵုဒေသဂြိပ်ဗၟံက်ထဝါဲဏံ ကဝ်မယှေန်ပၞာန် ပြေၚ်ရေၚ်ဝေၚ်ပၞာန် ဗတိုက်ကၠုၚ်မံၚ်နွံတုဲ အပ္ဍဲကဵုပေါဲဗတိုက်တံဂှ် လပါ်ကဝ်မယှေန်ပၞာန်တံသၟး ဒးဘဲဝပ်တုဲ ချိုတ်ဂၠိုၚ်မံၚ်ရောၚ် သ္ဂးရ။
ဂိတုအဝ်ဂတ် ၂၁ ဂှ်လေဝ် ပ္ဍဲကဵုပေါဲဗတိုက် ကွာန်တေန်ဂါန်တုၚ်(သင်္ကန်းတုန်းကျေးရွာ) ဂှ် ကောန်ပၞာန် လပါ်ကဝ်မယှေန်ပၞာန် ဟွံအောန်နူကဵု ၂၀ တၠ ချိုတ်လဝ်တုဲ လပါ်ရဲဒပ်ပံၚ်ကောံပၠန်ဂတးတံ မွဲတၠချိုတ်တုဲ ဒးဝပ် ၃ တၠ နွံကၠုၚ်ရ။
ပရိုၚ်-သြင်လောန်တိုၚ်မ်
Photo – Social Media